ຕຳຫລວດດ່ານ ຕມ ລາວ-ຈີນ ກວດກາລາດຕະເວນເສັ້ນຊາຍແດນໃຫ້ມີຄວາມສະຫງົບປອດໄພ ແລະ ເຜີຍແຜ່ລະບຽບການເຂົ້າ-ອອກເມືອງ

ວັນທີ 11 ທັນວາ 2023, ເຈົ້າໜ້າທີ່ຕຳຫລວດດ່ານ ຕມ ສາກົນລານຕຸ້ຍ, ເມືອງຍອດອູ, ເເຂວງຜົ້ງສາລີ ຮ່ວມກັບເຈົ້າໜ້າທີ່ດ່ານເມືອງຄຳ ສປ ຈີນ ໂຄສະນາເຜີຍແຜ່ລະບຽບການເຂົ້າ-ອອກເມືອງຂອງປະຊາຊົນລາວ ແລະ ປະຊາຊົນຈີນຢູ່ລຽບຕາມຊາຍແດນຂອງສອງປະເທດ.

ການລົງເຄື່ອນໄຫວໃນຄັ້ງນີ້, ໄດ້ໂຄສະນາກົດໝາຍວ່າດ້ວຍການລົງໂທດຕໍ່ຜູ້ລະເມີດທີ່ຫຍໍ້ມາຈາກກົດໝາຍວ່າດ້ວຍການເຂົ້າ-ອອກເມືອງ. ພ້ອມນີ້ຍັງໄດ້ຮ່ວມກັນກວດກາລາດຕະເວນຕາມຂອບເຂດເສັ້ນຊາຍແດນທີ່ຂຶ້ນກັບຄວາມຮັບຜິດຊອບຂອງສອງດ່ານ, ໂດຍອີງໃສ່ບົດບັນທຶກການຮ່ວມມືລະຫວ່າງສອງດ່ານ ອາທິດລະ 1 ຄັ້ງ. ທັງນີ້ກໍເພື່ອເຮັດໃຫ້ການເຂົ້າ-ອອກເມືອງຂອງປະຊາຊົນສອງປະເທດມີຄວາມຖືກຕ້ອງ, ເປັນລະບຽບຮຽບຮ້ອຍ ແລະ ເພື່ອເຮັດໃຫ້ລຽບຕາມຊາຍແດນມີຄວາມສະຫງົບປອດໄພ.