ແຟງລັງ ເປີດໂຄງການທ່ອງທ່ຽວ ແບບບໍ່ເສຍຄ່າ ໃຫ້ຊາວຕ່າງປະເທດ

ສຳນັກຂ່າວຕ່າງປະເທດລາຍງານ: ວັນທີ 23 ມີນາ 2023ຜ່ານມາ, ​ແຟງ​ລັງ ​ເປີດ​ໂຄງການ​ທ່ອງ​ທ່ຽວແບບ​ບໍ່​ເສຍ​ຄ່າ ໃຫ້​ຊາວ​ຕ່າງປະ​ເທດ ​ໄດ້​ຮຽນ​ຮູ້​ວິຖີ ​ຊີວິດ ຂອງປະ​ເທດ ທີ່​ມີ​ຄວາມສຸກ​ ທີ່​ສຸດ​ໃນ​ໂລກ ຫລັງ​ຈາກ ຕິດ​ອັນ​ດັບ​ແຖວ​ໜ້າ​ຂອງ​ໂລກ​ ຕິດ​ຕໍ່​ກັນ 6 ປີຊ້ອນ ຈາກ​ການຈັດ​​ອັນ​ດັບ​ຂອງ ສະຫະ​ປະຊາ​ຊາດ ​ໂດຍ​ໂຄງການນີ້ ​ມີ​ຊື່ວ່າ Masterclass of Happiness ​ເພື່ອຮັບ​ຊາວ​ຕ່າງປະ​ເທດ​ເຂົ້າມາ​ທ່ອງທ່ຽວ ​ແລະ ​ຮຽນ​ຮູ້ວິຖີ​ຊີວິດ ​ແບບ​ທ້ອງ​ຖິ່ນ​ໂດຍ​ບໍ່​ມີ ຄ່າ​ໃຊ້​ຈ່າຍ​ເປັນ​ເວລາ 4 ວັນ ຄາດ​ວ່າ ຈະ​ເລີ່​ມຕົ້ນ​ໃນ​ເດືອນ ມິຖຸນາ​ນີ້ ​ໃນ​ສະຖານ​ທີ່​ ພັກຜ່ອນ ທີ່​ສວຍ​ງາມຊຶ່ງ​ຜູ້​ເຂົ້າຮ່ວມ ​ໂຄງການ​ນີ້ຈະ​ສາມາດ ທ່ອງ​ທ່ຽວ ​ແລະ ​ເຂົ້າພັກ ຕາມ​ສະຖານ​ທີ່ຈັດ​ໃຫ້​ໂດຍ​ບໍ່​ຕ້ອງ ເສຍ​ຄ່າໃຊ້​ຈ່າຍ ​ແລະ ບໍ່​ມີ​ການ​ຈຳກັດ ​ສິດທິໃຊ້​ງານ ບໍລິການ​ພິ​ເສດ ​ເຊັ່ນ: ​ຫ້ອງsauna ​ ​ແລະ ຫ້ອງ spa  ​ແບບ​ສ່ວນ​ຕົວ.

ນອກ​ນີ້ ຍັງ​ຈະ​ໄດ້​ຮຽນ​ຮູ້​ກ່ຽວ​ກັບອາຫານ, ການ​​ເບິ່ງ​ແຍງ​ສຸຂະພາບ ​ແລະ ການ​ເຮັດ​ວຽກ​ແບບ​ໃຊ້​ວັດຖຸ ​ທຳ​ມະ​ຊາດ ​ໂດຍ​ຜູ້​ເຂົ້າຮ່ວມ ​ໂຄງການ​ຕ້ອງ​ອະນຸຍາດ​ໃຫ້​ມີ​ການ​ເກັບ​ຮູບ​ຖ່າຍ ​ແລະ ຖ່າຍ​ວິ​ດີ​ໂອ ​ເພື່ອ​ນຳ​ໄປ​ໃຊ້ໃນ​ການ​ໂຄສະນາ ການທ່ອງທ່ຽວ ​ຂອງ ​​ແຟງ​ລັງ. ​ເຈົ້າໜ້າ​ທີ່​ ທາງການ​ ແຟງ​ລັງ ຈະ​ເປີດ​ຮັບ​ສະໝັກ​ ຜູ້​ເຂົ້າ ຮ່ວມໂຄງການ​ນີ້ ໄປ​ຈົນ​ຮອດ​ ວັນ​ທີ 2 ​ເມສາ​ນີ້ ສາມາດ​ສະໝັກ ທາງ​ອິນ​ເຕີ​ເນັດ ຫລື ສາມາດ​ສະໝັກ​ ດ້ວຍ​ຕົວ​ເອງ ຕາມ​ສະຖານທີ່​ ກຳນົດ​ໄວ້.