ຈັບຊາຍໜຸ່ມສອງຄົນ ທີ່ຄ້າ-ຂາຍຢາເສບຕິດ ພ້ອມຢຶດຢາ ແລະ ຄໍລະເຈັນ ຈຳນວນໜຶ່ງ

ວັນທີ 27 ພະຈິກ 2023, ເຈົ້າໜ້າທີ່ພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ແຂວງຄຳມ່ວນໄດ້ຮັບລາຍງານວ່າ : ຈະມີການຄ້າຂາຍຢາເສບຕິດ ຢູ່ຂອບເຂດ ບ້ານ ດົງມ່ວງໄຂ່ ເມືອງທ່າແຂກ  ພາຍຫຼັງໄດ້ຮັບການລາຍງານແລ້ວ ທາງເຈົ້າໜ້າທີ່ຕຳຫຼວດວິຊາສະເພາະ ຈຶ່ງໄດ້ນຳກຳລັງລົງກວດກາຕິດຕາມສະຖານທີ່ດັ່ງກ່າວ ແລະ ໄດ້ກັກຕົວຜູ້ຖືກຫາ 1 ຄົນ ພ້ອມຂອງກາງຢາບ້າ 2.140 ກວ່າເມັດ ພ້ອມທັງນຳເອົາຜູ້ຖືກຫາ ມາດຳເນີນການສືບສວນ – ສອບສວນ.

ຜ່ານການສືບສວນ – ສອບສວນ ຈຶ່ງຮູ້ວ່າ: ຜູ້ຖືກຫາຊື່ ທ້າວ ບຸນມາ ຫຼື ຂຽວ ອາຍຸ 36 ປີ ປະຊາຊົນ ຢູ່ບ້ານຜາທຸງ ເມືອງຍົມມະລາດ ແຂວງຄຳມວ່ນ, ຜູ້ກ່ຽວຮັບສາລະພາບວ່າ: ຢາບ້າຈຳນວນດັ່ງກ່າວໄດ້ຊື້ມາຈາກ ທ້າວ ຄຳໄຊ ຫຼື ຕົ້ນ ປະຊາຊົນ ຢູ່ບ້ານຫ້ວຍເຢັນ ເມືອງຍົມະລາດ ແລະຕໍ່ມາທາງເຈົ້າໜ້າທີ່ຕຳຫຼວດວິຊາສະເພາະຈຶ່ງໄດ້ປະສານສົບທົບກັບ ເຈົ້າໜ້າທີ່ຕຳຫຼວດ ປກສ ເມືອງຍົມມະລາດ ເຂົ້າກັກຕົວ ທ້າວ ຄຳໄຊ ຈັນທະລັງສີ ຫຼື ຕົ້ນ ຢູ່ທີ່ເຮືອນຂອງຜູ້ກ່ຽວ ພ້ອມທັງກວດຄົ້ນເຮືອນ ພົບເຫັນ ຢາບ້າ 3.000 ເມັດ ແລະ ຄໍລະເຈັ່ນອີກ 62 ຊອງ. ດັ່ງນັ້ນທາງເຈົ້າໜ້າທີ່ຕຳຫຼວດຈຶ່ງໄດ້ນຳຕົວທ້າວ ຄຳໄຊ ຫຼື ຕົ້ນ ມາດຳເນີນຄະດີຕາມລະບຽບກົດໝາຍ.