ລາວສະເຫຼີມສະຫລອງວັນອາຫານໂລກ-ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ

ກະຊວງກະສິກໍາ-ປ່າໄມ້ ແລະ ອົງການສະຫະປະຊາຊາດ ປະຈໍາລາວ, ໄດ້ຈັດງານສະເຫຼີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ ພາຍໃຕ້ຫົວຂໍ້ “ລົງທຶນໃສ່ການຄໍ້າປະກັນສະບຽງອາຫານ ແລະ ການພັດທະນາຊົນນະບົດ ເພື່ອແກ້ໄຂການເຄື່ອນຍ້າຍຖິ່ນຖານໃນອະນາຄົດ” ແລະ “ກ້າວໄປສູ່ສັງຄົມ ສັນຕິສຸກ ແລະ ເພື່ອທຸກຄົນ” ຂຶ້ນລະຫວ່າງວັນທີ 17-24 ຕຸລາ ນີ້, ທີ່ສະຖາບັນຄົ້ນຄວ້າ ກະສິກໍາ- ປ່າໄມ້ ແລະ ພັດທະນາຊົນນະບົດແຫ່ງຊາດ, ໂດຍການເປັນປະທານຮ່ວມຂອງທ່ານ ເພັດ ພົມພິພັກ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ແລະ ທ່ານ ພວງປາຣິສັກ ປຣະວົງວຽງຄໍາ ຮອງລັດຖະມົນຕີ ກະຊວງກະສິກໍາ-ປ່າໄມ້, ທ່ານນາງ ຄາຣີນາ ອິມໂມເນນ ຫົວໜ້າຜູ້ປະສານງານ ອົງການສະຫະປະຊາຊາດ (UN) ທັງເປັນຜູ້ຕາງໜ້າອົງການສະຫະປະຊາຊາດເພື່ອການພັດທະນາ (UNDP) ປະຈໍາລາວ ແລະ ທ່ານ ສະຕີເຟັນ ຣູດກາດ ຜູ້ຕາງໜ້າອົງການ ອາຫານ ແລະ ການກະເສດ (FAO) ປະຈໍາລາວ.

ເພື່ອແນໃສ່ປູກຈິດສໍານຶກ ແລະ ສ້າງຄວາມຮັບຮູ້ໃຫ້ປະຊາຊາດໃນທົ່ວໂລກ ໄດ້ເຂົ້າໃຈວ່າ ຄວາມທຸກຍາກ ແລະ ໄພອຶດຫິວ ແມ່ນປາກົດການທາງສັງຄົມໜຶ່ງທີ່ພວກເຮົາສາມາດລຶບລ້າງໃຫ້ໝົດໄປໄດ້. ໃນໂອກາດດັ່ງກ່າວ ທ່ານ ພວງປາຣິສັກ ປຣະວົງວຽງຄໍາ ໄດ້ກ່າວວ່າ: ລາວເຮົາໄດ້ຮັບຮອງເອົາ ເປົ້າໝາຍການພັດທະນາແບບຍືນຍົງ ເພື່ອລຶບລ້າງຄວາມທຸກຍາກ ແລະ ຄວາມອຶດຫິວ ໂດຍສະເພາະ ບັນດານະໂຍບາຍສົ່ງເສີມ ການຄໍ້າປະກັນຄວາມໝັ້ນຄົງດ້ານສະບຽງອາຫານ ແລະ ການພັດທະນາຊົນນະບົດ. ບັນດາຍຸດທະສາດແຫ່ງຊາດທີ່ມີຢູ່ ໄດ້ສະທ້ອນໃຫ້ເຫັນເຖິງບັນດາບູລິມະສິດ ແລະ ແຜນງານ ທີ່ກໍາລັງຖືກຈັດຕັ້ງປະຕິບັດ ເພື່ອນໍາສູ່ການແກ້ໄຂບັນຫາການເຄື່ອນຍ້າຍຖິ່ນຖານຂອງແຮງງານຊົນນະບົດ, ທ່ານ ສະຕີເຟັນ ຣູດກາດ ໄດ້ເນັ້ນວ່າ: ສະຫະປະຊາຊາດໃຫ້ການຊ່ວຍເຫຼືອ ເພື່ອແກ້ໄຂບັນຫາທີ່ສົ່ງຜົນເຮັດໃຫ້ເກີດມີການເຄື່ອນຍ້າຍຂອງຜູ້ຄົນ ຊຶ່ງນໍາໄປສູ່ການການຍ້າຍຖິ່ນຖານທີ່ປອດໄພ, ເປັນລະບຽບ ແລະ ປົກກະຕິ ຊຶ່ງຈະສາມາດປະກອບສ່ວນເຂົ້າໃສ່ການຈະເລີນເຕີບໂຕຂອງເສດຖະກິດ ແລະ ເພີ່ມທະວີການຄໍ້າປະກັນສະບຽງອາຫານ ແລະ ປັບປຸງຊີວິດການເປັນຢູ່ໃນເຂດຊົນນະບົດໃຫ້ດີຂຶ້ນ.

ຄວາມທຸກຍາກ ແລະ ໄພອຶດຫິວ ໄດ້ເປັນບັນຫາໃຫຍ່ຂອງໂລກມາເປັນເວລາຫຼາຍສະຕະວັດ. ຕະຫຼອດໄລຍະຜ່ານມາ ໂລກຂອງເຮົາໄດ້ພົບກັບໄພພິບັດທາງທໍາມະຊາດ, ການປ່ຽນແປງດິນຟ້າອາກາດ, ການລະບາດຂອງພະຍາດ, ຄວາມສັບສົນວຸ້ນວາຍທາງສັງຄົມ, ເສິກສົງຄາມຕະຫຼອດຮອດວິກິດການຕ່າງໆ. ປະກົດການດັ່ງກ່າວ ໄດ້ເຮັດໃຫ້ບັນຫາຄວາມທຸກຍາກ ແລະ ໄພອຶດຫິວຍິ່ງເພີ່ມຂຶ້ນ, ດັ່ງນັ້ນ ອົງການອາຫານ ແລະ ການກະເສດ ແຫ່ງສະຫະປະຊາຊາດ ຈຶ່ງໄດ້ກໍານົດເອົາວັນທີ 16 ຕຸລາ ຂອງທຸກໆປີ ເປັນວັນອາຫານໂລກ ຊຶ່ງເລີ່ມແຕ່ປີ 1980 ເປັນຕົ້ນມາ ແລະ ອົງການສະຫະປະຊາຊາດ ໄດ້ກໍານົດເອົາວັນທີ 17 ຕຸລາ ປີ 1992 ເປັນວັນສາກົນເພື່ອລຶບລ້າງຄວາມທຸກຍາກ, ມາຮອດປີ 2003 ລັດຖະບານລາວ ໄດ້ກໍານົດເອົາວັນທີ 17-24 ຕຸລາ ເປັນສັບປະດາແຫ່ງຊາດເພື່ອລຶບລ້າງຄວາມທຸກຍາກ.