ນາຍົກລັດຖະມົນຕີ ເນັ້ນໃຫ້ແຂວງຜົ້ງສາລີ ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ

ໃນໂອກາດທີ່ ທ່ານ ສອນໄຊ ສີພັນດອນ ນາຍົກລັດຖະມົນຕີ, ຫົວໜ້າຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງ ເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງ ປະເທດ (ຫົວໜ້າຄະນະສະເພາະກິດ 19/ກມສພ) ພ້ອມຄະນະເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ວັນທີ 30 ພະຈິກ 2023 ຜ່ານມາ, ເຊິ່ງທ່ານນາຍົກ ໂອລົມ ແລະ ມີຄຳເຫັນເນັ້ນໃຫ້ການນຳແຂວງ, ເມືອງ ແລະ ພາກສ່ວນທີ່ກ່ຽວຂ້ອງສືບຕໍ່ສຸມໃສ່ວຽກງານຈຳນວນໜຶ່ງ ເປັນຕົ້ນ ສືບຕໍ່ເອົາໃຈໃສ່ນຳພາ-ຊີ້ນໍາ ວຽກງານປ້ອງກັນຊາດ-ປ້ອງກັນຄວາມສະຫງົບ, ຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ ໃຫ້ມີຄວາມສະຫງົບ; ເອົາໃຈໃສ່ວຽກງານປັບປຸງກໍ່ສ້າງສະມາຊິກພັກ ໃຫ້ມີແນວຄິດໜັກແໜ້ນເຂັ້ມແຂງ, ຫັນຈາກແນວຄິດ ແລະ ຄວາມເຊື່ອຖືທີ່ເປັນການກົດໜ່ວງຖ່ວງດຶງການພັດທະນາ ໄປສູ່ອັນໃໝ່ທີ່ກ້າວໜ້າ ແລະ ເປັນເຈົ້າການກວ່າເກົ່າ; ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໃຫ້ມີຜົນສຳເລັດຕາມແຜນທີ່ກຳນົດໄວ້.

ພ້ອມນີ້ກໍສືບຕໍ່ຊຸກຍູ້ການສ້າງພື້ນຖານການຜະລິດ ໃນຂົງເຂດອຸດສາຫະກໍາ, ກະສິກໍາ, ຫັດຖະກໍາ ທີ່ເປັນທ່າແຮງຂອງແຂວງ ໂດຍສະເພາະ ການປູກຊາ, ອ້ອຍ ແລະ ການບໍລິການຕ່າງໆ ໃຫ້ແຂງແຮງກວ່າເກົ່າ; ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໂດຍຖືເອົາວຽກງານຫັນລົງກໍ່ສ້າງຮາກຖານການເມືອງ, ສ້າງຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບວຽກງານ 3 ສ້າງ ໃຫ້ເປັນຂະບວນຟົດຟື້ນກວ້າງຂວາງ; ເພີ່ມທະວີຄວາມເອົາໃຈໃສ່ ຊຸກຍູ້ການເກັບລາຍຮັບຢູ່ບັນດາດ່ານຊາຍແດນ, ປັບປຸງການຄຸ້ມຄອງດ່ານ ແລະ ບຸກຄະລາກອນ ໃຫ້ແທດເໝາະ ຕາມທິດຫັນເປັນທັນສະໄໝ, ໂປ່ງໃສ, ມີຄວາມສະດວກ, ວ່ອງໄວ, ຫລຸດຜ່ອນຂັ້ນຂອດທີ່ບໍ່ຈໍາເປັນ ແລະ ດໍາເນີນຂັ້ນຕອນອະນຸມັດໂຄງການໃຫ້ໄວ; ເພີ່ມທະວີດຶງດູດການລົງທຶນ ທີ່ມີຄຸນນະພາບໃຫ້ຫລາຍຂຶ້ນ. ພ້ອມນັ້ນ, ການຊຳລະໃຫ້ແກ່ນໍາເຂົ້າ-ສົ່ງອອກສິນຄ້າ ແລະ ການນໍາເຂົ້າທຶນ ຕ້ອງຜ່ານລະບົບທະນາຄານ; ຄຸ້ມຄອງການເຄື່ອນໄຫວທາງການເງິນ ຂອງທະນາຄານທຸລະກິດ ໃຫ້ມີຄວາມໂປ່ງໄສ; ສຸມໃສ່ແກ້ໄຂບັນຫາການແລກປ່ຽນເງິນຕານອກລະບົບ, ຮັບປະກັນສະຖຽນລະພາບທາງດ້ານການເງິນ ໂດຍນໍາໃຊ້ມາດຕະການຕ່າງໆຢ່າງເຂັ້ມງວດ, ເດັດຂາດຕໍ່ຜູ້ລະເມີດ ແລະ ກະທໍາຜິດກົດໝາຍ, ລວມທັງ ຜູ້ສວຍໃຊ້ໜ້າທີ່ຫາຜົນປະໂຫຍດແບບບໍ່ຊອບທໍາ ໂດຍບໍ່ມີການຍົກເວັ້ນ; ສືບຕໍ່ຂຶ້ນທະບຽນ ແລະ ຄຸ້ມຄອງຜູ້ນໍາເຂົ້າ-ສົ່ງອອກ, ແກ້ໄຂການຫລົບຫລີກເສຍພາສີ ແລະ ອື່ນໆ; ເອົາໃຈໃສ່ຊຸກຍູ້ ການປັບປຸງແກ້ໄຂຂັ້ນຂອດການບໍລິການ ໃຫ້ສະດວກ, ວ່ອງໄວ; ຄົ້ນຄວ້າກຳນົດຄ່າບໍລິການຢູ່ສາງຄ່ຽນຖ່າຍສິນຄ້າ ຢ່າງສົມເຫດສົມຜົນ; ສຳລັບບັນດາຂໍ້ສະເໜີຂອງແຂວງ ມອບໃຫ້ບັນດາກະຊວງ-ອົງການ ທີ່ກ່ຽວຂ້ອງ ນຳໄປຄົ້ນຄວ້າຕາມຂັ້ນຕອນ ແລະ ລະບຽບການ ແລ້ວລາຍງານລັດຖະບານ ເພື່ອພິຈາລະນາ.

ນອກນີ້, ທ່ານ ນາຍົກ ໄດ້ມອບເຄື່ອງໃຊ້ຫ້ອງການ ແລະ ງົບປະມານຈຳນວນໜຶ່ງໃຫ້ແຂວງ ເພື່ອນຳໃຊ້ເຂົ້າໃນວຽກງານທີ່ຈຳເປັນ ໃນການຈັດຕັ້ງປະຕິບັດວຽກງານພາຍໃນແຂວງໃຫ້ມີຜົນສໍາເລັດ ແລະ ເກີດປະໂຫຍດສູງ ຕໍ່ການພັດທະນາເສດຖະກິດ-ສັງຄົມຂອງແຂວງ ກໍຄື ຕໍ່ປະເທດຊາດ ແລະ ປະຊາຊົນ.