ເມື່ອເຈັບຄໍຢ່າຊື້ຢາມາກິນເອງ

ໃນຍາມສະພາບອາກາດປ່ຽນແປງຕະຫລອດ ອາດສົ່ງຜົນຕໍ່ສຸຂະພາບເຈັບປ່ວຍເປັນໄຂ້, ເປັນຫວັດໄດ້ງ່າຍ ໂດຍຈະມີອາ ການເຈັບຄໍ, ນຳ້ມູກໄຫລ, ໄອ, ມີຂີ້ກະເທີ່ ຫລື ອາດມີໄຂ້ຮ່ວມນຳ ແລະ ເມື່ອມີອາການເຫລົ່ານີ້ ຄົນສ່ວນຫລາຍມັກເຂົ້າໃຈວ່າຕ້ອງກິນຢາປິ່ນປົວ ເຊິ່ງເປັນຄວາມເຂົ້າໃຈທີ່ບໍ່ຖືກຕ້ອງ, ແຕ່ຄວນມີຄວາມຮູ້ກ່ອນວ່າອາການໄຂ້ຫວັດ, ເຈັບຄໍທີ່ເປັນນັ້ນມີສາເຫດມາຈາກອັນໃດ ເນື່ອງຈາກສ່ວນຫລາຍໄຂ້ຫວັດ, ເຈັບຄໍ ປະມານ 80% ມັກເກີດຈາກເຊື້ອໄວຣັສ ບໍ່ຕ້ອງກິນຢາປິ່ນປົວ ມີພຽງສ່ວນໜ້ອຍ 20% ທີ່ອາດເກີດຈາກເຊື້ອແບັກທີເຣຍ ແລະ ອາດຈຳເປັນຕ້ອງໄດ້ຮັບຢາປິ່ນປົວ.

ວິທີການເບື້ອງຕົ້ນໃນການໄຈ້ແຍກລະຫ່ວາງການຕິດເຊື້ອໄວຣັສ ແລະ  ເຊື້ອແບັກທີເຣຍ.

– ຫາກເປັນຫວັດ, ເຈັບຄໍ ຈາກເຊື້ອໄວຣັສ : ມັກມີອາການຕັນດັງນຳ້ມູກໄຫລ, ໄອ, ມີຂີ້ກະເທີ່, ສຽງແຫບ, ຄັນຄໍ, ເຈັບຄໍ ຫລື ອາດມີໄຂ້ຮ່ວມນຳ ອາດດົນປະມານ 7 – 14 ມື້ ອາການຈະຫລາຍສຸດໃນໄລຍະມື້ທີ 3 – 5 ຫລັງຈາກນັ້ນ ອາການໂດຍລວມຈະຄ່ອຍໆດີຂຶ້ນ  ນຳ້ມູກຈະໜ້ອຍລົງ ແລະ ຂຸ້ນຂຶ້ນ ບາງເທື່ອອາດມີສີເຫລືອງ ໂດຍສະເພາະໃນຕອນເຊົ້າ, ແຕ່ອາການໄອອາດຢູ່ດົນກ່ວາ 2 ອາທິດ ເຊິ່ງວຽກງານວິໄຈສະແດງໃຫ້ເຫັນຈະແຈ້ງວ່າ : ຢາປິ່ນປົວບໍ່ຊ່ວຍໃຫ້ອາການໄອ ແລະ ໄຂ້ຫວັດເຊົາໄວຂຶ້ນແຕ່ຢ່າງໃດ ການປິ່ນປົວທີ່ດີສຸດກໍຄື : ການພັກຜ່ອນ ແລະ ດື່ມນຳ້ອຸ່ນ ເພື່ອໃຫ້ຮ່າງກາຍສ້າງພູມຕ້ານທານມາຕໍ່ສູ້ກັບເຊື້ອໄວຣັສ ແລະ ອາດປຶກສາທ່ານໝໍກ່ຽວກັບການໃຊ້ຢາເພື່ອຫລຸດອາການໄຂ້ຫວັດ, ໄອ, ຕັນດັງ ຫລື ເຈັບຄໍ.

