ເລີ່ມປ່ຽນປ້າຍທະບຽນ ຈາກ“ກຳແພງນະຄອນ” ມາເປັນ“ນະຄອນຫລວງວຽງຈັນ” ຢ່າງເປັນທາງການ

ວັນທີ 1 ມີນາ 2024 ກອງຄຸ້ມຄອງພາຫະນະ (ທົ່ງປົ່ງ), ໄດ້ເລີ່ມປ່ຽນຊື່ປ້າຍທະບຽນພາຫະນະ ຈາກ ກຳແພງນະຄອນ ມາເປັນ ນະຄອນຫລວງວຽງຈັນ, ການປ່ຽນຊື່ປ້າຍທະບຽນຄັ້ງນີ້ແມ່ນ ປະຕິບັດຕາມຂໍ້ຕົກລົງ ຂອງກະຊວງ ໂຍທາທິການ ແລະ ຂົນສົ່ງ ສະ ບັບເລກທີ 37899/ຍທຂ, ລົງວັນທີ 25 ທັນວາ 2023 ວ່າດ້ວຍມາດຕະຖານເຕັກນິກຂອງປ້າຍທະບຽນຍານພາຫະນະທາງບົກ ແລະ ຕາມແຈ້ງການຂອງຫ້ອງການກະຊວງ ຍທຂ ສະບັບເລກທີ 88/ຫກ ລົງວັນທີ 3 ມັງກອນ 2024 ເລື່ອງ: ການປ່ຽນຊື່ປ້າຍທະບຽນຍານພາຫະນະທາງບົກ ມາເປັນນະຄອນຫລວງວຽງຈັນ, ເຊິ່ງການປ່ຽນຊື່ດັ່ງກ່າວແມ່ນເລີ່ມແຕ່ວັນທີ 1 ມີນາ 2024 ເປັນຕົ້ນໄປ.

ສຳລັບຍານພາຫະນະທາງບົກ ທີ່ຂຶ້ນທະບຽນປ້າຍ ກຳແພງນະຄອນ, ຖ້າຢາກສືບຕໍ່ນໍາໃຊ້ ກໍສາມາດນໍາໃຊ້ໄດ້ຈົນກວ່າໃບທະບຽນຈະໝົດອາຍຸ ຈຶ່ງປ່ຽນເປັນ ນະຄອນຫລວງວຽງຈັນກໍໄດ້ ຫລື ຖ້າມີຈຸດປະສົງຢາກປ່ຽນກ່ອນ ກໍສາມາດປ່ຽນໄດ້ຕາມຄວາມສະໝັກໃຈ ແຕ່ຕ້ອງຮັກສາລະຫັດປ້າຍ ແລະ ຕົວເລກທະບຽນໄວ້ຄືເກົ່າ.