ເມືອງຫາດຊາຍຟອງລົງ ຈັດສັນການຂາຍເຄື່ອງຊະຊາຍແຄມທາງ ຢູ່ດົງຄໍາຊ້າງ

ວັນທີ 20 ມີນາ 2023 ຜ່ານມາ ຄະນະກໍາມະການຈັດສັນຄວາມບໍ່ເປັນລະບຽບຮຽບຮ້ອຍ ຢູ່ຂອບເຂດພາຍໃນເມືອງຫາດຊາດຟອງ ນະຄອນຫລວງວຽງຈັນ ລົງຈັດຕັ້ງປະຕິບັດວຽກງານເພື່ອແກ້ໄຂບັນຫາສະພາບຂອງຄວາມບໍ່ເປັນລະບຽບຢູ່ຕາມແຄມທາງຖະໜົນດົງຄໍາຊ້າງຕໍ່ໜ້າສະຖາບັນວິທະຍາໄລສ້າງຄູ ພົບເຫັນວ່າ ຈຸດດັ່ງກ່າວແມ່ນມີຊາວຄ້າຂາຍຈໍານວນໜຶ່ງໄດ້ນໍາເອົາສິນຄ້າປະເພດກະສິກໍາ, ພືດຜັກ, ໝາກໄມ້, ໄຂ່ໄກ່, ເຂົ້າໜົມ ແລະ ອື່ນໆມາວາງຂາຍຈຳໜ່າຍ ເລາະລຽບຢູ່ຕາມແຄມທາງຕໍ່ໜ້າຂອງສະຖານບັນວິທະຍາໄລສ້າງຄູດົງຄໍາຊ້າງແຫ່ງນີ້ຢ່າງແໜ້ນໜາ ໂດຍບໍ່ໄດ້ອະນຸຍາດໃຫ້ນຳໃຊ້ພື້ນທີ່ທາງຍ່າງເປັນບ່ອນວາງຂາຍເຄື່ອງທົ່ວໄປ ນອກຈາກຕະຫລາດ, ພົບເຫັນລວມມີ 15 ຮ້ານ ໂດຍມີພາຫະນໍາໃຊ້ເປັນຕົ້ນດ້ານຫລັງຂອງກະບະລົດຮຸນໄດລໍ້ຍູ້ ແລະ ການນໍາ ເອົາຜ້າປູພື້ນເພື່ອເປັນບ່ອນຮອງວາງຂາຍເຄື່ອງກະຈາຍເລາະລຽບຢູ່ຕາມແຄມຕາມຂອບຟຸດບາດເປັນບໍລິເວນຍາວຢຽດກວມເອົາເຂດສາທາລະນະ

ນອກນັ້ນ, ຍັງໄດ້ຕັກເຕືອນຊີ້ນຳໃຫ້ຢຸດເຊົາການຂາຍເຄື່ອງຊະຊາຍຢູ່ເຂດດັ່ງກ່າວນີ້ໂດຍທັນທີ ແລະ ໃຫ້ຍົກຍ້າຍໄປຂາຍຢູ່ບ່ອນທີ່ເໝາະສົມທີ່ກຳນົດໃຫ້ຢ່າງຖືກຕ້ອງ ແລະ ພ້ອມນີ້ຍັງໄດ້ເຮັດບົດບັນທຶກກັບທີ່ເພື່ອຫ້າມບໍ່ໃຫ້ບຸກຄົນໃດນຳເອົາເຄື່ອງຂອງກັບມາຂາຍຢູ່ບ່ອນນີ້ອີກຢ່າງເດັດຂາດ  ຖ້າຫາກພົບເຫັນຍັງມີການຂາຍຢູ່ບ່ອນເກົ່ານີ້ອີກ ແມ່ນຈະຖືກປະຕິລັດລະບຽວິໄນປັບໃໝຕາມລະບຽບກົດໝາຍໂດຍບໍ່ມີການລະເວັ້ນຢ່າງເດັດຂາດ.

ທັງນີ້ກໍເພື່ອເປັນການຈັດຕັ້ງປະຕິບັດໂດຍສອດຄ່ອງຕາມທິດຊີ້ນຳຂອງຄະນະນຳເມືອງຫາດຊາຍຟອງ ແລະ ທິດຊີ້ນຳຂອງພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ໂດຍສະເພາະແມ່ນການສຸມໃສ່ເລັ່ງຈັດສັນຄວາມບໍ່ເປັນລະບຽບຮຽບຮ້ອຍທາງດ້ານສີ່ງກີດຂວາງ ພາຍໃນຕົວເມືອງ ແລະ ຊານເມືອງ ໃຫ້ມີຄວາມເປັນລະບຽບ  ແລະ ຄວາມສະອາດຈົບງາມຕາມເສັ້ນທາງສາຍຫລັກພາຍໃນເມືອງຫາດຊາຍຟອງ.