ກອງປະຊຸມສຳມະນາກ່ຽວກັບນະວັດຕະກຳ ແລະ ການທ່ອງທ່ຽວທັນສະໄໝ

ວັນທີ 17 ຕຸລານີ້, ກົມເຕັກໂນໂລຊີ ແລະ ນະວັດຕະກໍາ ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ສຳນັກງານນະວັດຕະກຳແຫ່ງຊາດກະຊວງວິທະຍາສາດ ແລະ ເຕັກໂນໂລຊີ ປະເທດໄທ ພ້ອມ​ດ້ວຍພະແນກວິທະຍາສາດ ແລະ ເຕັກໂນໂລຊີ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງພະບາງ ໄດ້ຈັດກອງປະຊຸມສໍາມະນາກ່ຽວກັບນະວັດຕະກຳ ແລະ ການທ່ອງທ່ຽວທີ່ທັນສະໄໝຂຶ້ນ ທີ່ແຂວງຫລວງພະບາງ ໂດຍການເຂົ້າຮ່່ວມຂອງທ່ານເຈົ້າແຂວງຫລວງພະບາງ, ມີຜູ້ຕາງໜ້າພະແນກກ່ຽວຂ້ອງ ພ້ອມ​ດ້ວຍຜູ້ປະກອບການພາຍໃນແຂວງເຂົ້າຮ່ວມຈຳນວນ​ຫລາຍ.

ເພື່ອຜັນຂະຫຍາຍ ແລະ ຈັດຕັ້ງປະຕິບັດບົດບັນທຶກຄວາມເຂົ້າໃຈການຮ່ວມມືທາງດ້ານວິທະຍາສາດ ແລະ ເຕັກໂນໂລຊີໃນການສົ່ງເສີມ ແລະ ພັດທະນານະວັດຕະກຳການທ່ອງທ່ຽວທັນສະໄໝສາມາດແຂ່ງຂັນໄດ້ ເປັນຕົ້ນ ການເຊື່ອມໂຍງການທ່ອງທ່ຽວແບບຢືນຍົງລະຫວ່າງສອງປະເທດ, ການສົ່ງເສີມ ແລະ ພັດທະນາການບໍລິການການທ່ອງທ່ຽວທີ່ທັນສະໄໝ, ການໂຄສະນາເຜີຍແຜ່, ການປັບປຸງຜະລິດຕະພັນ ແລະ ການພັດທະນາຊັບພະຍາກອນມະນຸດດ້ານການທ່ອງທ່ຽວ.

ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ມີຄຳເຫັນວ່າ: ກອງປະຊຸມນີ້ ​ເພື່ອເປີດໂອກາດໃຫ້ຜູ້ເຂົ້າຮ່ວມຈາກພາກລັດ, ເອກະຊົນ, ສະຖາບັນຄົ້ນຄວ້າ, ມະຫາວິທະຍາໄລ ໂດຍສະເພາະຜູ້ປະກອບການທຸລະກິດຂະໜາດນ້ອຍ ແລະ ກາງຂອງສອງປະເທດ ລາວ-ໄທ ໄດ້ແລກປ່ຽນຂໍ້ມູນຂ່າວສານ, ຮ່ວມມືລົງທຶນດ້ານນະວັດຕະກຳ ແລະ ການທ່ອງທ່ຽວທັນສະໄໝຮ່ວມກັນ ແລະ ພ້ອມກັນປຶກສາຫາລືສ້າງໂຄງການ, ກິດຈະກຳທີ່ສອດຄ່ອງ ແລະ ເໝາະສົມກັບສະພາບຂອງການພັດທະນາຢູ່ໃນປັດຈຸບັນຂອງສອງປະເທດ ກໍຄືການເຊື່ອມໂຍງພາກພື້ນ ແລະ ສາກົນ ເປັນການເພີ່ມທະວີການຮັດແໜ້ນ ຄວາມສາມັກຄີມິດຕະພາບທີ່ມີມູນເຊື້ອມາຍາວນານຂອງທັງສອງຊາດ, ເປັນໂອກາດອັນດີໃຫ້ແກ່ບັນດາຜູ້ເຂົ້າຮ່ວມໄດ້ແລກປ່ຽນສົນທະນາບົດຮຽນ, ປະສົບການ ແລະ ການຮ່ວມມືດ້ານການສົ່ງເສີມ ແລະ ພັດທະນານະວັດຕະກຳ ແລະ ການທ່ອງທ່ຽວທັນສະໄໝ, ຍຸດທະສາດ ແລະ ການພັດທະນາການທ່ອງທ່ຽວຂອງແຂວງຫຼວງພະບາງ ລວມ​ເຖິງບົດບາດສຳຄັນຂອງວຽກງານນະວັດຕະກຳຕໍ່ການພັດທະນາເສດຖະກິດ-ສັງຄົມ, ທ່າອ່ຽງ ແລະ ທິດທາງໃນການພັດທະນານະວັດຕະກຳສຳລັບ SMES ໃນປັດຈຸບັນ ແລະ ອານາຄົດ, ຮູບແບບໃນການບໍລິຫານຈັດການໂດຍລວມຂອງ SMES ແລະ ສ້າງໂອກາດຮ່ວມມືຂອງພາກສ່ວນທຸລະກິດຂອງສອງປະເທດ ​ແລະ ກອງປະຊຸມດັ່ງກ່າວໄດ້ມີການວາງສະແດງຮູບພາບ, ສິ່ງພິມການທ່ອງທ່ຽວຂອງສອງປະເທດຕື່ມອີກ.