ເອັນໂກໂລ ກັອງເຕ້ ຕ້ອງຜ່າຕັດແຮມສຕິງ ຕາມຄຳແນະນຳຂອງໝໍ ແລະ ຈະໝົດສິດ ຊ່ວຍ ເຊວຊີ ດົນເຖິງ 4 ເດືອນ
ເອັນໂກໂລ ກັອງເຕ້ ກອງກາງຕົວຮັບຂອງ ເຊວຊີ ໄດ້ຮັບບາດເຈັບທີ່ເອັນຂາ. ຫລ້າສຸດນັກເຕະໄດ້ເດີນທາງໄປພົບແພດຜູ້ຊ່ຽວຊານ. ກ່ອນທີ່ຈະຕັດສິນໃຈຜ່າຕັດເພື່ອປິ່ນປົວຕາມການແນະນຳຂອງທ່ານໝໍ. ນັ້ນເຮັດໃຫ້ເຂົາຕ້ອງພັກຍາວເຖິງປີໜ້າ.
ກອງກາງຊາວຝຣັ່ງ ໄດ້ຮັບບາດເຈັບຕັ້ງແຕ່ນັດທີ່ສະເໝີກັບ ທັອດແນມ ຮັອດສະເປີ 2-2 ເມື່ອວັນທີ 14 ສິງຫາ ແລະ ສາມາດກັບມາຝຶກຊ້ອມໄດ້ໃນຕົ້ນເດືອນທີ່ຜ່ານມາ. ແຕ່ຫລັງຈາກນັ້ນສິ່ງທີ່ບໍ່ຄາດຝັນຂຶ້ນ. ເມື່ອລາວໄດ້ຮັບບາດເຈັບຊ້ຳໃນການລົງຊ້ອມກັບທີມກ່ອນເກມ UEFA Champions League ກັບ ເອຊີ ມິລານ ໃນອາທິດທີ່ຜ່ານມາ.
ເບື້ອງຕົ້ນທີມແພດຂອງ ເຊວຊີ ຄາດຄະເນໃນເບື້ອງຕົ້ນວ່າ ກັອງເຕ້ ຈະຕ້ອງໃຊ້ເວລາປະມານສາມເດືອນເພື່ອຟື້ນຕົວ, ຊຶ່ງຫມາຍຄວາມວ່າເຂົາຈະບໍ່ໄດ້ໄປປ້ອງກັນແຊ້ມບານໂລກກັບທີມຊາດຝຣັ່ງທີ່ກາຕ້າ ເຊິ່ງມີກຳນົດຈະເປີດສະໜາມໃນອີກ 1 ເດືອນຂ້າງໜ້າແນ່ນອນແລ້ວ.
ເມື່ອບໍ່ດົນມານີ້, ນັກເຕະອາຍຸ 31 ປີໄດ້ເດີນທາງໄປພົບແພດຊ່ຽວຊານສະເພາະທາງ ແລະ ໄດ້ຮັບການແນະນໍາໃຫ້ຜ່າຕັດ ສຸດທ້າຍລາວໄດ້ເຂົ້າຮັບການຜ່າຕັດ ແລະ ປະສົບຄວາມສໍາເລັດຜົນດ້ວຍດີ ຄາດວ່າລາວຈະຕ້ອງພັກຟື້ນ ແລະ ຮຽກຄວາມຟິດຂອງລາວກັບຄືນມາໃນສະໜາມເຖິງ 4 ເດືອນ.
