ໂມໂຫໂທໂສ ພາໂຕຕົກຕໍ່າ
ຄຳເວົ້າທີ່ວ່າ “ໂມໂຫໂທໂສ ພາໂຕຕົກຕໍ່າ” ມັກໄດ້ຍິນຈາກປາກຂອງຜູ້ເປັນພໍ່ແມ່, ຜູ້ປົກຄອງທຸກຄົນເຄີຍໃຊ້ບອກ ສັ່ງສອນລູກຫລານ ແລະ ມາຮອດດຽວປັດຈຸບັນ, ຄຳສອນດັ່ງກ່າວກໍຍັງໃຫ້ຄວາມໝາຍໃນແງ່ຄິດຫງໍາໄດ້ເປັນຢ່າງດີ.
ຄຸ້ນເຄີຍດີກັບການບອກສອນຂອງຜູ້ເຖົ້າ ທີ່ມັກເວົ້າວ່າ ຜູ້ໃດໃຈຮ້ອນວູ່ວື່ ບໍ່ຄວນຖືອາວຸດ ບໍ່ຄວນໃຊ້ກຳ ລັງ…ເພາະເປັນອັນຕະລາຍ ແລະ ກໍເປັນສິ່ງທີ່ບໍ່ສົມເຫດສົມຜົນ.
ຂະນະດຽວກັນກໍຍັງມີບາງຄຳສອນຂອງຄົນບູຮານວ່າ: ການປ້ອງກັນຕົນທີ່ດີບໍໍ່ແມ່ນການມີອາວຸດດີຄອບຄອງ ແຕ່ເປັນການເພີ່ມໝູ່ສະຫາຍຮັກແພງ…ເຫດການທີ່ເປັນຂ່າວດັງຊົ່ວຂ້າມຄືນຄືການອາລະວາດຕີກັນເຖິງຂັ້ນບາດເຈັບ ເຖິງວ່າບໍ່ເຖິງຂັ້ນຕາຍ,ແຕ່ສິ່ງທີ່ຕາຍໄປຄືຄຸນງາມຄວາມດີທີ່ສະສົມສ້າງມາຫລາຍຟ້າຫລາຍປີ ເຊິ່ງເກີດຂຶ້ນຊົ່ວຊ້າງພັບຫູ ງູແລບລີ້ນ ຍ້ອນຄວາມໂມໂຫໂທໂສ ບໍ່ມີຂັນຕິຄວາມອົດທົນ. ສະພາບດຽວນີ້ ຫລາຍຄົນບອກວ່າ ຄວາມອົດທົນ ກໍຄືສະມາທິຂອງຄົນນັບມື້ສັ້ນລົງຊັກໄຊ້ ຍ້ອນຫລາຍເງື່ອນໄຂ ແລະ ປັດໄຈສະພາບແວດລ້ອມກະທົບ ໂດຍສະເພາະຄົນທີ່ດຳລົງຊີວິດໃນຕົວເມືອງໃຫຍ່ຈຳນວນໜຶ່ງທີ່ເຫັນວັດຖຸເໜືອກວ່າຈິດໃຈ ເຊິ່ງການເສື່ອມທາດແທ້ມູນເຊື້ອອັນດີງາມຂອງຄົນບໍ່ເທົ່າໃດນັ້ນ ກາຍເປັນປາກົດການ ປາໂຕດຽວເໜົ່າໝົດຂ້ອງ. ແນວໃດກໍດີເມື່ອບັນຫາເກີດຂຶ້ນແລ້ວ ກໍຕ້ອງຊ່ວຍກັນຫາທາງແກ້ ແລະ ສະກັດກັ້ນ ແຕ່ຫົວທີ.
ເວົ້າເລື່ອງຄວາມໂມໂທໂສນັ້ນ ຈະມາຈາກຄວາມມັກອວດອ້າງທີ່ບໍ່ເຂົ້າທ່າ ການຄວບຄຸມສະຕິບໍ່ໄດ້ ການຫຶງຫວງ ຫລື ອື່ນໆກໍດີ, ຄົນປະເພດນີ້ເວລາປະພຶດອອກບໍ່ສາມາດຫ້າມໄດ້ ແລະ ຫລາຍຄົນແມ່ນແຕ່ຊຸມໝູ່ຄູ່ໃກ້ຊິດກິນສຸກກິນດິບ…ກໍຫ້າມບໍ່ໄດ້ ເພາະມາຈາກເຫດຜົນທີ່ວ່າ: ນິດໄສມັນແນວນັ້ນ…ແຕ່ສໍາລັບຄົນສ່ວນຫລາຍອາດຈະບໍ່ຄິດແນວນັ້ນ, ການອວດອ້າງ ອວດໂຕໂວຫານ ຫລື ພຶດຕິກຳທີ່ບໍ່ດີໃດຢູ່ສະຖານທີ່ສາທາລະນະມັນບໍ່ແມ່ນເລື່ອງຕະຫລົກ ເຮຮາຊວນຫົວ, ປະເທດເຮົາ ມີລັດຖະທຳມະນູນ ກົດໝາຍ ຂໍ້ກຳ ນົດກົດລະບຽບທີ່ບໍ່ມີໃຜຢູ່ເໜືອ, ເຈົ້າໜ້າທີ່ບ້ານເມືອງ ຫລື ຂະແໜງການທີ່ມີສິດອອກໃບອະນຸຍາດໃຫ້ດຳ ເນີນທຸລະກິດດ້ານນີ້ ຄວນສຶກສາລະອຽດຮອບຄອບ ເບິ່ງໃຫ້ເລິກວ່າມີຫຍັງແຝງຢູ່ໃນທຸລະກິດຫລືບໍ່? ເມື່ອອະນຸຍາດແລ້ວ ກໍໝັ່ນຕິດຕາມດູແລວ່າມີຫຍັງເກີນຂອບຂະໜາດບໍ່?
