ປະຊາຊົນຍີ່ປຸ່ນ ແຫ່ກັກຕຸນສິນຄ້າເພາະຢ້ານເກີດແຜ່ນດິນໄຫວຂະໜາດໃຫຍ່

ພາຍຫລັງທີ່ອົງການອຸຕຸນິຍົມວິທະຍາຂອງຍີ່ປຸ່ນອອກແຈ້ງເຕືອນແຜ່ນດິນໄຫວ ແລະ ເຕືອນໄພສຶນາມິ ເມື່ອວັນທີ 8 ສິງຫາ 2024, ເຮັດໃຫ້ປະຊາຊົນຢ້ານວ່າແຜ່ນດິນໄຫວຂະໜາດໃຫຍ່ (megaquake) ຈຶ່ງແຫ່ກັນກັກຕຸນສິນຄ້າທີ່ຈຳເປັນ.

ສື່ຂ່າວຂອງ ຍີ່ປຸ່ນ ລາຍງານ ວັນທີ 11 ສິງຫາ 2024 ນີ້ວ່າ: ຫ້າງສັບພະສິນຄ້າ ແລະ ຊຸບເປີມາກເກັດໃນນະຄອນຫລວງໂຕກຽວ ແລະ ຫລາຍເມືອງໃຫຍ່ອື່ນໆ ມີລູກຄ້າພາກັນມາຊື້ສິນຄ້າທີ່ຈຳເປັນເປັນຈໍານວນຫລວງຫລາຍ ໂດຍສະເພາະແມ່ນ ອາຫານແຫ້ງ, ນ້ຳດື່ມ, ເຈ້ຍອະນາໄມ ແລະ ສິນຄ້າອຸປະໂພກ-ບໍລິໂພກ ຫລາຍປະເພດຈົນໝົດກ້ຽງຈາກຊັ້ນວາງ. ຫ້າງສັບພະສິນຄ້າແຫ່ງໜຶ່ງໃນນະຄອນຫລວງໂຕກຽວ ຕ້ອງຕິດປ້າຍຂໍໂທດຕໍ່ລູກຄ້າທີ່ຜະລິດຕະພັນບາງຊະນິດແມ່ນຂາດແຄນ.

ໃນຂະນະທີ່ເວັບໄຊ້ Rakuten ບໍລິສັດອີຄອມເມີລາຍໃຫຍ່ຂອງຍີ່ປຸ່ນກ່າວວ່າ: ໂຖຊັກໂຄກແບບພົກພາ, ສະບຽງອາຫານ ແລະ ນ້ຳດື່ມ ເປັນຜະລິດຕະພັນທີ່ຂາຍດີທີ່ສຸດໃນມື້ຜ່ານມາ. ລວມທັງສິນຄ້າ ແລະ ເຄື່ອງຊ່ວຍເຫລືອທີ່ຕິດພັນກັບໄພພິບັດມີຄໍາສັ່ງຊື້ເຂົ້າມາຫລາຍ.

ລັດຖະບານຍີ່ປຸ່ນ ໄດ້ຮຽກຮ້ອງໃຫ້ປະຊາຊົນຫລີກລ່ຽງການການກັກຕຸນສິນຄ້າ ຫລື ສິ່ງຂອງທີ່ຈຳເປັນ ຍ້ອນເຫດນັ້ນ, ສົ່ງຜົນໃຫ້ຄວາມຕ້ອງການອຸປະກອນກູ້ໄພພິບັດ ແລະ ເຄື່ອງໃຊ້ປະຈຳວັນເພີ່ມສູງຂຶ້ນ ເຖິງແມ່ນວ່າຈະມີຄວາມສ່ຽງຂອງແຜ່ນດິນໄຫວຂະໜາດໃຫຍ່ ແຕ່ກໍຍັງຖືວ່າຢູ່ໃນລະດັບຕໍ່າ ດັ່ງນັ້ນປະຊາຊົນບໍ່ຄວນຕົກໃຈເກີນໄປ.