ອິດສະລາແອນກຽມສົ່ງຜູ້ແທນເດີນໜ້າເຈລະຈາຢຸດຍິງໃນເຂດກາຊາຢູ່ກາຊາ

     ເຈົ້າໜ້າທີ່ອິດສະລາແອນ ເປີດເຜີຍຕໍ່ສໍານັກຂ່າວຊິນຮົວວ່າ: ທາງການອິດສະລາແອນໄດ້ຕັດສິນໃຈໃນວັນທີ 24 ກຸມພາ ໃນການສົ່ງຄະນະຜູ້ແທນເດີນທາງໄປນະຄອນຫລວງໂດຮາ ປະເທດກາຕາ ໃນອາທິດໜ້າ ເພື່ອເດີນໜ້າການເຈລະຈາກ່ຽວກັບຂໍ້ຕົກລົງຢຸດຍິງຢູ່ເຂດກາຊາ ໂດຍຄະນະຜູ້ແທນຊຸດນີ້ຈະຫາລືບັນຫາມະນຸດສະທໍາໃນຂໍ້ຕົກລົງນີ້.

      ຂໍ້ຕົກລົງທີ່ຄາດວ່າຈະບັນລຸກັນນີ້ເປັນເລື່ອງການຢຸດຍິງຫລັງສົງຄາມອິດສະລາແອນ-ຮາມັດຍາວນານເຖິງ 4 ເດືອນເຄິ່ງ ລວມທັງການປ່ອຍຕົວປະກັນທີ່ກຸ່ມຮາມັດຈັບໄວ້ຢູ່ເຂດກາຊາ, ການປ່ອຍຕົວນັກໂທດຊາວປາແລັສຕິນທີ່ຖືກຄຸມຂັງຢູ່ຄຸກອິດສະລາແອນ ຕະຫລອດຈົນເພີ່ມການຊ່ວຍເຫລືອທາງມະນຸດສະທໍາຢູ່ເຂດກາຊາ.

     ສໍານັກຂ່າວຊິນຮົວລາຍງານວ່າ: ໄດ້ມີການຫາລືລະດັບຄະນະລັດຖະບານທາງໂທລະສັບ ແລະ ລັດຖະມົນຕີໄດ້ຮັບຂໍ້ມູນອັບເດດກ່ຽວກັບການເຈລະຈາຢູ່ນະຄອນຫລວງປາຣີສ ໂດຍເຈົ້າໜ້າທີ່ອິດສະລາແອນເປີດເຜີຍວ່າ: ການເຈລະຈາຢູ່ນະຄອນຫລວງປາຣີເປັນໄປໃນທາງທີ່ດີ ແລະ ບັນລຸໂຄງຮ່າງທົ່ວໄປຂອງຂໍ້ຕົກລົງແລ້ວ. ເຖິງຢ່າງໃດກໍຕາມ, ກຸ່ມຮາມັດປະຕິເສດວ່າບໍ່ມີຄວາມຄືບໜ້າສໍາຄັນແຕ່ຢ່າງໃດ.