ຍີ່ປຸ່ນໃຫ້ການຊ່ວຍເຫລືອລ້າ ສຳລັບປັບປຸງສະໜາມກິລາເຈົ້າອະນຸວົງ ມູນຄ່າ 4.171 ຕື້ເຢັນ ປະມານ 600 ກວ່າຕື້ກີບ

ວັນທີ 26 ທັນວາ 2023, ການເຊັນສັນຍາຮັບເອົາການຊ່ວຍເຫລືອລ້າຈາກລັດຖະບານຍີ່ປຸ່ນ ປະຈຳປີ 2023 ສໍາລັບ ໂຄງການປັບປຸງສະໜາມກິລາເຈົ້າອະນຸວົງ (“the Project for Reconstruction of the Chao Anou Vong Stadium”) ມູນຄ່າ 4ຕື້ກວ່າເຢັນ ຫຼື ປະມານ 29 ລ້ານກວ່າໂດລາສະຫະລັດ. ຕາງໜ້າໃຫ້ແກ່ລັດຖະບານ ສປປ ລາວ ລົງນາມ ໂດຍທ່ານ ນາງ ສີສົມບູນ ອຸນາວົງ ຫົວ ໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ ແລະ ຕາງໜ້າໃຫ້ລັດຖະບານຍີ່ປຸ່ນ ແມ່ນທ່ານ NAGASE Toshio ຫົວໜ້າອົງການຮ່ວມມືສາກົນຍີ່ປຸ່ນ (JICA) ປະຈໍາ ສປປ ລາວ.

ສຳລັບ ໂຄງການປັບປຸງສະໜາມກິລາເຈົ້າອະນຸວົງ ຈະເລີ່ມຈັດຕັ້ງປະຕິບັດນັບແຕ່ເດືອນມັງກອນ 2024 ໄປຈົນເຖິງເດືອນກັນຍາ 2026 ຈຸດປະສົງຂອງໂຄງການ ແມ່ນເພື່ອເລັ່ງໃສ່ປັບປຸງສະໜາມກິລາເຈົ້າອະນຸວົງ ໂດຍການສ້າງສະໜາມກິລາໃໝ່ ສິ່ງອຳນວຍຄວາມສະດວກເປັນຕົ້ນແມ່ນ ການອອກແບບທີ່ບໍ່ມີສິ່ງກີດຂວາງ ແລະ ການປັບປຸງເລື່ອງຄວາມປອດໄພຕ່າງໆ.