ພາຍຸເຂດຮ້ອນ ນັນແກ ຖະຫລົ່ມ ຟີລິບປິນ ຈຳນວນຜູ້ເສຍຊີວິດເພີ່ມຂຶ້ນ 150 ຄົນ ປະຊາຊົນ ຫລາຍແສນຄົນຕ້ອງອົບພະຍົບ

ໃນວັນທີ 3 ພະຈິກ ທີ່ຜ່ານມາ ສຳນັກງານໄພພິບັດແຫ່ງຊາດ ຟີລິບປິນ ລາຍງານຄວາມຄືບໜ້າ ພາຍຸເຂດຮ້ອນ ນັນແກ ທີ່ຖະຫລົ່ມຟີລິບປິນ ກ່ອນທີ່ຈະເຄື່ອນຕົວມຸ່ງໜ້າໄປປະເທດຈີນ , ອິດທິພົນຂອງພາຍຸ ໄດ້ເຮັດໃຫ້ຝົນຕົກໜັກ, ນ້ຳຖ້ວມກະທັນຫັນ ແລະ ດິນຖະຫລົ່ມໃນຫລາຍພື້ນທີ່ ໃນອາທິດທີ່ຜ່ານມາ ເຮັດໃຫ້ຄົນເສຍຊີວິດເພີ່ມເປັນ 150 ຄົນ .

ເຈົ້າໜ້າທີ່ຟີລິບປິນ ເປີດເຜີຍວ່າ ປະຊາຊົນກວ່າ 355,4000 ຄົນ ຕ້ອງອົບພະຍົບຈາກບ້ານເຮືອນ, ມີຜູ້ໄດ້ຮັບບາດເຈັບຢ່າງໜ້ອຍ 128 ຄົນ ແລະ ຍັງມີຜູ້ສູນຫາຍອີກ 36 ຄົນ ເຊິ່ງເຈົ້າໜ້າທີ່ທາງການໄດ້ເຕືອນວ່າບໍ່ມີຄວາມຫວັງທີ່ຈະພົບຜູ້ລອດຊີວິດ.

ນອກນີ້ ສຳນັກອຸຕຸນິຍົມ ແລະ ອຸທົກກະສາດ ຍັງລາຍງານວ່າຈະມີຝົນຕົກເພີ່ມຂຶ້ນ ຕ້ອງກຽມພ້ອມໃນການຮັບມືກັບໄພພິບັດທີ່ຈະເກີດຂຶ້ນ ບໍ່ວ່າຈະເປັນນ້ຳປ່າໄຫລ່ຫລາກ ຫລື ດິນຖະຫລົ່ມຈາກພູ.