ອີຣັກຈະບໍ່ເຈລະຈາກັບລັດຖະບານເຄີຣດ ເລື່ອງຜົນປະຊາມະຕິແຍກຕົວເປັນເອກະລາດ
ນາຍົກລັດຖະມົນຕີ ໄຮເດີ ອັດ ອາບາດີ ຂອງອີຣັກ ກ່າວວ່າ: ລັດຖະບານອີຣັກຈະບໍ່ຈັດການເຈລະຈາກັບລັດຖະບານເກີດິສຖານກ່ຽວກັບຜົນການລົງປະຊາມະຕິໃນວັນທີ 25 ກັນຍາ ເຊິ່ງຂັດກັບລັດຖະທຳມະນູນໃນການແຍກດິນແດນທາງເໜືອເປັນເອກະລາດຈາກອີຣັກ.
ນາຍົກລັດຖະມົນຕີ ອາບາດີ ຖະແຫລງທາງສະຖານີໂທລະພາບຂອງທາງການອີຣັກ ໃນຄືນວັນທີ 25 ກັນຍາວ່າ: ລັດຖະບານຍັງບໍ່ພ້ອມຫາລື ຫລື ຈັດການເຈລະຈາກ່ຽວກັບຜົນປະຊາມະຕິ ເພາະບໍ່ເປັນໄປຕາມກົດໝາຍລັດຖະທຳມະນູນ. ຂະນະທີ່ທ່ານ ມາຊູດ ບາຊານີ ຜູ້ນຳລັດຖະບານເຂດປົກຄອງຕົນເອງເກີດິສຖານ ກ່າວວ່າ: ການລົງປະຊາມະຕິດັ່ງກ່າວຍັງບໍ່ມີຜົນຜູກພັນໃນທັນທີ ແລະ ເປັນຂະບວນການຕາມກົດໝາຍ ເພື່ອເຈລະຈາກັບລັດຖະບານອີຣັກ ແລະ ປະເທດໃກ້ຄຽງ ວ່າດ້ວຍການແຍກດິນແດນຊາວເຄີຣດອອກຈາກອີຣັກ. ເປັນການຄາດເດົາວ່າ: ປະຊາຊົນຈະໃຫ້ການຕອບຮັບວ່າແມ່ນໃນການລົງປະຊາມະຕິວັນທີ 25 ກັນຍາຂອງເຂດປົກຄອງຕົນເອງເກີດິສຖານ ເພື່ອແຍກດິນແດນຈາກອີຣັກ ແລະ ຈະປະກາດຜົນສະຫລຸບໃນ 72 ຊົ່ວໂມງ.
