ສປປ ລາວ ແລະ ແຂວງ ເສສວນ ສປ ຈີນ ຫາລືດ້ານການຄ້າ-ການລົງທຶນ ເພື່ອສົ່ງເສີມພັດທະນາພື້ນຖານໂຄງລ່າງ ໃຫ້ແກ່ ສປປ ລາວ
ວັນທີ 30 ມີນາ 2023 ທີ່ຫ້ອງຮັບແຂກ ກະຊວງອຸດສາຫະກໍາ ແລະ ການຄ້າ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Yang Xingping ຮອງເຈົ້າແຂວງ ເສສວນ ແລະ ທ່ານຫົວໜ້າພະແນກການຄ້າ ແຂວງ ເສສວນ ແຫ່ງ ສປ ຈີນ ພ້ອມດ້ວຍຄະນະ, ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລືກ່ຽວກັບການເຄື່ອນໄຫວວຽກງານການຮ່ວມມື ລະຫວ່າງ ສປປ ລາວ ແລະ ແຂວງເສສວນ ໃນຕໍ່ໜ້າ.
ໃນການພົບປະຄັ້ງນີ້ ທັງສອງຝ່າຍໄດ້ປຶກສາຫາລືຮ່ວມກັນ ກ່ຽວກັບວຽກງານການຮ່ວມມືຫລາຍດ້ານ ໂດຍສະເພາະ ດ້ານການຄ້າ, ການລົງທຶນ ເພື່ອສົ່ງເສີມພັດທະນາພື້ນຖານໂຄງລ່າງ ໃຫ້ແກ່ ສປປ ລາວ ໃນໄລຍະຜ່ານມາ ແລະ ຕໍ່ໜ້າ ພ້ອມທັງ ແລກປ່ຽນບົດຮຽນກ່ຽວກັບການຍົກລະດັບການຮ່ວມມືດ້ານການຄ້າສອງຝ່າຍ ເປັນຕົ້ນການຊຸກຍູ້ການສົ່ງອອກສິນຄ້າກະສິກຳຂອງລາວ ໄປ ສປ ຈີນໃຫ້ຫລາຍຂຶ້ນ, ການເພີ່ມທະວີການຮ່ວມມືກ່ຽວກັບການຄ້າຂ້າມຊາຍແດນ ແລະ ການອຳນວຍຄວາມສະດວກໃນການຂົນສົ່ງສິນຄ້າຜ່ານແດນ.
ໃນນີ້ການຮ່ວມມືສ່ວນໃຫຍ່ແມ່ນຮູບແບບການຄ້າ ສິນຄ້າຫລັກທີ່ ສປປ ລາວ ສົ່ງອອກໄປຈີນປະກອບມີ: ຄຳປະສົມ, ຄຳແທ່ງ, ໝາກກ້ວຍ, ແຮ່ທອງ, ແຮ່ເຫລັກ, ຜະລິດຕະພັນໄມ້ ແລະ ເຟີນີເຈີ້, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ຝຸ່ນ (ປຸ໋ຍ), ຢາງພາລາ, ຫມາກໄມ້ ແລະ ອື່ນໆ. ສປ ຈີນ ມີການລົງທຶນຟື້ນຖານໂຄງລ່າງເປັນອັນດັບ 1, ເປັນຄູ່ຄ້າອັນດັບ 2 ຂອງ ສປປ ລາວ ຊຶ່ງເຫັນໄດ້ໃນໄລຍະຜ່ານມາ, ມູນຄ່າການຄ້າສອງຝ່າຍຍັງບໍ່ທັນບັນລຸໄດ້ຕາມເປົ້າໝາຍທີ່ວາງໄວ້. ສິນຄ້າການນໍາເຂົ້າ ສ່ວນຫລາຍແມ່ນປະເພດກົນຈັກ-ພາຫະນະລົດຍົນ; ອາໄລ່ລົດຍົນ ແລະ ລົດຈັກ; ເຄື່ອງກໍ່ສ້າງແລະ ອື່ນໆ.
ທ່ານ , Yang Xingping ຮອງເຈົ້າແຂວງໆ ເສສວນ ໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ-ແຂວງເສສວນ ສປ ຈີນ ໃນວຽກງານຫລາຍດ້ານ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.
