ຝຣັ່ງເຜີຍສະກັດແຜນກໍ່ການຮ້າຍ ໄດ້ 12 ຄັ້ງໃນປີນີ້
ທ່ານ ເມີຣາ ໂກລົງ ລັດຖະມົນຕີປ້ອງກັນປະເທດຝຣັ່ງ ກ່າວວ່າ: ຝຣັ່ງສາມາດສະກັດແຜນກໍ່ການຮ້າຍໄດ້ 12 ຄັ້ງນັບແຕ່ຕົ້ນປີນີ້ ໂດຍເຕືອນວ່າຍັງມີໄພຄຸກຄາມຢູ່ໃນລະດັບສູງ.
ລັດຖະມົນຕີປ້ອງກັນປະເທດຝຣັ່ງ ກ່າວວ່າ: ໃນບັນດາແຜນກໍ່ການຮ້າຍທີ່ບໍ່ໄດ້ເປີດເຜີຍກ່ອນນີ້ ແລະ ເຈົ້າໜ້າທີ່ສະກັດເອົາໄວ້ໄດ້ໃນເດືອນພຶດສະພາ ມີເປົ້າໝາຍຢູ່ສູນເຝິກກອງທັບອາກາດໃນເມືອງຊາລົງເດິໂພຣວອງ, ແຕ່ບໍ່ໄດ້ເປີດເຜີຍລາຍລະອຽດ. ສ່ວນແຜນກໍ່ການຮ້າຍອື່ນໆມຸ່ງເປົ້າໃສ່ຄ້າຍທະຫານ, ສະຖານີຕຳຫລວດ ແລະ ຊຸບເປີມາເກັດ ເຊິ່ງຈະມີການຈັບຕົວປະກັນຖືກສະກັດໄວ້ໄດ້ໃນເດືອນມັງກອນ. ເຖິງຢ່າງໃດກໍຕາມ, ທ່ານ ໂກລົງ ກ່າວກັບຄະນະກຳມະການສະພາຮ່າງກົດໝາຍປາບປາມການກໍ່ການຮ້າຍສະບັບໃໝ່ຂອງລັດຖະບານວ່າ: ໄພຄຸກຄາມຍັງຢູ່ໃນລະດັບສູງ ແລະ ຝຣັ່ງຕ້ອງປ່ຽນວິທີການໃຫ້ຮັບມືກັບການກໍ່ການຮ້າຍໃນປັດຈຸບັນໄດ້. ໃນການສະກັດແຜນກໍ່ການຮ້າຍຫລ້າສຸດທີ່ຝຣັ່ງ ພົບລະເບີດຜະລິດເອງພ້ອມໃຊ້ໃນອາຄານໃກ້ນະຄອນຫຼວງປາຣີໃນອາທິດຜ່ານມາ, ຄະນະກຳມາທິການສະພາຝຣັ່ງພວມພິຈາລະນາກົດໝາຍຕໍ່ຕ້ານກໍ່ການຮ້າຍສະບັບໃໝ່ທີ່ຈະມາໃຊ້ແທນສະບັບເກົ່າໃນວັນທີ 1 ພະຈິກ. ຂະນະທີ່ຝຣັ່ງຍັງຢູ່ໃນປະກາດສະພາບສຸກເສີນນັບແຕ່ກຸ່ມລັດອິດສະລາມ (IS) ໂຈມຕີຝຣັ່ງໃນເດືອນພະຈິກ 2015 ມີຜູ້ເສຍຊີວິດ 130 ຄົນ.
