ມາດຕະການກຳຈັດໄພໃກ້ຕົວເດັກ

- advert banner 728 90 728x90 - ມາດຕະການກຳຈັດໄພໃກ້ຕົວເດັກ

ໂດຍ: ວິ​ເສດ ສະ​ແຫວ​ງສຶກສາ

ໜຶ່ງ​ໃນ​ບັນດາ​ໄພ​ໃກ້​ຕົວ​ຂອງ​ເດັກ​ທີ່​ເປັນ​ຂ່າວ​ເສົ້ານັ້ນ ກໍ​ຄື​ການ​ລວນ​ລາມ​ທາງ​ເພດ ​ເຊິ່ງຜູ້​ກໍ່​ເຫດ​ນັ້ນມັກ​ຈະ​ເປັນ​ຜູ້​ຢູ່​ໃກ້ຊິດຕິດ​ແທດ​ກັບ​ເດັກໆ​ນັ້ນ​ເອງ, ​ໃນ​ນັ້ນ ລວມທັງ​ຄົນ​ໃນ​ຄອບຄົວ, ພີ່ນ້ອງ ຫລື ຄົນ​ທີ່​ຮູ້ຈັກ​ກັນ​ດີ. ຍ້ອນ​ແນວ​ນີ້​ເອງ ມາດ​ຕະການ​ປົກ​ປ້ອງ​ເດັກ​ໃຫ້​ມີ​ຄວາມ​ປອດ​ໄພ​ທັງ​ຮ່າງກາຍ ​ແລະ ຈິດ​ໃຈ ຈຶ່ງ​ມັກ​ຈະ​ຈະ​ເນັ້ນສະພາບ​ແວດ​ລ້ອມ​ອ້ອມ​ຕົວ​ບ່ອນ​ເດັກ​ຢູ່​ອາ​ໄສ. ສຳລັບ​ບົດ​ນີ້, ຜູ້​ຂຽນ​ໄດ້​ສັງ​ລວມ​ເອົາ​ມາດ​ຕະການ​ຈຳນວນ​ໜຶ່ງ​ທີ່​ບາງ​ປະ​ເທດ​ນຳ​ໃຊ້ ​ເພື່ອ​ຮັບປະກັນ​ຄວາມ​ປອດ​ໄພ​ຂອງ​ເດັກ​ໆ​ຈາກ​ການ​ຖືກ​ລວນ​ລາມ​ທາງ​ເພດ ​ເຊັ່ນ​ຢູ່ ສປ ຈີນ, ຂ່າວ​ໜັງສືພິມວຽງ​ຈັນທາ​ມ ສະບັບ​ວັນ​ທີ 30 ​ເດືອນ​ສິງຫາ​ນີ້ ​ໃຫ້​ຮູ້​ວ່າ: ທາງ​ການ​ນະຄອນ​ຊຽງ​ໄຮ​ໄດ້​ອອກ​ກົດ​ລະບຽບ​ກຳຈັດ​ພວກ​ທີ່​ເຄີຍ​ມີ​ຄະດີ​ກໍ່​ຄວາມ​ຮຸນ​ແຮງ​ທາງ​ເພດ​ກັບ​ເດັກ​ບໍ່​ໃຫ້​ປະກອບ​ອາຊີບ​ທີ່​ມີ​ການ​ພົວພັນ​ໃກ້ຊິດ​ກັບ​ເດັກ​ເຍົາວະ​ຊົນ. ທັງ​ນີ້​ກໍ​ເພື່ອ​ຕັດ​ສະ​ນວນ​ທີ່​ຈະ​ກໍ່​ໃຫ້​ເກີດ​ມີ​ການ​ລວນ​ລາມ​ທາງ​ເພດ​ຕໍ່​ເດັກ. ບຸກຄົນ​ທີ່​ເປັນ​​ເປົ້າໝາຍ​ຫ້າມ​ເຮັດ​ວຽກ ຫລື