ແຈ້ງເຕືອນ!! ຜູ້ທີ່ໃຊ້ເສັ້ນທາງຕານມີໄຊ-ຫ້ວຍເຕີຍ-ໂນນສະອາດ ໃຫ້ຫລີກເວັ້ນ ເພາະຈະປັບປຸງປູເບຕົງໜ້າທາງກ້ອງຂົວທາງລົດໄຟ

ວັນທີ 29 ມີນາ 2023 ນີ້, ພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ໄດ້ອອກແຈ້ງການເລກທີ 2910/ຍທຂ.ນວ ເພື່ອແຈ້ງໃຫ້ ປະຊາຊົນ, ພະນັກງານ, ທະຫານ, ຕໍາຫລວດ ແລະ ຜູ້ທີ່ຈະນໍາໃຊ້ເສັ້ນທາງ ຕານມີໄຊ-ຫ້ວຍເຕີຍ-ໂນນສະອາດ, ເມືອງໄຊທານີ ນະຄອນຫລວງວຽງຈັນ ຊາບວ່າ: ຈະໄດ້ມີການປັບປຸງເສັ້ນທາງຈຸດກ້ອງຂົວທາງລົດໄຟ ເຂດບ້ານນາທົ່ມ (ເສັ້ນທາງ ຕານມີໄຊ-ຫ້ວຍເຕີຍ-ໂນນສະອາດ), ເຊິ່ງຈະໄດ້ປັບປຸງດ້ວຍການປູເບຕົງໜ້າທາງກ້ອງຂົວທາງລົດໄຟ.

ເນື່ອງຈາກວ່າຈຸດດັ່ງກ່າວມີສະພາບເປ່ເພ, ມີຄວາມຫຸ້ຍງຍາກແກ່ການສັນຈອນ ແລະ ມີຄວາມສ່ຽງໃນການເກີດອຸບັດຕິເຫດ, ສະນັ້ນຈຶ່ງແຈ້ງມາຍັງທ່ານຜູ້ທີ່ຈະນໍາໃຊ້ເສັ້ນທາງດັ່ງກ່າວໃຫ້ຫລີກເວັ້ນໄປນໍາໃຊ້ເສັ້ນທາງອື່ນໃນຊ່ວງໄລຍະກໍ່ສ້າງ ຫລື ຖ້າມີຄວາມຈໍາເປັນນໍາໃຊ້ເສັ້ນທາງດັ່ງກ່າວກໍໃຫ້ສັນຈອນໄປຕາມປ້າຍ ທີ່ໄດ້ຕິດຕັ້ງໄວ້, ເຊິ່ງຄາດວ່າຈະໃຫ້ເວລາທັງໝົດປະມານ 14 ວັນ (ແຕ່ວັນທີ 29 ມີນາ-11 ເມສາ 2023).

ດັ່ງນັ້ນ, ຈຶ່ງແຈ້ງການມາຍັງທ່ານຜູ້ນໍາໃຊ້ເສັ້ນທາງເພື່ອຊາບ ແລະ ພ້ອມກັນຈັດຕັ້ງປະຕິບັດຕາມແຈ້ງ ການສະບັບນີ້ດ້ວຍ.