ອາທິດຜ່ານມາລາວສົ່ງອອກຜະລິດຕະພັນພືດຫຼາຍກວ່າ 14 ໂຕນ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ໃນ 1 ອາທິດຜ່ານມາ, ລາວ ສາມາດສົ່ງອອກສິນຄ້າພືດ ແລະ ຜະລິດຕະພັນພືດ ທັງໝົດຫຼາຍກວ່າ 14 ໂຕນ ລວມມູນຄ່າຫຼາຍກວ່າ 4 ລ້ານໂດລາສະຫະລັດ. ຫຼາຍກວ່າໝູ່ແມ່ນ ກາເຟ, ໝາກກ້ວຍ, ຢາສູບ, ຢາງພາລາ ແລະ ສາລີ ແລະ ສັດອອກຈໍາໜ່າຍ 14. 300 ກວ່າໂຕ ໃນນັ້ນມີ ຄວາຍ, ງົວ, ໝູ ແລະ ແບ້ ແລະ ສັດປີກອີກຫຼາຍກວ່າ 1 ແສນໂຕ. ແຕ່ຕົ້ນປີມາຮອດປັດຈຸບັນລາວສາມາດສົ່ງສັດອອກຈໍາໜ່າຍທັງໝົດ 41 ແສນກວ່າໂຕ ແລະ ສັດປີກຫຼາຍກວ່າ 4 ລ້ານໂຕ.

ກະຊວງກະສິກໍາ ແລະ ປ່າໄມ້ ໃຫ້ຮູ້ອີກວ່າ: ການຜະລິດເຂົ້ານາປີໃນປີນີ້ທົ່ວປະເທດ ບັນລຸໄດ້ຕາມຄາດຫຼາຍທີ່ວາງໄວ້ 817.700 ເຮັກຕາ. ປັດຈຸບັນ ພວມສຸມໃສ່ຊຸກຍູ້ທ້ອງຖິ່ງເອົາໃຈໃສ່ບົວລະບັດຮັກສາ ເພື່ອຍົກສູງຜະລິດຕະພັນການຜະລິດສູງຂຶ້ນໄປ ຄຽງຄູ່ກັບການປ້ອງກັນລະບາດຂອງພະຍາດສັດ, ສັດຕູພືດ ແລະ ເຝົ້າລະວັງໄພພິບັດທໍາມະຊາດ. ສໍາລັບການປູກພືດອື່ນໆ ບັນລຸໄດ້ປະມານ 371.822 ເຮັກຕາ ເທົ່າກັບ 50% ຂອງແຜນການ.