ພົບຜູ້ເສຍຊີວິດເກືອບ 3 ພັນກວ່າຄົນຈາກເຫດການ ແຜ່ນດິນໄຫວ 6.8 ຣິກເຕີ ທີ່ປະເທດໂມຣົກໂກ

ສຳນັກຂ່າວຕ່າງປະເທດລາຍງານ ຫລ້າສຸດວັນທີ 13 ກັນຍາ 2023 ນີ້ວ່າ: ເຫດການແຜ່ນດິນໄຫວ6.8 ຣິກເຕີ ທີ່ປະເທດໂມຣົກໂກ  ໃນວັນທີ 8 ກັນຍາ 2023 ທີ່ຜ່ານມາ ສ້າງຄວາມເສຍຫາຍຈຳນວນມະຫາສານ ເຮັດໃຫ້ຜູ້ລອດຊີວິດຂາດທີ່ຢູ່ອາໄສ ແລະ ເຕັມໄປດ້ວຍກິ່ນເໝັນຈາກຊາກສັດ ແລະ ຄົນເສຍຊີວິດ.

ປັດຈຸບັນ ພົບສົບຜູ້ເສຍຊີວິດເກືອບ 2.901 ຄົນ,ບາດເຈັບ 5.530 ຄົນ ແຕ່ທາງການຍັງຄາດຄະເນວ່າອາດມີຜູ້ເສຍຊີວິດຫລາຍກວ່າ 3 ພັນຄົນ ມີປະຊາຊົນໄດ້ຮັບຜົນກະທົບ ຫລາຍກວ່າ 3 ແສນຄົນ.

ທາງການໄດ້ລະດົມເຈົ້າໜ້າທີ່ກູ້ໄພຈາກຫຼາຍປະເທດໄດ້ປະສານງານກັນຢ່າງຕໍ່ເນື່ອງ ແລະ ກຳລັງລົງຄົ້ນຫາຜູ້ລອດຊີວິດ ແຕ່ກໍພົບອຸປະສັກຍ້ອນສະພາບບ້ານເຮືອນທີ່ພັງລົງມານັ້ນເປັນອິດ ແລະ ດິນຈີ່.