ຕຳຫລວດໄທ ຈັບກຸມເຄືອຂ່າຍຕ່າງຊາດໂຄສະນາຂາຍນົມຜົງ ສັບພະຄຸນເກີນຄວາມເປັນຈິງ
ສຳນັກຂ່າວຊ່ອງ7ໄທລາຍງານວ່າ: ວັນທີ 16 ພະຈິກ 2023, ເຈົ້າໜ້າທີ່ຕຳຫລວດຮ່ວມກັບຕົວແທນສຳນັກງານຄະນະກຳມະການອາຫານ ແລະ ຢາ ໄດ້ຖະແຫລງ ການຈັບກຸມ ເຄືອຂ່າຍຕ່າງປະເທດທີ່ໂຄສະນາຂາຍນົມຜົງ ອ້າງສັບພະຄຸນເກີນຄວາມເປັນຈິງ.
ກ່ອນໜ້ານີ້ ເຈົ້າໜ້າທີ່ພົບເວັບໄຊ ທີ່ໂຄສະນາຂາຍຜະລິດຕະພັນນົມຜົງຍີ່ຫໍ້ໜຶ່ງ ເກີນຄວາມເປັນຈິງອ້າງວ່າ ສັບພະຄຸນຂອງນົມຜົງຍີ່ຫໍ໊ນີ້ວ່າ ຊ່ວຍປ້ອງກັນລະບົບຫົວໃຈ ແລະ ຫລອດເລືອດ, ປ້ອງກັນພະຍາດເບົາຫວານ, ເສີມສ້າງສະຕິປັນຍາ, ບັນເທົາອາການປວດຂໍ້, ປວດບ່າໄຫລ່ໄດ້ພາຍໃນ 3 ວັນ, ປ້ອງກັນພະຍາດກະດູກຜ່ອຍ ແລະ ອາການມຶນຊາ ແລະ ອື່ນໆ ຈົນເຮັດໃຫ້ມີຄົນຫລົງເຊື່ອສັ່ງຊື້ມາບໍລິໂພກເປັນຈຳນວນຫລາຍ.
ຈາກນັ້ນ, ເຈົ້າໜ້າທີ່ຈຶ່ງນຳໝາຍຄົ້ນເຮືອນພັກ 2 ແຫ່ງໃນຈັງຫວັດຊົນບູລີ, ສາມາດຢຶດນົມຜົງ ໄດ້ຫລາຍກວ່າ 37.000 ປ໋ອງ ແລະ ຜະລິດຕະພັນອາຫານເສີມ ທີ່ບໍ່ໄດ້ຂຶ້ນທະບຽນເປັນຜະລິດຕະພັນສະໜູນໄພ, ເຄື່ອງມືແພດ ແລະ ອຸປະກອນຕ່າງໆ ອີກ 36.000 ປ໋ອງ ລວມມູນຄ່າຂອງກາງຫລາຍກວ່າ 40 ລ້ານບາດ.
ລວມສິນຄ້າຢຶດໄດ້ມີ 11 ຍີ່ຫໍ້ຄື:
- OVISURE GOLD
- Digo sure
- Zextra Sure
- Via Sure
- Canxi Hevisure gold
- GluOats
- Gluzextra Gold
- HIUP COMPLETE
- Sica sure canxi wemee
- Pro up
- Hevifood Body fit
ຈາກການກວດສອບສວນພົບວ່າ ກຸ່ມຜູ້ຕ້ອງຫາໄດ້ຕັ້ງເປັນເຄືອຂ່າຍ ແລະ ມີນາຍທຶນມາຈາກຫວຽດນາມຢູ່ເບື້ອງຫລັງ, ເມື່ອມີຜູ້ສັ່ງຊື້ແອັດມິນເພຈຈະສົ່ງຂໍ້ມູນໃຫ້ເພື່ອບັນຈຸ ແລະ ສົ່ງໃຫ້ລູກຄ້າ, ນອກນັ້ນຍັງໄດ້ຈັບພະນັກງານສັນຊາດຫວຽດນາມ 8 ຄົນ ມາດຳເນີນຄະດີໃນຂໍ້ຫາ ຮ່ວມກັນຈຳໜ່າຍຜະລິດຕະພັນອາຫານທີ່ສະແດງສະຫລາກບໍ່ຖືກຕ້ອງ, ຮ່ວມກັນຂາຍຢາແຜນປັດຈຸບັນໂດຍບໍ່ໄດ້ຮັບອະນຸຍາດ ແລະ ເປັນຄົນຕ່າງດ້າວທີ່ປະກອບອາຊີບໂດຍບໍ່ໄດ້ຮັບອະນຸຍາດ.
