ສປປ ເກົາຫລີ ເປີດຊາຍແດນຕ້ອນຮັບຊາວຕ່າງປະເທດ ຫລັງປິດມາກວ່າ 3 ປີ
ສື່ກະບອກສຽງຂອງທາງການຈີນລາຍງານວ່າ: ສປປ ເກົາຫລີ ອະນຸຍາດໃຫ້ນັກເດີນທາງຕ່າງປະເທດເຂົ້າປະເທດໄດ້ແລ້ວ ຫລັງປິດຊາຍແດນມາກວ່າ 3 ປີ ເພາະການແຜ່ລະບາດໃຫຍ່ຂອງພະຍາດໂຄວິດ-19.
ວັນທີ 27 ກັນຍາ, ສໍານັກຂ່າວຕ່າງປະເທດລາຍງານວ່າ: ໂດຍອ້າງຂໍ້ມູນຈາກສະຖານີວິທະຍຸໂທລະພາບກາງແຫ່ງປະເທດຈີນ (CCTV) ວ່າ: ສປປ ເກົາຫລີ ອະນຸຍາດໃຫ້ຊາວຕ່າງປະເທດເດີນທາງເຂົ້າມາໃນປະເທດ ນັບແຕ່ວັນທີ 25 ກັນຍາຜ່ານມາ ເຖິງວ່ານັກເດີນທາງຂາເຂົ້າຕ້ອງກັກຕົວເປັນເວລາ 2 ວັນ ຕາມມາດຕະການທາງສາທາລະນະສຸກ, ແຕ່ຖືເປັນການເປີດຊາຍແດນຫລັງປິດໄປກວ່າ 3 ປີ ຈາກວິກິດການແຜ່ລະບາດໃຫຍ່ຂອງພະຍາດໂຄວິດ-19.
ເຖິງຢ່າງໃດກໍຕາມ, ສໍານັກຂ່າວກາງເກົາຫລີ (KCNA) ກະບອກສຽງຂອງລັດຖະບານພຽງຢາງ ຍັງບໍ່ໄດ້ລາຍງານເລື່ອງນີ້ຢ່າງເປັນທາງການ, ເຊັ່ນດຽວກັບກະຊວງການຕ່າງປະເທດຈີນ ເຊິ່ງຍັງສະຫງວນທ່າທີໃນເລື່ອງດັ່ງກ່າວ.
ຢ້ອນກັບໄປເມື່ອທ້າຍເດືອນສິງຫາຜ່ານມາ, ແອໂຄຣຢໍ ສາຍການບິນແຫ່ງຊາດຂອງ ສປປ ເກົາຫລີ ກັບມາໃຫ້ບໍລິການຖ້ຽວບິນທໍາອິດນັບແຕ່ຍຸກໂຄວິດ-19 ໂດຍເດີນທາງຈາກນະຄອນຫລວງພຽງຢາງສູ່ນະຄອນຫລວງປັກກິ່ງ ແລ້ວກັບມາໃຫ້ບໍລິການຖ້ຽວບິນລະຫວ່າງປະເທດ ລະຫວ່າງເມືອງວະລາດິວອສຕອດ ໃນພາກຕາເວັນອອກໄກຂອງຣັດເຊຍ ກັບນະຄອນຫລວງພຽງຢາງ.
