ປີ 2023 ອັດຕະປື ກວດພົບພະນັກງານສວຍໃຊ້ໜ້າທີ່ຕຳແໜ່ງ, ຮັບ-ໃຫ້ ສິນບົນ ແລະ ຖືກປະຕິບັດວິໄນທັງໝົດ 28 ຄົນ

  ໃນປີ 2023 ຜ່ານມາ ອົງການກວດກາ ພັກ-ລັດ ແຂວງອັດຕະປື ກວດພົບເຫັນມີພະນັກງານສະມາຊິກພັກຈຳນວນໜຶ່ງເສື່ອມຄຸນປ່ຽນທາດ, ສວຍໃຊ້ໜ້າທີ່ຕຳແໜ່ງ, ຮັບ ແລະ ໃຫ້ສິນບົນ, ສະແຫວງຫາຜົນປະໂຫຍດ, ຄຸນສົມບັດຄວາມສັດຊື່ສຸດຈະລິດມີໜ້ອຍ, ຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບການມອບໝາຍບໍ່ສູງ ແລະ ມີພະນັກງານສະມາຊິກພັກຖືກສຳຫລວດກວດກາ ພ້ອມທັງ ປະຕິບັດວິໄນທັງໝົດ 28 ສະຫາຍ ຄື: ຕຳນິຕິເຕອືນແລະກ່າວເຕືອນຄວາມຜິດ 23 ສະຫາຍ, ໂຈະຮ່ວມຊີວິດພັກ 1 ສະຫາຍ, ເອົາອອກຈາກພັກ 4 ສະຫາຍ, ພ້ອມນີ້ ພວມສືບຕໍ່ດຳເນີນຄົ້ນຄວ້າວິໄນຕໍ່ກັບສະມາຊິກພັກຈຳນວນໜຶ່ງ. ຕົວເລກທັງໝົດນີ້ ແມ່ນການລາຍງານຢູ່ກອງປະຊຸມສະຫລຸບວຽກງານກວດກາທົ່ວແຂວງປະຈຳປີ 2023 ແລະ ຜ່ານທິດທາງແຜນການປີ 2024 ທີ່ດຳເນີນໄປໃນວັນທີ 13 ກຸມພາ 2024,ໂດຍການ ເຂົ້າຮ່ວມເປັນປະທານຂອງ ພົນໂທ ວັນທອງ ກອງມະນີ ເຈົ້າແຂວງອັດຕະປື.

    ຕະຫລອດໄລຍະຜ່ານມາອົງການກວດກາລັດແຂວງໄດ້ເອົາໃຈໃສນໍາພາ-ຊີ້ນໍາ ການເຄື່ອນໄຫວວຽກງານກວດກາລັດຕາມພາລະບົດບາດຂອງຕົນດ້ວຍຄວາມຮັບຜິດຊອບສູງ, ເປັນຕົ້ນແມ່ນໄດ້ສຸມໃສ່ການຮັບສ່ອງແສງລາຍງານການຈາກຂະແໜງກວດກາລັດ ແລະ ຜູ້ທີ່ເຮັດວຽກງານກວດກາລັດບັນດາພະແນກການ, ອົງການອ້ອມຂ້າງແຂວງເປັນປົກກຕິ ເພື່ອເປັນທິດທາງໃນການເສີມຂະຫຍາຍດ້ານດີີທີ່ຕັ້ງໜ້າ ແລະ ຊອກທິດທາງແກ້ໄຂບັນຫາອ່ອນ, ຂໍ້ຄົງຄ້າງໃນການຈັດຕັ້ງປະຕິບັດຕົວຈິງໃຫ້ສ່ອດຄ່ອງຕາມພາລະບົດບາດ, ສິດ ແລະ ໜ້າທີ່ຂອງຕົນ.