7 ວຽກຈຸດສຸມ ທີ່ນະຄອນຫລວງວຽງຈັນ ຈະຕ້ອງໄດ້ເອົາໃຈໃສ່ ເພື່ອດຶງດູດນັກທ່ອງທ່ຽວຕ່າງປະເທດໃຫ້ໄດ້ 5 ແສນເທື່ອຄົນ ພາຍໃນປີ 2023

ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວນະຄອນຫລວງວຽງຈັນ ໃຫ້ຮູ້ວ່າ: ໂຕເລກນັກທ່ອງທ່ຽວແຕ່ເດືອນມັງກອນ ຫາ ເດືອນພະຈິກປີ 2022 ມີນັກທ່ອງທ່ຽວເຂົ້າມາທ່ຽວນະຄອນຫຼວງວຽງຈັນທັງໝົດ 554.656 ເທື່ອຄົນ ໃນນັ້ນ: ນັກທ່ອງທ່ຽວຕ່າງປະເທດຈຳນວນ 528.811 ເທື່ອຄົນ ພ້ອມທັງໄດ້ອອກອະນຸຍາດໃໝ່ ແລະ ສືບຕໍ່ອະນຸຍາດດຳເນີນທຸລະກິດທ່ອງທ່ຽວ 358 ຫົວໜ່ວຍ, ໂຈະກິດຈະການ ແລະ ປະກັນສັງຄົມ 3 ຫົວໜ່ວຍທຸລະກິດ.

ນອກນັ້ນທ່ານໄດ້ກ່າວຕື່ມວ່າ: ທິດທາງແຜນການຈຸດສຸມໃນປີ 2023 ສຳລັບວຽກງານທ່ອງທ່ຽວ ຖວທ ນວ ໄດ້ວາງຄາດໝາຍໂຕເລກສູ້ຊົນໃຫ້ນັກທ່ອງທ່ຽວບັນລຸ 5 ແສນເທື່ອຄົນ. ດັ່ງນັ້ນພວກເຮົາຈຶ່ງວາງແຜນວຽກຈຸດສຸມທີ່ຕ້ອງໄດ້ເອົາໃຈໃສ່ປະຕິບັດດັ່ງນີ້:

1). ຈະສືບຕໍ່ຕິດຕາມ, ກວດກາ ແລະ ແກ້ໄຂບັນດາທຸລະກິດການທ່ອງທ່ຽວທີ່ເຄື່ອນໄຫວຜິດຕໍ່ລະບຽບກົດໝາຍ ທີ່ມີຄຳຮ້ອງຟ້ອງຈາກຫາງສຽງຂອງສັງຄົມ.

2). ສ້າງແຜນການກິດຈະກຳສົ່ງເສີມການ ທ່ອງທ່ຽວໄລຍະຍາວ ເພື່ອຊອກວິທີຫຼຸດຜ່ອນຜົນກະທົບ ແລະ ກະຕຸ້ນການທ່ອງທ່ຽວໃຫ້ກັບມາຟື້ນຕົວຄືນໃໝ່ ເພື່ອດຶງດູດນັກທ່ອງທ່ຽວໃຫ້ຢູ່ໃນສະພາບດີຂຶ້ນ;

3). ຊຸກຍູ້ສົ່ງເສີມ ແລະ ຮ່ວມມືກັບພາກທຸລະກິດການທ່ອງທ່ຽວໃນການສ້າງກິດຈະກໍາການທ່ອງທ່ຽວໃຫ້ມີຄວາມຫຼາກຫຼາຍຕິດພັນກັບງານບຸນປະເພນີຕ່າງໆຮອງຮັບໃຫ້ແກ່ການຟື້ນຟູການທ່ອງທ່ຽວ ທັງເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ;

4). ເພື່ອເປັນການຊຸກຍູ້ ແລະ ສ້າງຄວາມເຊື່ອໝັ້ນທາງດ້ານຄຸນນະພາບການບໍລິການຂອງທຸລະກິດການທ່ອງທ່ຽວ, ກົມພັດທະນາການທ່ອງທ່ຽວກະຊວງ ຖວທ ຈະໄດ້ດຳເນີນການປະເມີນມາດຕະຖານເຮືອນພັກແຮມອາຊຽນ ແລະ ມາດຕະຖານການທ່ອງທ່ຽວແບບປະຊາຊົນມີສ່ວນຮ່ວມອາຊຽນ ເພື່ອຂໍຮັບລາງວັນດັ່ງກ່າວໃນປີ 2023.

5). ສ້າງກິດຈະກຳສົ່ງເສີມການທ່ອງທ່ຽວທີ່ຕິດພັນກັບງານບຸນປະເພນີ, ສ້າງເທດສະ ການອາຫານ, ຄາຣາວານນັກທ່ອງທ່ຽວຢູ່ໃນນະຄອນຫຼວງວຽງຈັນ ແລະ ບຸນພະທາດຫຼວງວຽງຈັນ ທີ່ມີຄວາມຫຼາກຫຼາຍເພື່ອດຶງດູດນັກທ່ອງທ່ຽວ;

6). ກະກຽມແຜນການລົງສຳຫຼວດຄວາມເປັນໄປໄດ້ໃນການພັດທະນາການທ່ອງທ່ຽວແບບປະຊາຊົນມີສ່ວນຮ່ວມ (CBT) ທີ່ເມືອງປາກງື່ມ ເມືອງຫາດຊາຍຟອງ, ເມືອງສີໂຄດຕະບອງ ແລະ ເມືອງສັງທອງ ນະຄອນຫຼວງວຽງຈັນ;

7). ກະກຽມຂຶ້ນແຜນລົງສຳຫຼວດເສັ້ນທາງທ່ອງທ່ຽວນໍ້າງື່ມ, ບ້ານເວີນແທ່ນ ເມືອງໄຊທານີ-ເມືອງປາກງື່ມ.