ເດືອນ ກໍລະກົດ 2024 ຈີນ ເປັນປະເທດທີ່ ສປປ ລາວ ນໍາເຂົ້າ-ສົ່ງອອກ ສິນຄ້າ ເປັນອັນດັບ1
ສູນຂໍ້ມູນຂ່າວສານທາງດ້ານການຄ້າ ກະຊວງອຸດສາຫະກຳ ແລະ ການຄ້າ ລາຍງານວ່າ:ເດືອນ ກໍລະກົດ ຜ່ານມາ ການນໍາເຂົ້າ ແລະ ສົ່ງອອກ ສິນຄ້າ ຂອງ ສປປ ລາວ ມີມູນຄ່າປະມານ 1ຕື້ 220ລ້ານໂດລາສະຫະລັດ ໃນນີ້ມູນຄ່າການສົ່ງອອກປະມານ 533 ລ້ານໂດລາ, ສ່ວນມູນຄ່າການນຳເຂົ້າປະມານ 687 ລ້ານໂດລາ ແລະ ຂາດດຸນການຄ້າ 154 ລ້ານໂດລາ ໃນນັ້ນ ສປ ຈີນຍັງເປັນປະເທດທີ່ ຄອງອັນດັບ1 ຈາກ 5 ປະເທດ ຂອງ ສປປ ລາວ ທີ່ນຳເຂົ້າ ແລະ ສົ່ງອອກສິນຄ້າຫຼາຍທີ່ສຸດ.
ປະເທດສົ່ງອອກຕົ້ນຕໍ 5 ອັນດັບ ມີ: ຈີນ 188 ລ້ານໂດລາ, ຫວຽດນາມ 130 ລ້ານໂດລາ, ໄທ 70 ລ້ານໂດລາ, ອາເມລິກາ 37 ລ້ານໂດລາ ແລະ ອົດສະຕຣາລີ 33 ລ້ານໂດລາ.
ປະເທດນໍາເຂົ້າ ມີ: ຈີນ 296 ລ້ານໂດລາ, ໄທ 242 ລ້ານໂດລາ, ຫວຽດນາມ 61 ລ້ານໂດລາ, ສ.ອາເມລິກາ 19 ລ້ານໂດລາ ແລະ ຍີ່ປຸ່ນ 13 ລ້ານ ໂດລາ.
ສຳລັບສິນຄ້າທີ່ສົ່ງອອກຕົ້ນຕໍປະກອບມີ: ຄໍາປະສົມ, ເຄື່ອງໃຊ້ໄຟຟ້າ, ເກືອກາລີ, ຢາງພາລາ, ເຈ້ຍ, ເຍື່ອໄມ້, ນໍ້າຕານ, ແປ້ງມັນຕົ້ນ, ແຮ່ທອງ ແລະ ມັນຕົ້ນ ຕາມລຳດັບ.
ສິນຄ້າທີ່ນຳເຂົ້າຕົ້ນຕໍປະກອບມີ: ນ້ຳມັນກາຊວນ, ອຸປະກອນກົນຈັກ, ຜະລິດຕະພັນເຄມີປະສົມສໍາເລັດຮູບ, ພາຫະນະທາງບົກ , ເຄື່ອງໄຟຟ້າ, ເຫລັກ, ເຄື່ອງໃຊ້ທີ່ເຮັດດ້ວຍພລາສະຕິກ, ນໍ້າມັນແອັດຊັງ, ຊິ້ນສ່ວນອາໄຫລ່ລົດ ແລະ ເຄື່ອງດື່ມ.
