ພະແນກຕໍາຫລວດສະກັດກັ້ນ ແລະ ຕ້ານອັກຄີໄພ ປກສ ແຂວງວຽງຈັນ ກຽມພ້ອມໃນການສະກັດກັ້ນ ແລະ ຕ້ານອັກຄີໄພ

ທ່ານ ພັຕ ຄໍານ້ອຍ ສີສຸວົງ ຮອງພະແນກຕໍາຫລວດສະກັດກັ້ນ ແລະ ຕ້ານອັກຄີໄພ ປກສ ແຂວງວຽງຈັນ ລາຍງານ ວັນທີ 29 ມີນາ 2023 ຜ່ານມາ ວ່າ: ການກະກຽມຄວາມພ້ອມທາງດ້ານພາຫະນະອຸປະກອນມອດໄຟ ແລະ ກຳລັງພົນກຽມພ້ອມອອກສູ້ຮົບມອດໄຟຮັບປະກັນໃຫ້ໄດ້ 100%, ດ້ານພາຫະນະແມ່ນໄດ້ບັນຈຸນໍ້າໃສ່ເຕັມຖັງໃນແຕ່ລະຄັນພ້ອມດ້ວຍນໍ້າມັນ, ຖ້າມີເຫດການໄຟໄໝ້ແມ່ນສາມາດອອກດັບມອດໄຟໄດ້ທັນກັບເຫດການ, ດ້ານກຳລັງພົນແມ່ນໄດ້ຜັດປ່ຽນກັນປະຈຳການຄອຍເຫດຕະຫລອດ 24 ຊົ່ວໂມງຢ່າງເຂັ້ມງວດ, ບັນດາ 11 ເມືອງ ທົ່ວແຂວງ ທາງພະແນກສະກັດກັ້ນ ແລະ ຕ້ານອັກຄີໄພ ໄດ້ປະສານສົມທົບກັບໜ່ວຍງານຈາລະຈອນ-ມອດໄຟທີ່ປະຈຳການຢູ່ ເມືອງໃຫ້ເອົາໃຈໃສ່ກວດກາພາຫະນະອຸປະກອນມອດໄຟຂອງຕົນຢູ່ໃນທ່າກຽມພ້ອມຮັບປະກັນໄດ້ 100% ແລະ ກຽມພ້ອມທາງດ້ານກຳລັງພົນປະຈຳການຄອຍເຫດຕະຫລອດ 24 ຊົ່ວໂມງ.

ພ້ອມນັ້ນກໍໄດ້ກຳນົດເປົ້າໝາຍຈຸດຫລໍ່ແຫລມບ່ອນທີ່ມີຄວາມສ່ຽງຕໍ່ກັບການເກີດອັກຄີໄພ ເປັນຕົ້ນແມ່ນຕະຫລາດ, ບ່ອນທີ່ມີຊຸມຊົນແອອັດ, ນອກນີ້ກໍ ຝາກທຸກພາກສ່ວນໃນທົ່ວສັງຄົມ ຈົ່ງໃຫ້ເອົາໃຈໃສ່ເພີ່ມທະວີເປັນເຈົ້າການໃນການເຮັດວຽກງານປ້ອງກັນສະກັດກັ້ນ ແລະ ຕ້ານອັກຄີໄພ, ເພື່ອປົກປັກຮັກສາຊັບສົມບັດຂອງພັກ-ລັດ, ຂອງລວມໝູ່ກໍຄືຂອງບຸກຄົນ ບໍ່ໃຫ້ຕົກເປັນເຫຍື້ອຂອງອັກຄີໄພ, ກ່ອນຈະອອກຈາກເຮືອນໄປທາງໃດຕ້ອງກວດກາຝືນໄຟ ໃຫ້ລະອຽດຄັກແນ່ສາກ່ອນວ່າມີຄວາມປອດແລ້ວຈຶ່ອອກໄປ, ຫ້າມຈູດຂີ້ເຫຍື້ອ, ຈູດປ່າແບບຊະຊາຍ ແລະ ເອົາໃຈໃສ່ກວດກາລະບົບອຸປະກອນເຄື່ອງໃຊ້ໄຟຟ້າຖ້າເຫັນວ່າເກົ່າແກ່, ຊຸດໂຊມ ແມ່ນໃຫ້ປ່ຽນຖ່າຍຢ່າງຮີບດ່ວນ ເພາະຈະເຮັດໃຫ້ລະບົບໄຟຟ້າລັດວົງຈອນເກີດຊ໊ອດ ໄໝ້ຂຶ້ນ ແລະ ການຈູດທູບທຽນບູຊາ ເຊິ່ງເປັນເຫດທີ່ພາໃຫ້ເກີດອັກຄີໄພໄດ້ງ່າຍ.

ຖ້າຫາກມີໄຟໄໝ້ເກີດຂຶ້ນໃຫ້ໂທແຈ້ງເບີໂທ 1190 ຫລື 020 994 72 993 ໄດ້ຕະຫລອດ 24 ຊົ່ວໂມງ.