Dell ຢຸດຈ້າງພະນັກງານ 12,500 ຄົນ ຍ້ອນ AI ເຂົ້າມາມີບົດບາດໃນການເຮັດວຽກແທນຄົນ

ວັນທີ 10 ສິງຫາ 2024, ເວບໄຊຕ່າງປະເທດລາຍງານວ່າ: Dell ເປັນບໍລິສັດລາຍໃຫຍ່ດ້ານຄອມພີວເຕີລະດັບແຖວໜ້າຂອງໂລກ ໄດ້ປະກາດຢຸດຈ້າງພະນັກງານທົ່ວໂລກຫລາຍກ່ວາ 12,500 ຄົນ, ເພື່ອປັບໂຄງສ້າງບໍລິສັດໃໝ່ ໃຫ້ຕັ້ງເປົ້າໄປໃຊ້ປັນຍາປະດິດ AI ຫລາຍຂຶ້ນ ຖືເປັນຮອບທີ່ສອງໃນໄລຍະເວລາ 15 ເດືອນຜ່ານມາໃນການການປະກາດຫລຸດພະນັກງານຂອງບໍລິສັດລົງ.

ຕາມການລາຍງານເປີດເຜີຍວ່າແຜນການຢຸດຈ້າງພະນັກງານຈຳນວນຫລາຍກວ່າ 12,500 ຄົນ ຫລື ປະມານ 10% ຂອງພະນັກງານທົ່ວໂລກ ຂອງ Dell ນັ້ນເປັນສ່ວນໜຶ່ງຂອງກົນລະຍຸດໃນການປັບປຸງການດຳເນີນງານໃຫ້ທັນສະໄໝ ແລະ ຕັ້ງເປົ້າໄປທີປັນຍາປະດິດ ຊຶ່ງທາງບໍລິສັດໄດ້ແຈ້ງໃຫ້ພະນັກງານຮັບຮູ້ໃນການປ່ຽນແປງດັ່ງກ່າວໃນວັນທີ 6 ສິງຫາຜ່ານມາ.

ຂະນະທີ່ ທ່ານ Bill Scannell ແລະ John Byrne ຜູ້ບໍລິຫານລະດັບສູງ ຂອງບໍລິສັດ ກ່າວວ່າ: ທາງບໍລິສັດກຳລັງລົດຄ່າໃຊ້ຈ່າຍລົງ ແລະ ກຳລັງປັບປຸງລະດັບການບໍລິຫານຈັດການ ລວມເຖິງການກຳນົດລຳດັບຄວາມສຳຄັນຂອງການລົງທຶນໃໝ່.