ນາຍົກເນັ້ນໃຫ້ບູລິມະສິດໂກຕາລັດຖະກອນເມືອງທຸກຍາກ

ໃນໂອກາດໂອ້ລົມຕໍ່ກອງປະຊຸມລັດຖະບານປະຈໍາເດືອນຕຸລາ 2017 ເມື່ອທ້າຍອາທິດຜ່ານມານີ້ຂອງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນໃຫ້ຂະແໜງການຕ່າງໆເອົາໃຈໃສ່ຈັດສັນໂກຕາລັດຖະກອນໃຫ້ທ້ອງຖິ່ນເປັນສ່ວນໃຫຍ່, ໂດຍສະເພາະແມ່ນບັນດາເມືອງທຸກຍາກ.
ທ່ານນາຍົກລັດຖະມົນຕີ ກ່າວວ່າ: ການຈັດສັນໂກຕາລັດຖະກອນໃນສົກປີ 2018 ທີ່ສະພາແຫ່ງຊາດໄດ້ຮັບຮອງໃນຈຳນວນ 3.000 ຕຳແໜ່ງນີ້, ແມ່ນໃຫ້ຈັດສັນໄປຕາມບູລິມະສິດທີ່ລັດຖະບານກຳນົດ, ໂດຍສະເພາະຂະແໜງການສຶກສາ, ສາທາລະນະສຸກ ແລະ ກະສິກຳຢູ່ບັນດາເມືອງທຸກຍາກ ແລະ ຂະແໜງການຢູ່ສູນກາງ, ທ້ອງຖິ່ນທີ່ຈຳເປັນແທ້, ມີຕຳແໜ່ງງານທີ່ຊັດເຈນ, ພ້ອມທັງໃຫ້ຄັດເລືອກພະນັກງານທີ່ມີຄຸນນະພາບ, ມີຄວາມຮູ້ຄວາມສາມາດ ແລະ ໄດ້ຕາມມາດຕະຖານຕາມເງື່ອນໄຂທີ່ຕຳແໜ່ງງານກຳນົດດ້ວຍຄວາມໂປ່ງໃສ ແລະ ມອບໃຫ້ຫ້ອງວ່າການສຳນັກງານນາຍົກລັດຖະມົນຕີອອກແຈ້ງການມອບຄວາມຮັບຜິດຊອບໃຫ້ຂະແໜງການກ່ຽວຂ້ອງນຳເອົາເນື້ອໃນ ແລະ ຈິດໃຈຂອງກອງປະຊຸມລັດຖະບານຄັ້ງນີ້ໄປຜັນຂະຫຍາຍ ແລະ ຈັດຕັ້ງປະຕິບັດ. ພ້ອມທັງມີການຕິດຕາມ, ຊຸກຍູ້, ກວດກາ ແລະ ລາຍງານໃຫ້ລັດຖະບານຊາບ.