ປີ 2023 ເມືອງປາກງື່ມ ມີປະກົດການຫຍໍ້ທໍ້ເກີດຂຶ້ນ 300 ກວ່າເລື່ອງ ຫລາຍກວ່າໝູ່ແມ່ນບັນຫາຢາເສບຕິດ

ວັນທີ 9 ກຸມພາ 2024, ພັທ ຄຳຈັນ ສີວົງສາ ຮອງຫົວໜ້າກອງບັນຊາການ ປກສ ເມືອງປາກງື່ມ ລາຍງານໃນກອງປະຊຸມສະຫລຸບວຽກງານປະຈໍາປີ 2023 ແລະ ທິດທາງແຜນການປີ 2024 ວ່າ: ປີ 2023 ທົ່ວເມືອງປາກງື່ມ ມີປາກົດການຫຍໍ້ທໍ້ເກີດຂຶ້ນທັງໝົດ 308 ເລື່ອງ, ແກ້ໄຂຄະດີໄດ້ 106 ເລື່ອງ, ກັກຕົວຜູ້ຖືກຫາ 350 ຄົນ ຍິງ 46 ຄົນ, ທຽບໃສ່ປີທີ່ຜ່ານມາ ເພີ່ມຂຶ້ນ 32 ເລື່ອງ, ໃນນັ້ນຫລາຍກວ່າໝູ່ແມ່ນບັນຫາຢາເສບຕິດ 159 ເລື່ອງ, ກັກຕົວຜູ້ກະທຳຜິດ 193 ຄົນ ຍິງ 40 ຄົນ, ຢຶດຂອງກາງຢາເສບຕິດ ປະເພດຢາບ້າໄດ້ 400.000 ກວ່າເມັດ, ຢາໄອສ໌ 30 ກຣາມ, ລົດໃຫຍ່ 9 ຄັນ, ລົດ ຈັກ 22 ຄັນ, ໂທລະສັບ 23 ໜ່ວຍ, ປືນສັ້ນ 1 ກະບອກ; ຮອງລົງມາແມ່ນຄະດີອາຊະຍາກຳ 114 ເລື່ອງ, ບັນຫາຄາດຕະກໍາ, ລັກຊັບພົນລະເມືອງ, ແຈ້ງຄວາມ 32 ເລື່ອງ, ສໍ້ໂກງຊັບ, ຊື້ຊັບຜິດກົດໝາຍ, ທຳມິດສະຈານ, ກະທຳຊຳເລົາ ແລະ ທຳຮ້າຍຮ່າງກາຍ.