ນະຄອນຫລວງວຽງຈັນ ຈະປັບປຸງກະຊວງຍຸຕິທໍາ (ຫລັງເກົ່າ) ໃຫ້ເປັນສວນສາທາລະນະສີຂຽວໃຈກາງເມືອງ

ວັນທີ 17 ພຶດສະພາ 2024, ທ່ານ ບຸນຍະວັດ ນີຣະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ (ຍທຂ ນວ) ຖະແຫລງຂ່າວກ່ຽວກັບການສ້າງສວນສາທາລະນະປະຕູໄຊພາກຂະຫຍາຍໄລຍະທີ 1 ວ່າ: ໃນລະຫວ່າງເດືອນພຶດສະພາ ຫາ ເດືອນກັນຍາ ປີ 2024ນະຄອນຫລວງວຽງຈັນ ຈະປັບປຸງພື້ນທີ່ກະຊວງຍຸຕິທໍາ (ຫລັງເກົ່າ) ໃຫ້ເປັນສວນສາທາລະນະ, ເພື່ອເຮັດໃຫ້ໃຈກາງນະຄອນຫລວງວຽງຈັນ ມີພື້ນທີ່ສາທາລະນະສີຂຽວ, ເປັນບ່ອນພັກຜ່ອນ, ມີສວນຮົ່ມໄມ້, ຮ້ານຂາຍເຄື່ອງທີ່ລະນຶກ, ມີຫ້ອງນໍ້າສາທາລະນະ, ມີບ່ອນຈອດລົດ, ມີລະບົບໄຟຟ້າ, ນໍ້າປະປາ ແລະ ສິ່ງອຳນວຍຄວາມສະດວກອື່ນໆ.

ສວນນີ້ ມີເນື້ອທີ່ປະມານ 1 ເຮັກຕາເຄິ່ງ, ປັດຈຸບັນກຳລັງດຳເນີນການລ້ອມຮົ້ວ ອະນາໄມຕ່າງໆ ຄາດວ່າການກໍ່ສ້າງຈະສຳເລັດໃນເດືອນກັນຍາ 2024 ນີ້, ພາຍຫລັງ ສວນສາທາລະນະແຫ່ງນີ້ສ້າງສໍາເລັດແລ້ວຈະເພີ່ມສີສັນ ແລະ ສ້າງບັນຍາກາດໃໝ່ໃຫ້ແກ່ ນວ ໂດຍສະເພາະໃນປີ 2024 ທີ່ ສປປ ລາວໄດ້ ເປັນປະທານອາຊຽນ ທັງເປັນປີທ່ອງທ່ຽວລາວ ແລະ ນວ ກໍເປັນເຈົ້າພາບຈັດກອງປະຊຸມບັນດາເຈົ້າຄອງນະ ຄອນຫລວງອາຊຽນ.

ສວນສາທາລະນະ ປະຕູໄຊພາກຂະຫຍາຍນີ້ຖືກອອກແບບໂດຍຄະນະທີ່ປຶກສາ ສະຖາປະນິກ ຄະນະອາຈານ ແລະ ນັກສຶກສາຈາກມະຫາວິທະຍາໄລແຫ່ງຊາດ ໂດຍໄດ້ຮັບການສະໜັບສະໜູນດ້ານທຶນຮອນຈາກພະແນກການຄ້າ ແຂວງ ຢຸນນານ ສປ ຈີນ ແລະ ນວ, ບໍລິສັດທີ່ປຶກສາ ແລະ ກໍ່ສ້າງແຂວງຢຸນນານ ສປ ຈີນ ເປັນຜູ້ດໍາເນີນການກໍ່ສ້າງຕາມຮູບແບບທີ່ໄດ້ຖືກຮັບຮອງ, ສ່ວນການປັບປຸງຕຶກອາຄານແມ່ນໄດ້ດໍາເນີນຕາມລະບຽບການຈັດຊື້-ຈັດຈ້າງ ເພື່ອຄັດເລືອກເອົາບໍລິສັດພາຍໃນທີ່ມີເງື່ອນໄຂມາຈັດຕັ້ງປະຕິບັດ.