ອາເມລິກາຖອນການຊ່ວຍເຫລືອ ທາງທະຫານແກ່ມຽນມາ
ລັດຖະບານວໍຊິງຕັນປະກາດຖອນການຊ່ວຍເຫລືອທາງທະຫານແກ່ເຈົ້າໜ້າທີ່ຂອງມຽນມາ ເຊິ່ງມີສ່ວນກ່ຽວຂ້ອງກັບສະຖານະການຮຸນແຮງຢູ່ລັດຍະໄຂ່.
We support safe return for displaced, addressing roots of discrimination against #Rohingya & resolution to crisis in #Rakhine State, #Burma pic.twitter.com/lW9yxayAZL
— Heather Nauert (@statedeptspox) October 24, 2017
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 24 ຕຸລາວ່າ: ກະຊວງການຕ່າງປະເທດອາເມລິກາ ອອກຖະແຫລງການໃນວັນທີ 23 ຕຸລາ ສະແດງຄວາມກັງວົນຕໍ່ສະຖານະການດ້ານຄວາມໝັ້ນຄົງຢູ່ລັດຍະໄຂ່ຂອງມຽນມາທີ່ຍັງຮຸນແຮງ ແລະ ການລະເມີດສິດທິມະນຸດຕໍ່ຊາວໂຣຮິນຈາ ຕະຫລອດຈົນການກົດຂີ່ກຸ່ມຊາດພັນອີກຫລາຍກຸ່ມ ຈຶ່ງເປັນສິ່ງຈຳເປັນຢ່າງຍິ່ງທີ່ຕ້ອງມີບຸກຄົນ ຫລື ກຸ່ມບຸກຄົນ “ຮັບຜິດຊອບ” ຕໍ່ “ຄວາມໂຫດຮ້າຍປ່າເຖື່ອນ” ທີ່ເກີດຂຶ້ນ ເຊິ່ງລວມທັງຜູ້ທີ່ບໍ່ແມ່ນເຈົ້າໜ້າທີ່ລັດ ແລະ ກຸ່ມຄົນເຊິ່ງມີພຶດຕິກຳລົງໂທດຜູ້ກະທຳຜິດໂດຍພະລະການ.
ດ້ວຍເຫດນີ້, ລັດຖະບານວໍຊິງຕັນຈຶ່ງປະກາດຖອນການຊ່ວຍເຫລືອທາງທະຫານແກ່ເຈົ້າໜ້າທີ່ທຸກລະດັບຂອງກອງທັບມຽນມາ ເຊິ່ງມີສ່ວນກ່ຽວຂ້ອງກັບສະຖານະການຮຸນແຮງຢູ່ລັດຍະໄຂ່, ຢຸດການອະນຸຍາດເດີນທາງເຂົ້າເມືອງສຳລັບທະຫານລະດັບສູງ ແລະ ຢູ່ລະຫວ່າງພິຈາລະນາໃຊ້ມາດຕະການຂວ້ຳບາດທາງເສດຖະກິດຕໍ່ເຈົ້າໜ້າທີ່ເຊິ່ງກ່ຽວຂ້ອງກັບສະຖານະການຢູ່ລັດຍະໄຂ່ ໂດຍການເຄື່ອນໄຫວດັ່ງກ່າວມີຂຶ້ນພາຍຫລັງທ່ານ ເຣັກ ທິລເລີສັນ ລັດຖະມົນຕີຕ່າງປະເທດອາເມລິກາ ກ່າວວ່າ: ກອງທັບມຽນມາ “ຕ້ອງຮັກສາວິໄນ” ແລະ “ອົດກັ້ນ”, ແຕ່ປະຕິເສດກ່າວວ່າຈະມີຊື່ຂອງທະຫານມຽນມາລະດັບ “ຜູ້ບັງຄັບບັນຊາ” ທ່ານໃດແດ່ຢູ່ໃນບັນຊີດຳ.
ນອກຈາກນີ້, ມາດຕະການຂອງລັດຖະບານວໍຊິງຕັນມີຂຶ້ນກ່ອນປະທານາທິບໍດີ ໂດນັນ ທຣຳ ຈະເດີນທາງຢ້ຽມຢາມຫລາຍປະເທດໃນອາຊີ ໃນຕົ້ນເດືອນພະຈິກນີ້ ລວມທັງການເຂົ້າຮ່ວມກອງປະຊຸມສຸດຍອດຜູ້ນຳສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ຢູ່ນະຄອນຫລວງມະນິລາ ປະເທດຟີລິບປິນ ແລະ ກອງປະຊຸມການຮ່ວມມືທາງເສດຖະກິດອາຊີ-ປາຊີຟິກ (ເອເປັກ) ຢູ່ເມືອງດານັງ ສສ ຫວຽດນາມ.
