ສະຫລອງປີໃໝ່ ຕ້ອງແບ່ງນ້ຳໃຈເພື່ອເຮົາເພື່ອໝູ່

ໂດຍ: ທິດກໍ່າ

ວັນທີ 27 ມີນາ 2023 ຜ່ານມາ, ທາງກົມຕໍາຫລວດຈະລາຈອນໄດ້ອອກແຈ້ງການສະບັບເລກທີ 028/ກຈຈ ກ່ຽວກັບເລື່ອງການປ້ອງກັນ, ສະກັດກັ້ນອຸປະຕິເຫດໃນທ້ອງຖະໜົນໄລຍະສະເຫລີມສະຫລອງສົ່ງທ້າຍປີເກົ່າ ຕ້ອນຮັບປີໃໝ່ລາວ ພສ 2566 ເພື່ອໃຫ້ມີຄວາມປອດໄພ ເຊິ່ງເນື້ອໃນແຈ້ງການສະບັບດັ່ງກ່າວໄດ້ລະບຸເຖິງ 15 ຂໍ້ ແລະ ແຕ່ລະຂໍ້ກໍແມ່ນຮຽກຮ້ອງໃຫ້ພໍ່ແມ່ປະຊາຊົນ, ພະນັກງານ, ທະຫານ, ຕໍາຫລວດ ຕະຫລອດເຖິງຜູ້ໃຊ້ລົດໃຊ້ຖະໜົນໃນຂອບເຂດທົ່ວປະເທດຈົ່ງພ້ອມພາກັນປະຕິບັດຢ່າງເຂັ້ມງວດ ເຊິ່ງທັງໝົດທີ່ເວົ້າມາກໍເພື່ອຮັກສາຊີວິດອິນຊີ ແລະ ຊັບສິນຂອງເຮົາເອງ, ຂອງໝູ່ ແລະ ຂອງສັງຄົມ.

ໄປຄຽງຄູ່ກັນນັ້ນ, ສະເພາະຢູ່ນະຄອນຫລວງວຽງຈັນກໍໄດ້ອອກຄໍາສັ່ງຫ້າມເປີດເພງ, ເສບດົນຕຣີເນື່ອງນັນເກີນຂອບເຂດ ອັນເປັນການລົບກວນຄົນໃນຄອບຄົວ ແລະ ເຮືອນຂ້າງຄຽງ. ໃນຄໍາສັ່ງດັ່ງກ່າວກໍລະບຸເຖິງຂໍ້ກໍານົດ ແລະ ມາດຕະການອັນເດັດຂາດວ່າການເສບການຄົນງັນແມ່ນບໍ່ໃຫ້ເກີນ 23:00 ໂມງ ຕ້ອງຢຸດ ຖ້າບຸກຄົນ ຫລື ນິຕິບຸກຄົນຫາກມີການລະເມີດຈະຖືກກ່າວເຕືອນ ແລະ ປັບໄໝໃສ່ໂທດ ຄືຂັ້ນຕົ້ນຈະມີການຕັກເຕືອນ 1 ຄັ້ງ. ຖ້າບໍ່ຟັງຈະປັບໄໝເປັນເງິນແຕ່ 5 ແສນ ຫາ 10 ລ້ານກີບ. ຍິ່ງໄປກວ່ານັ້ນ ຖ້າແມ່ນນິຕິບຸກຄົນຈະຍຶດໃບທະບຽນ, ຖອນໃບອະນຸຍາດດຳເນີນທຸລະກິດໂດຍທັນທີ. ນີ້ມັນກໍເປັນທາງອອກຢ່າງໜຶ່ງໃນການຫລຸດຜ່ອນມົນລະພິດທາງຫາງສຽງລົບກວນເນື່ອງນັນຢູ່ໃນນະຄອນຫລວງວຽງຈັນ ເຊິ່ງຜ່ານມາພວກເຮົາກໍເຄີຍເຫັນ, ເຄີຍໄດ້ຍິນ ແລະ ເຄີຍເວົ້າວ່າກັນມາເກືອບໜາຫູມາຫລາຍປີເຕີບແລ້ວ.

ຢ່າງໃດກໍດີ, ໃນຄໍາສັ່ງດັ່ງກ່າວເພິ່ນກໍບໍ່ໄດ້ເວົ້າລາມໄປຮອດພວກຂີ່ລົດຊິ້ງແຂ່ງກັນໃນຍາມເດິກດື່ນ ອັນນີ້ຍິ່ງລົບກວນ, ສ້າງສຽກອຶກກະທຶກເນື່ອງນັນໃຫ້ບ້ານເຮືອນຄົນທີ່ຢູ່ແຄມທາງຈົນຕົກຜະຫວາຕື່ນສະເດີດ ທັງຢ້ານເຂົ້າເຢສໂມໄລໄປແບບບໍ່ໄດ້ສັ່ງລາ.

ການສະຫລອງສົ່ງທ້າຍປີເກົ່າ ພສ 2565 ຕ້ອນຮັບປີໃໝ່ ພສ 2566 ປີນີ້ຕ້ອງມ່ວນແນ່ນອນ ເພາະໄດ້ພັກເຖິງ 5 ວັນເຕັມ. ຜູ້ມີຖິ່ນກໍາເນີດຢູ່ຕ່າງແຂວງ, ແຖວຊົນນະບົດຫ່າງໄກສອກຫລີກມາຢູ່ນະຄອນຫລວງວຽງຈັນກໍຈະມີໂອກາດໄປຢາມພໍ່ແມ່ພີ່ນ້ອງຍາດມິດສະຫາຍ, ຍາດເວລາໄປທ່ອງທ່ຽວບ່ອນທີ່ຕົນໄດ້ມຸ້ງຫວັງ ທັງໄດ້ເລາະກິນລາບກ້ອຍ, ຕົ້ມເປັດ, ຕົ້ມໄກ່ ມ່ວນຊື່ນຕາມຮີດຄອງປະເພນີຢ່າງອີ່ມໜໍາສໍາລານ.

ເຖິງຢ່າງໃດກໍດີ, ສິ່ງທີ່ຄວນຄໍານຶງເຖິງກໍຄືຄໍາສັ່ງ ແລະ ແຈ້ງການຂອງຂັ້ນເທິງວາງອອກ ເພາະອັນນີ້ຄືຄວາມສະຫງົບຂອງບ້ານເມືອງ ແລະ ໝົດທຸກຄົນ. ອີກສິ່ງໜຶ່ງທີ່ບໍ່ຄວນພາກັນເຮັດນັ້ນຄືກິນດື່ມເມົາແລ້ວອາລະວາດຜິດຖຽງກັນ, ເອົາຂີ້ໝິ້ນໝໍ້ທາໜ້າທາຕາກັນ, ເອົານໍ້າກ້ອນນໍ້າແຂງດຶກແກວ່ງໃສ່ກັນ, ເອົານໍ້າເປິະເປື້ອນມາສາດໃສ່ກັນ ສຸດທ້າຍເກີດຄວາມບໍ່ພໍໃຈມີການຜິດຖຽງກັນ, ມີຜົນກະທົບເຖິງຈິດຫລິ້ນປີໃໝ່ແທນທີ່ຈະໄດ້ບຸນພັດພາກັນໄດ້ບາບ ເພາະສະນັ້ນການມ່ວນຊື່ນສະຫລອງສະຫລອງປີໃໝ່ປີນີ້ຕ້ອງຮູ້ແບ່ງນໍ້າໃຈໃຫ້ກັນເພື່ອເຮົາເພື່ອໝູ່ມັນແມ່ນສົງການບໍ່ແມ່ນສົງຄາມ.