ຝຣັ່ງ ກຽມອອກກົດໝາຍໃໝ່ຫ້າມພໍ່ແມ່ໂພສຮູບລູກລົງທາງສື່ອອນລາຍ

ສສ ຝຣັ່ງ ຫາກໍລົງຄະແນນໃຫ້ຜ່ານຮ່າງກົດໝາຍໃໝ່ ທີ່ມີເປົ້າໝາຍຫລັກເພື່ອປົກປ້ອງການເປັນສ່ວນຕົວຂອງເດັກຜ່ານຊ່ອງທາງອອນລາຍ ເຊິ່ງມີສາເຫດມາຈາກພໍ່ແມ່ທີ່ມັກສະແດງຮູບລູກໆລົງໂຊຊຽວມີເດຍ.

ສສ ຂອງຝຣັ່ງ ອອກສຽງເປັນເອກະພາບໃຫ້ຜ່ານຮ່າງກົດໝາຍໃໝ່ ທີ່ມີເນື້ອໃນສັ່ງຫ້າມພໍ່ແມ່ ຫລື ປົກຜູ້ຄອງໂພສຮູບຖ່າຍຂອງລູກ ຫລື ເດັກນ້ອຍໃນການປົກຄອງລົງໃນໂລກອອນລາຍ.

ກົດໝາຍສະບັບນີ້ມີເປົ້າໝາຍຕົ້ນຕໍໃນການປົກປ້ອງເດັກນ້ອຍ ເພື່ອບໍ່ໃຫ້ພໍ່ແມ່ເປີດເຜີຍການເປັນສ່ວນຕົວຂອງລູກສູ່ໂລກອິນເຕີເນັດຫລາຍເກີນໄປ ແລະ ຢ່າງບໍ່ມີຂໍ້ຈໍາກັດ ໂດຍກໍານົດວ່າສິດໃນການເອົາຮູບລູກໄປໂພສລົງສື່ໂຊຊຽວມີເດຍນັ້ນ ຈະເຮັດໄດ້ກໍຕໍ່ເມື່ອໄດ້ຮັບຄວາມຍິນຍອມຈາກພໍ່ ແລະ ແມ່ ເຊິ່ງຖ້າຝ່າຍໃດຝ່າຍໜຶ່ງບໍ່ຍິນຍອມ ແລະ ເກີດຄວາມຂັດແຍ່ງກັນຢ່າງຮຸນແຮງ ອາດຕ້ອງໃຫ້ຜູ້ພິພາກສາສານຄອບຄົວເປັນຜູ້ຕັດສິນ ຫລື ສັ່ງຫ້າມການໂພສຮູບຂອງເດັກ.

ຈາກຂໍ້ມູນຂອງຮ່າງກົດໝາຍໃໝ່ຊີ້ວ່າ: ຮູບທີ່ມີການແລກປ່ຽນກັນໃນກຸ່ມຜູ້ນິຍົມຮູບອານາຈານເດັກ ແຕ່ເຄີຍເປັນຮູບທີ່ໂພສໂດຍພໍ່ແມ່ຂອງເດັກ ໃນຊ່ອງທາງໂຊຊຽວມີເດຍເປັນຈໍານວນສູງເຖິງ 50%.