ເອດີບີຊີ້ເສດຖະກິດລາວຈະສືບຕໍ່ຂະຫຍາຍຕົວໃນລະດັບ 7%
ກອງປະຊຸມເຜີຍແຜ່ບົດລາຍງານການຄາດຄະເນການພັດທະນາໃນອາຊີ ປະຈຳປີ 2017 ສະບັບປັບປຸງ ໄດ້ຈັດຂຶ້ນໃນວັນທີ 29 ກັນຍານີ້ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ຢຸຊຸຊິ ເນກິຊິ ຜູ້ຕາງໜ້າທະນາຄານພັດທະນາອາຊີປະຈຳລາວ, ມີບັນດາພາກສ່ວນກ່ຽວຂ້ອງ ແລະ ສື່ມວນຊົນເຂົ້າຮ່ວມ.
ຜູ້ຕາງໜ້າທະນາຄານພັດທະນາອາຊີ ໄດ້ໃຫ້ຮູ້ວ່າ: ການຂະຫຍາຍຕົວທາງດ້ານເສດຖະກິດຂອງລາວຈະໄປຕາມທິດທາງທີ່ຄາດຄະເນໄວ້ໃນເດືອນເມສາຜ່ານມາໃນລະດັບ 6,9% ໃນປີ 2017, ເຖິງວ່າຕົວເລກການຂະຫຍາຍຕົວໄດ້ຫລຸດລົງເລັກນ້ອຍໃນໄລຍະເຄິ່ງປີ, ໂດຍຂະຫຍາຍຕົວພຽງແຕ່ 6,8%, ຊຶ່ງການຂະຫຍາຍຕົວຂອງເສດຖະກິດໃນປີ 2017 ແມ່ນໄດ້ຮັບແຮງຍູ້ໜູນອັນສຳຄັນຈາກການສົ່ງອອກກະແສໄຟຟ້າ, ບັນດາໂຄງການກໍ່ສ້າງພື້ນຖານໂຄງລ່າງລະດັບໃຫຍ່, ພ້ອມທັງການເພີ່ມຂຶ້ນຂອງການຜະລິດພືດຜັກທັນຍາຫານ ເພື່ອເປັນສິນຄ້າໃນການສົ່ງອອກ ແລະ ຕາມບົດລາຍງານເສດຖະກິດປະຈຳປີຂອງເອດີບີ ຄາດວ່າລວມຍອດມູນຄ່າຜະລິດຕະພັນພາຍໃນ (GDP) ຈະຂະຫຍາຍຕົວ 7% ໃນປີ 2018.
ບົດລາຍງານດັ່ງກ່າວ ໄດ້ລະບຸວ່າ: ໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ການກໍ່ສ້າງບັນດາໂຄງການພະລັງງານໄຟຟ້າ ລວມທັງໂຄງການພະລັງງານໄຟຟ້າໄຊຍະບູລີ, ໄດ້ກະຕຸ້ນໃຫ້ເກີດກິດຈະການດ້ານເສດຖະກິດພິເສດ ແລະ ເຂດເສດຖະກິດສະເພາະ, ພ້ອມທັງການຜະລິດຕ່າງໆເພື່ອສົ່ງອອກເປັນສິນຄ້າ, ຊຶ່ງພາຍໃນປີນີ້ກະສິກຳແມ່ນຂະແໜງໜຶ່ງທີ່ຂະຫຍາຍຕົວຕໍ່ເນື່ອງ, ເນື່ອງຈາກການຜະລິດເຂົ້າ ແລະ ພືດຜັກ ເພື່ອເປັນສິນຄ້າແມ່ນໄດ້ຮັບຜົນດີຕໍ່ເນື່ອງຈາກອາກາດທີ່ອຳນວຍ, ສ່ວນອັດຕາການຂະຫຍາຍຕົວຂອງຂະແໜງບໍລິການແມ່ນຫລຸດລົງເລັກນ້ອຍ, ພາຍຫລັງຕົວເລກນັກທ່ອງທ່ຽວເຂົ້າມາທ່ຽວຫລຸດລົງປະມານ 9,8% ພາຍໃນເຄິ່ງປີ ແລະ ອັດຕາການຂະຫຍາຍຕົວຂອງຂະແໜງອຸດສາຫະກຳຍັງຄົງໂຕ, ເຖິງວ່າໄດ້ມີການສົ່ງອອກແຮ່ທາດເພີ່ມຂຶ້ນໃນອັດຕາ 14,5% ແຕ່ການຂະຫຍາຍຕົວທີ່ເຊື່ອງຊ້າໃນບັນດາຕະຫລາດສາກົນ ເຮັດໃຫ້ຜົນລວມຍອດຢູ່ໃນລະດັບທີ່ຄົງທີ່, ພ້ອມນີ້ ອັດຕາການຂາດດຸນຊຳລະຄາດວ່າຈະຫລຸດລົງຈາກອັດຕາທີ່ໄດ້ຄາດການໄວ້ ແລະ ອັດຕາການຂາດດຸນງົບປະມານຈະກັບມາຂາດດຸນເພີ່ມອີກໃນປີ 2018 ແຕ່ຈະຂາດດຸນໜ້ອຍກວ່າອັດຕາທີ່ໄດ້ຄາດການໄວ້ກ່ອນໜ້ານີ້, ເນື່ອງຈາກການນຳເຂົ້າເຄື່ອງຈັກ ແລະ ອຸປະກອນກໍ່ສ້າງ, ພ້ອມນີ້ ປະລິມານຂອງການນຳໃຊ້ເຊື້ອໄຟ ສະໜອງໃຫ້ແກ່ໂຄງການກໍ່ສ້າງເສັ້ນທາງລົດໄຟ ແລະ ໂຮງຈັກຜະລິດໄຟຟ້າເພີ່ມຂຶ້ນອີກ 7 ແຫ່ງ.
