ລັດຖະມົນຕີ ກຊສ ຊີ້ນຳໃຫ້ເມືອງລ້ອງຊານ ຂຶ້ນທະບຽນອອກໃບຕາດິນໃຫ້ສຳເລັດຕາມແຜນ

ວັນທີ 6 ກຸມພາ 2024, ທ່ານ ນາງ ບຸນຄໍາ ວໍລະຈິດ ລັດຖະມົນຕີກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ), ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງລ້ອງຊານ, ແຂວງ ໄຊສົມບູນ, ໂດຍທີ່ທ່ານ ລັດຖະມົນຕີ ກຊສ ໄດ້ເນັ້ນໃຫ້ຫ້ອງການ ຊສ ເມືອງລ້ອງຊານຕ້ອງສືບຕໍ່ສູ້ຊົນຂຶ້ນທະບຽນອອກໃບຕາດິນໃຫ້ປະຊາຊົນພາຍໃນເມືອງໃຫ້ສຳເລັດຕາມແຜນ, ສືບຕໍ່ໂຄສະນາເຜີຍແຜ່ນິຕິກຳຂອງຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ, ເອົາໃຈໃສ່ວຽກງານ ຂຽວສະອາດ ງາມຕາ ພາຍໃນເມືອງ ເປັນຕົ້ນ ການຫລຸດຜ່ອນການນຳໃຊ້ ຖົງຢາງປລາສຕິກ ເພື່ອເປັນການປະກອບສ່ວນຫລຸດຜ່ອນໂລກຮ້ອນ.

ໃນປີ 2023ຜ່ານມາ ທົ່ວເມືອງລ້ອງຊານສາມາດຂຶ້ນທະບຽນອອກໃບຕາດິນໄດ້ 500 ຕອນ ປະຕິບັດໄດ້ພຽງແຕ່ 33% ຂອງແຜນການປີ, ປະກອບສຳນວນອອກໃບຕາດິນໄດ້ 1.054 ຕອນ, ອອກເອກະສານສິດນຳໃຊ້ທີ່ດິນໄດ້ 108 ຕອນ, ມີເນື້ອທີ 447.980 ເຮັກຕາ, ຂຶ້ນສໍາມະໂນຕອນດິນໄດ້ 593 ຕອນ, ອອກໃບຢັ້ງຢືນທຸລະກິດຄອບຄົວໄດ້ 28 ກິດຈະການ, ຕິດຕາມວຽກງານສິ່ງແວດລ້ອມສຳລັບທຸລະກິດຄົວເຮືອນໄດ້ 25 ຄັ້ງ, ມີ 62 ກິດຈະການ, ລົງກວດກາປະເມິີນການນຳໃຊ້ນໍ້າ ແລະ ຕິດຕາມສະພາບອຸຕຸນິຍົມ ແລະ ອຸທົກກະສາດຕະຫລອດປີ.