ລາວ ເປັນເຈົ້າພາບຈັດກອງປະຊຸມປະກັນໄພອາຊຽນ ຄັ້ງທີ 20 ແລະ ກອງປະຊຸມສະພາປະກັນໄພອາຊຽນ ຄັ້ງທີ 43

​ແຫ​ລ່ງຂ່າວ : ກະຊວງການເງິນ

ລາຍ​ງານ​ວ່າ : ກົມຄຸ້ມຄອງ, ພັດທະນາວິສາຫະກິດ ແລະ ການປະກັນໄພ ກະຊວງການເງິນ) ໄດ້ຮັບກຽດເປັນເຈົ້າພາບຈັດກອງປະຊຸມ ອົງການຄຸ້ມຄອງປະກັນໄພອາຊຽນ (AIRM) ຄັ້ງທີ 20 ແລະ ກອງປະຊຸມສະພາປະກັນໄພອາຊຽນ ( AIC )  ຄັ້ງທີ 43 ແລະ ບັນດາກອງປະຊຸມປິ່ນອ້ອມກ່ຽວກັບວຽກງານຄຸ້ມຄອງຂະແໜງປະກັນໄພຂອງພາກລັດ ແລະ  ພາກທຸລະກິດ ຂຶ້ນໃນລະຫວ່າງວັນທີ 20-24 ພະຈິກນີ້ ທີ່ນະຄອນຫຼວງວຽງຈັນ​ເພື່ອ​ເປັນ​ການ​ຮັດ​ແຫນ້ນ​ການ​ຮ່ວມ​ມື ​ແລະ ​ແລກປ່ຽນ​ບົດຮຽນ​ໃນ​ການ​ພັດທະນາ​ວຽກ​ງານ​ປະກັນ​ໄພ​ຂອງ​ແຕ່ລະ​ປະ​ເທດ ​ແລະ ປຶກສາຫາລືກ່ຽວກັບບັນຫາທີ່ເຄັ່ງຮ້ອນໃນຂະແໜງປະກັນໄພ​ໃນ​ປັດຈຸບັນ.

​ໃນ​ກອງ​ປະຊຸມ ຍັງໄດ້ລາຍງານສະພາບການພັດທະນາວຽກງານປະກັນໄພອາຊຽນໃນໜຶ່ງປີຜ່ານມາ ແລະ ຢູ່ແຕ່ລະປະເທດສະມາຊິກ ​ແລະ ໃນໂອກາດນີ້, ຈະໄດ້ປະກາດຮັບເອົາສະມາຄົມປະກັນໄພລາວເປັນສະມາຊິກສົມບູນຂອງສະພາປະກັນໄພອາຊຽນ ( AIC ) ແລະ ການມອບລາງວັນ YAMA ( Young ASEAN Insurance Manager Award) ໃຫ້ແກ່ຜູ້ຈັດການໜຸ່ມບັນດາປະເທດອາຊຽນ, ເຊິ່ງເປັນຄັ້ງທໍາອິດທີ່ມີຕົວແທນຈາກ ສປປ ລາວ ຄື ຈາກບໍລິສັດ ພຣູເດັນໂຊ ປະກັນໄພຊີວິດ (ລາວ) ຈໍາກັດ ໄດ້ຖືກຄັດເລືອກໃຫ້ເປັນ 1 ໃນ 3 ຄົນທີ່ໄດ້ເຂົ້າຮອບສຸດທ້າຍໃນການຊິງຊະນະເລີດເພື່ອຍາດເອົາລາງວັນດັ່ງກ່າວ ພ້ອມກັບຕົວແທນຈາກປະເທດສິງກະໂປ ແລະ ອິນໂດເນເຊຍ.

ນອກຈາກນີ້ ກອງປະຊຸມຈະຊ່ວຍເປີດກ້ວາງວິໄສທັດໃນການຄຸ້ມຄອງປະກັນໄພໃນ ສປປ ລາວ ແລະ ເປັນການເປີດໂອກາດໃຫ້ບໍລິສັດປະກັນໄພໃນ ສປປ ລາວ ໄດ້ຮຽນຮູ້ເອົາບົດຮຽນທຸລະກິດປະກັນໄພຂອງສາກົນ.

ສຳລັບການເປັນເຈົ້າພາບຈັດກອງປະຊຸມ AIRM ຄັ້ງທີ 20 ແລະ ກອງປະຊຸມ AIC ຄັ້ງທີ 43 ແລະ ບັນດາກອງປະຊຸມປິ່ນອ້ອມແບ່ງອອກເປັນ 2 ປະເພດຄື: ກອງປະຊຸມສໍາລັບພາກລັດ ແລະ ກອງປະຊຸມສໍາລັບພາກທຸລະກິດ, ສໍາລັບກອງປະຊຸມພາກລັດປະກອບມີ 6 ກອງປະຊຸມຄື: ກອງປະຊຸມອົງການຄຸ້ມຄອງປະກັນໄພອາຊຽນ ( AIRM ) ຄັ້ງທີ 20; ກອງປະຊຸມຄະນະເປີດເສລີການບໍລິການດ້ານການເງິນ (WC-FSL) ຄັ້ງທີ 56; ກອງປະຊຸມເວລາປຶກສາຫາລືປະກັນໄພອາຊຽນ (AIFo) ຄັ້ງທີ 3; ກອງປະຊຸມ ຄະນະກໍາມະການປະສານງານກ່ຽວກັບ ໄພພິບັດອາຊຽນ ( ACSCC on DRFI ) ຄັ້ງທີ 3; ກອງປະຊຸມສະພາບໍລິຫານ ( AITRI)  ຄັ້ງທີ 14; ແລະ ກອງປະຊຸມ ຮ່ວມລະຫວ່າງອົງການຄຸ້ມຄອງພາກລັດ ແລະ ພາກທຸລະກິດ ສໍາລັບພາກທຸລະກິດປະກອບມີ 05 ກອງປະຊຸມຄື: ກອງປະຊຸມ ປະກັນໄພອາຊຽນ (AIC Meeting) ຄັ້ງທີ 43; ກອງປະຊຸມຄະນະກໍາມະການສຶກສາປະກັນໄພອາຊຽນ (AIEC) ຄັ້ງທີ 15; ກອງປະຊຸມຄົ້ນຄວ້າກ່ຽວກັບໄພພິບັດທໍາມະຊາດ ( ANDREWS ) ຄັ້ງທີ 10; ກອງປະຊຸມປຶກສາຫາລືກ່ຽວກັບປະກັນໄພລົດຂ້າມແດນ    (COB) ຄັ້ງທີ 18; ກອງປະຊຸມສະພາປະກັນໄພອາຊຽນສໍາລັບປະກັນໄພຊີວິດ ແລະ ປະກັນໄພທົ່ວໄປ.

ນອກນັ້ນ, ຍັງມີກອງປະຊຸມອື່ນໆປິ່ນອ້ອມເປັນຕົ້ນແມ່ນກອງປະຊຸມໃຫຍ່ວ່າດ້ວຍການປະກັນໄພອາຊຽນ ຄັ້ງທີ 11 ( 11th  ASEAN Insurance Congress ) ແລະ ການຝຶກອົບຮົມກ່ຽວກັບການປະກັນໄພຈຸລະພາກ (Micro insurance Training course) ອື່ນໆ​ອີກ.

 

error: Alert: Content is protected !!