ຈໍາປາສັກ-ຫລວງພະບາງແລກປ່ຽນບົດຮຽນວຽກງານສື່ມວນຊົນ
ເມື່ອບໍ່ດົນມານີ້, ຢູ່ສະຖານີວິທະຍຸກະຈ່າຍສຽງແຂວງຈຳປາສັກ, ໄດ້ຈັດກອງປະຊຸມແລກປ່ຽນບົດຮຽນວຽກງານສື່ມວນຊົນລະຫວ່າງພະແນກຖະແຫລງຂ່າວ, ວັດທະນາທໍາ ແລະ ທ່ອງທ່ຽວແຂວງຈຳປາສັກ ແລະ ພະແນກ ຖວທ ແຂວງຫລວງພະບາງ, ແຂວງຈຳປາສັກນຳໂດຍທ່ານ ບົວທອງ ສຸວັນນະສານ ຫົວໜ້າພະແນກ ຖວທ ແລະ ແຂວງຫລວງພະບາງແມ່ນທ່ານ ສຸລະທິບ ໜໍ່ຄູນຜົນ ຫົວໜ້າພະແນກ ຖວທ, ພ້ອມດ້ວຍພະນັກງານສື່ມວນຊົນວິທະຍຸກະຈາຍສຽງ,ໂທລະພາບ ແລະ ໜັງສືພິມຂອງສອງແຂວງເຂົ້າຮ່ວມ.
ໃນການພົບປະແລກປ່ຽນບົດຮຽນຄັ້ງນີ້, ສອງຝ່າຍໄດ້ລາຍງານສະພາບການຈັດຕັ້ງປະຕິບັດວຽກງານສື່ມວນຊົນ ເຊັ່ນ: ວຽກງານວິທະຍຸກະຈາຍສຽງ,ໂທລະພາບ ແລະ ໜັງສືພີມໃຫ້ກັນຊາບ ລວມເຖິງວຽກງານບໍລິຫານອື່ນໆ ເພື່ອກ້າວສູ່ກຸ້ມຕົນເອງດ້ານງົບປະມານເທື່ອລະກ້າວ, ພ້ອມທັງຍົກໃຫ້ເຫັນຂໍ້ສະດວກ,ຂໍ້ຫຍຸ້ງຍາກຕ່າງໆເພື່ອພ້ອມກັນຫາວິທີປັບປຸງແກ້ໄຂໃນຕໍ່ໜ້າ, ເພື່ອພັດທະນາວົງການສື່ມວນຊົນໃຫ້ມີປະສິດທິພາບສູງກວາເກົ່າ ເພື່ອຮັບປະກັນໃນການເຮັດໜ້າທີ່ນຳເອົາຂໍ້ມູນຂ່າວສານ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ສາລະຄວາມຮູ້ ແລະ ຄວາມບັນເທີງຕ່າງໆ ລົງສູ່ພື້ນຖານປະຊາຊົນ ເພື່ອກະຕຸກຊຸກຍູ້ທົ່ວສັງຄົມປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດໃຫ້ກ້າວໜ້າຂະຫຍາຍຕົວຢ່າງບໍ່ຢຸດຢັ້ງ.