– ອາການເຈັບຄໍທ່ີອາດເກີດຈາກເຊື້ອແບັກທີເຣຍ ເຊິ່ງພົບໄດ້ໜ້ອຍ : ມັກມີອາການຢ່າງໜ້ອຍ 3 ໃນ 4 ຂໍ້ນີ້ຮ່ວມກັນ ຄື : 1. ບໍ່  ໄອ, 2. ມີໄຂ້, 3. ຕ່ອມທອນຊິນມີຈຸດຂາວ ຫລື ເປັນໜອງ, 4. ຕ່ອມນຳ້ເຫລືອງກ້ອງຄາງກະໄຕໃຫຍ່ ກົດແລ້ວເຈັບ ທັງນີ້ ທ່ານສາມາດສຳຫລວດຕ່ອມນຳ້ເຫລືອງຂອງຕົນເອງໂດຍການຄຳບໍລິເວນກ້ອງຄາງກະໄຕເພື່ອເບິ່ງວ່າຕ່ອມນຳ້ເຫລືອງບໍລິເວນນີ້ໃຫຍ່ ຫລື ກົດແລ້ວເຈັບຫລືບໍ່ ແລະ ສາມາດເບິ່ງຕ່ອມທອນຊິນຂອງຕົນເອງໂດຍ ການອ້າປາກ ແລະ ແຍງແວ່ນເບິ່ງຢູ່ຕ່ອມທອນຊິນວ່າມີຈຸດຂາວຫລືບໍ່ ຫາກມີອາການ 3 ໃນ 4 ຂໍ້ ຫລື ມີອາການຄົບທັງ 4 ຂໍ້ດັ່ງກ່າວ ກໍຄວນໄປໂຮງໝໍເພື່ອຮັບການປິ່ນປົວທີ່ຖືກຕ້ອງຕໍ່ໄປ.

ກ່ອນກິນຢາປິ່ນປົວທຸກເທື່ອຕ້ອງໝັ້ນໃຈວ່າພະຍາດທີ່ເປັນມີສາເຫດຈາກເຊື້ອແບັກທີເຣຍ ບໍ່ຄວນກິນຢາປິ່ນປົວໂດຍບໍ່ຮູ້ວ່າ ປ່ວຍຕິດເຊື້ອແບັກທີເຣຍຫລືບໍ່ ໂດຍຄວນຖາມແພດທຸກເທື່ອເພື່ອຄວາມໝັ້ນໃຈ ແລະ ຂໍເຕືອນປະຊາຊົນຢ່າຊື້ຢາປິ່ນປົວມາກິນເອງ, ຢ່າໃຊ້ຢາປິ່ນປົວຕາມທີ່ຄົນແນະນຳ ແລະ ຢ່າແບ່ງຢາປິ່ນປົວຂອງຕົນເອງໃຫ້ແກ່ຄົນອື່ນ ເພາະເຮົາບໍ່ຮູ້ວ່າເຂົາຈຳເປັນຕ້ອງໃຊ້ຢາປິ່ນປົວຫລືບໍ່ ເນື່ອງຈາກຢາປິ່ນປົວມີຫລາຍຊະນິດ ເຊັ່ນ : ເປນນິຊິລີນ, ອະມັອກຊິລີນ, ເຕຕຣ້າໄຊຍະຄລີນ ຣິດໂທຣໄມຊິນ, ໂຄໄທຣມັອກຊາໂຊລ ເປັນຕົ້ນ ແລະ ແຕ່ລະຊະນິດໃຊ້ກັບເຊື້ອແບັກທີເຣຍຕ່າງກັນ ແລະ ສິ່ງສຳຄັນເຮົາບໍ່ຮູ້ວ່າເຂົາແພ້ຢາຫລືບໍ່ ຫລື ມີພະຍາດປະຈຳໂຕຫຍັງຢູ່.