ປະກອບ​ອາຊີບ​ໃກ້​ເດັກນັ້ນ​ໄດ້​ແກ່​ບຸກຄົນ​ທີ່​ເຄີຍ​ກໍ່​ຄະດີ​ຂົ່ມຂືນ​ຝືນ​ໃຈ, ຜູ້​ເຄີຍ​ລວນ​ລາມ​ທາງ​ເພດ​ຕໍ່​ເດັກ, ພວກ​ຈັດຕັ້ງກຸ່ມ​ໂສ​ເພນີ ຫລື ​ເຄີຍ​ຈ່າວ​ຂາຍ​ບໍລິການ​ໂສ​ເພນີ​ໃຫ້​ຄົນ​ອື່ນ ກໍ​ຄື​ຜູ້​ທີ່​ໃຫ້​ບ່ອນ​ພັກ​ເຊົາ​ແກ່​ໂສ​ເພນີ. ພວກ​ມີ​ຄະດີ​ດັ່ງກ່າວ​ມາ​ຂ້າງ​ເທິງ​ນີ້​ຈະ​ຖືກ​ຫ້າມ​ບໍ່​ໃຫ້​ປະກອບ​ອາຊີບ​ຢູ່​ຕາມ​ໂຮງຮຽນ, ສະ​ຖາ​ບັນ​ການ​ແພດ, ສະຖານ​ທີ່​ບັນ​ເທີ​ງ, ​ເດີ່ນ​ກິລາ ​ແລະ ຫ້ອງ​ສະໝຸດ ​ເພາະ​ສະຖານ​ທີ່​ເຫລົ່າ​ນີ້​ເປັນ​ສູນ​ເຕົ້າ​ໂຮມ​ຂອງ​ເດັກໆ. ມາດ​ຕະການ​ຫ້າມ​ດັ່ງກ່າວ​ເລີ່​ມປະຕິບັດ​ຢູ່​ເມືອງ​ມິນ​ຮາງ​ຂອງ​ນະຄອນ​ຊຽງ​ໄຮ​ນັ້ນ​ເອງ. ສ່ວນ​ຢູ່​ປະ​ເທດ ຍີ່ປຸ່ນ ນັ້ນ, ລັດຖະສະພາກໍ​ໄດ້​ຮັບຮອງ​ເອົາ​ກົດໝາຍ​ກ່ຽວ​ກັບ​ສະຫວັດ​ດີກາ​ນ ​ແລະ ການ​ປ້ອງ​ກັນ​ການລະ​ເມີດ​ສິດ​ຂອງ​ເດັກ​ສະບັບ​ປັບປຸງ​ໃນ​ເດືອນ​ພຶດສະພາ​ປີ 2016. ກົດໝາຍ​ໃຫ້​ຄວາມ​ສຳຄັນ​ໃນ​ການ​ສ້າງ​ສູນ​ໃຫ້​ຄຳ​ປຶກສາ​ສຳລັບ​ເດັກ​ທີ່​ຖືກ​ລະ​ເມີດ​ສິດ, ພ້ອມ​ທັງ​ການ​ປະກອບ​ພະນັກງານ​ໃຫ້​ສົມ​ດູ​ນກັບ​ຈຳນວນ​ສູນ​ທີ່​ປຶກສາ​ໃນ​ທົ່ວ​ປະ​ເທດ. ຂ່າວ​ບອກ​ວ່າ: ​ໃນ 15 ປີຜ່ານມາ, ຈຳນວນ​ສູນ​ໃຫ້​ຄຳ​ປຶກສາ​ເພີ່ມ​ຂຶ້ນ 5 ​ເທົ່າ​ຕົວ ​ແຕ່​ຈຳນວນ​ຜູ້​ເຮັດ​ວຽກ​ໃຫ້​ບໍລິການ​ໃນ​ສູນ​ພັດ​ເພີ່ມ​ຂຶ້ນພຽງ​ສອງ​ເທົ່າ. ຄະດີ​ທີ່​ພົວພັນ​ກັບ​ການລະ​ເມີດ​ສິດ​ຂອງ​ເດັກ​ທີ່​ຜ່ານ​ສູນ​ໃຫ້​ຄຳ​ປຶກສາ​ໃນ​ປີ 2016 ນັ້ນມີ​ສູງ​ເຖິງ 122.578 ​ເລື່ອງ. ການລະ​ເມີດ​ສິດ​ຂອງ​ເດັກ​ໃນ​ຍີ່ປຸ່ນນີ້​ປະກອບ​ດ້ວຍ​ການລະ​ເມີດ​ທາງ​ວາຈາ (ຮ້າຍ​ດ່າ) ​ເຊິ່ງ​ເພີ່ມ​ຂຶ້ນ 51,5% ​ໃນ​ປີ 2016, ສ່ວນ​ການລະ​ເມີດ​ທາງ​ຮ່າງກາຍ​ນັ້ນຢູ່​ໃນ​ຕົວ​ເລກ 26,0% ​ແລະ ການ​ລວນ​ລາມ​ທາງ​ເພດ​ນັ້ນມີ 1.622 ກໍລະນີ ​ເທົ່າ​ກັບ 1,3%. ສຳລັບຢູ່ ຟີ​ລິບ​ປິນ ກໍ​ມີ​ກໍລະນີທີ່​ພິສູດ​ໃຫ້​ເຫັນ​ວ່າ: ​ໄພ​ອັນຕະລາຍ​ສຳລັບ​ເດັກນັ້ນມັນ​ຢູ່​ໃກ້​ຕົວ​ແທ້ໆ ​ເພາະ​ມັນ​ເກີດ​ຈາກ​ນັກບວດ​ທີ່​ເປັນ​ຄູ​ສອນ​ສາສະໜາ​ກາ​ໂຕ​ລິກທີ່​ມີ​ລູກສິດ​ລູກ​ຫາ​ເປັນ​ຈຳນວນ​ຫລວງຫລາຍ, ​ແຕ່​ສຸດ​ທ້າຍ​ຂ່າວ​ພັດ​ບອກ​ວ່າ: ນັກບວດ​ທີ່​ມີ​ຊື່ວ່າ ລາ​ກາ​ເຣຮົດ (Lagarezos) ອາຍຸ 55 ປີ ຄົນ​ນີ້​ຖືກ​ຈັບ​ໃນ​ເວລາ​ທີ່​ເຂົາ​ພວມ​ລໍ້​ເດັກ​ຍິງ​ອາຍຸ 13 ປີ​ເຂົ້າ​ເຮືອນ​ພັກ ​ເພື່ອ​ປຸ້ນ​ສະຫວາດ. ດີ​ແຕ່​ວ່າ​ຜູ້​ເປັນ​ແມ່​ຂອງ​ເດັກ​ຈັບ​ພິລຸດ​ຂອງ​ນັກບວດ​ໄດ້​ຈຶ່ງ​ແຈ້ງ​ເຈົ້າໜ້າ​ທີ່​ຕຳຫລວດ​ທັນ. ​ເຫດການ​ນີ້​ເກີດ​ຂຶ້ນທີ່​ເມືອງ​ບາຣັງ​ເກ ສະ​ໂຕ ນິ​ໂນ (Barangay Sto Nino). ​ແຕ່​ທີ່​ຖື​ວ່າ​ເປັນ​ໄພ​ໃກ້​ຕົວ​ກວ່າ​ນັກບວດ ກໍ​ຄື​ແມ່ນ​ສື່​ທີ່​ເປັນ​ເດັກ​ຍິງ​ອາຍຸ​ພຽງ 16 ປີ. ຜູ້​ນີ້​ລະ​ເປັນ​ຄົນ​ຕິດ​ຕໍ່​ເດັກ​ຍິງ​ອາຍຸ 13 ປີ​ໃຫ້​ນັກບວດ.

- 1 1 - ມາດຕະການກຳຈັດໄພໃກ້ຕົວເດັກ
- Tiger Head 728x90 - ມາດຕະການກຳຈັດໄພໃກ້ຕົວເດັກ
error: Content is protected !!