ສັ່ງໂຈະການເຄື່ອນໄຫວຖາວອນ ແລະ ຖອນໃບອະນຸຍາດ ດຳເນີນທຸລະກິດ ຮ້ານແລກປ່ຽນເງິນຕາ ທັງໝົດ 173 ຮ້ານ

ເຈົ້າໜ້າທີ່ທະບຽນວິສາຫະກິດ, ກົມທະບຽນ ແລະ ຄຸ້ມຄອງວິສະຫະກິດ, ກະຊວງອຸດສາຫະກໍາ ແລະ ການຄ້າ ອອກແຈ້ງການວັນທີ 2 ມີນາ 2023 ເຖິງບັນດາເຈົ້າຂອງທຸລະກິດຮ້ານແລກປ່ຽນເງິນຕາທັງໝົດ 173 ຮ້ານ ທີ່ຖືກຖອນໃບອະນຸຍາດດໍາເນີນທຸລະກິດແລກປ່ຽນເງິນຕາ ຊາບດັ່ງນີ້:

1. ໂຈະການເຄື່ອນໄຫວທຸລະກິດຢ່າງຖາວອນຕໍ່ວິສາຫະກິດ ຈໍານວນ 173 ຫົວໜ່ວຍ ເນື່ອງຈາກບໍ່ໄດ້ເຂົ້າມາຍຸບເລີກວິສາຫະກິດ ຫລື ສະເໜີປ່ຽນແປງເນື້ອໃນທະບຽນວິສາຫະກິດ ຕາມກໍານົດເວລາທີ່ໄດ້ກໍານົດໄວ້ໃນແຈ້ງການ ສະບັບເລກທີ 372/ຈທວ, ລົງວັນທີ 08 ທັນວາ 2022;
2. ລາຍຊື່ວິສາຫະກິດທີ່ຖືກໂຈະການເຄື່ອນໄຫວທຸລະກິດຖາວອນ ແມ່ນສາມາດກວດສອບຕາມລາຍຊື່ທີ່ລະບຸໃນ QR Code ດ້ານລຸ່ມຂອງແຈ້ງການສະບັບນີ້;
3. ຜົນຂອງການໂຈະການເຄື່ອນໄຫວທຸລະກິດຢ່າງຖາວອນ ມີດັ່ງນີ້:

– ການໂຈະການເຄື່ອນໄຫວທຸລະກິດຖາວອນ ມີຜົນນັບແຕ່ວັນທີ 2 ມີນາ 2023 ເປັນຕົ້ນໄປ;

– ຍ້າຍຊື່ ແລະ ຂໍ້ມູນທັງໝົດຂອງວິສາຫະກິດອອກຈາກຖານຂໍ້ມູນວິສາຫະກິດແຫ່ງຊາດ ໄປຢູ່ບັນຊີວິສາຫະກິດທີ່ບໍ່ເຄື່ອນໄຫວທຸລະກິດ;

– ວິສາຫະກິດທີ່ຖືກຍ້າຍຊື່ ຍັງມີພັນທະ ແລະ ຄວາມຮັບຜິດຊອບຕໍ່ໜີ້ສິນທີ່ເກີດຂຶ້ນໃນນາມການເຄື່ອນໄຫວທຸລະກິດຂອງຕົນ;

– ຫ້າມວິສາຫະກິດທີ່ຖືກໂຈະການເຄື່ອນໄຫວທຸລະກິດຢ່າງຖາວອນ ລວມທັງບຸກຄົນ, ນິຕິບຸກຄົນ ແລະ ການຈັດຕັ້ງ ນໍາເອົາໃບທະບຽນວິສາຫະກິດດັ່ງກ່າວໄປເຄື່ອນໄຫວທຸລະກິດ ຢ່າງເດັດຂາດ.

ໃນກໍລະນີລະເມີດຈະຖືກປະຕິບັດຕາມມາດຕະການຕາມທີ່ໄດ້ກຳນົດໄວ້ໃນກົດໝາຍວ່າດ້ວຍວິສາຫະກິດ ແລະ ປະມວນກົດໝາຍອາຍາຢ່າງເຂັ້ມງວດ.