ລັດຖະມົນຕີກະຊວງປ້ອງກັນປະເທດ ພົບປະກັບ ລັດຖະມົນຕີກະຊວງປ້ອງກັນປະເທດ ແຫ່ງ ສ ຣັດເຊຍ

ວັນທີ 13 ສິງຫາ 2024 ທີ່ນະຄອນຫລວງ ມົດສະກູ ສ ຣັດເຊຍ, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ພົບປະສອງຝ່າຍ ກັບ ທ່ານ ອານເດຼ ແຣມມົບວິດຈ໌ ເບຍລາອູຊົບ ລັດຖະມົນຕີກະຊວງປ້ອງກັນປະເທດ ແຫ່ງ ສ ຣັດເຊຍ ເນື່ອງໃນໂອກາດທີ່ເດີນທາງເຂົ້າຮ່ວມເປີດງານວາງສະແດງອຸປະກອນເຕັກນິກການທະຫານສາກົນ 2024 ທີ່ ສ ຣັດເຊຍ.

ໂອກາດດັ່ງກ່າວ ທ່ານ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມຂອບໃຈມາຍັງລັດຖະ ບານຣັດເຊຍ ກໍຄືກະຊວງປ້ອງກັນປະເທດແຫ່ງ ສ ຣັດເຊຍ ທີ່ໄດ້ໃຫ້ການຊ່ວຍເຫລືອອັນລ້ຳຄ່າ ແກ່ ສປປ ລາວ ກໍຄືກອງທັບປະຊາຊົນລາວ ໃນຫລາຍດ້ານ ຕະຫລອດໄລຍະຜ່ານມາ, ເປັນຕົ້ນແມ່ນ ການກໍ່ສ້າງພະນັກງານບັນຊາ ແລະ ວິຊາການເຕັກນິການທະຫານ, ການພົວພັນຮ່ວມມືດ້ານການເກັບກູ້ລະເບີດບໍ່ທັນແຕກເພື່ອມະນຸດສະທຳ ຢູ່ ສປປ ລາວ ແລະ ວຽກງານດ້ານອື່ນໆ ເຊິງເປັນການປະກອບສ່ວນອັນສໍາຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄື ການສ້າງກອງທັບປະຊາຊົນລາວ ໃຫ້ເຕີບໃຫຍ່ເຂັ້ມແຂງ ແລະ ທັນສະໄໝ.

ຄະນະຜູ້ແທນທັງສອງຝ່າຍໄດ້ຕີລາຄາຜົນສໍາເລັດຂອງການຮ່ວມມືທາງດ້ານການທະຫານໃນໄລຍະຜ່ານມາ ແລະ ແຜນການພົວພັນຮ່ວມມືໃນຕໍ່ໜ້າ. ຈາກນັ້ນ, ທ່ານ ພົນເອກ ຈັນສະໝອນ ຈັນຍາລາດ ແລະ ທ່ານ ອານເດຼ ແຣມມົບວິດຈ໌ ເບຍລາອູຊົບ ໄດ້ຕາງໜ້າໃຫ້ລັດຖະບານຂອງທັງສອງປະເທດ ລົງນາມກ່ຽວກັບການພົວພັນຮ່ວມມືດ້ານການທະຫານສະບັບໃໝ່ ເພື່ອເປັນບ່ອນອີງໃນການເສີມຂະຫຍາຍມູນເຊື້ອການພົວພັນຮ່ວມມື ລະຫວ່າງສອງປະເທດ ເວົ້າສະເພາະແມ່ນ ກອງທັບປະຊາຊົນລາວ ແລະ ຣັດເຊຍ ໃຫ້ນັບມື້ໄດ້ຮັບການພັດທະນາດີຂຶ້ນ.