ເບຣຊິນຜະເຊີນໄຟໄໝ້ປ່າຮຸນແຮງທຸບສະຖິຕິໃນຮອບຫລາຍສິບປີ ສ້າງຄວາມເສຍຫາຍໜັກ
ໄຟໄໝ້ປ່າຢູ່ລັດເຊົາເປົາໂລທາງຕອນໃຕ້ຂອງເບຣຊິນ ມີຜູ້ເສຍຊີວິດແລ້ວຢ່າງໜ້ອຍ 2 ຄົນ ຕາມລາຍງານໃນວັນທີ 24 ສິງຫາຜ່ານມາ ໂດຍມີເມືອງຢ່າງໜ້ອຍ 36 ແຫ່ງທີ່ປະກາດເຕືອນໄພຂັ້ນສູງແລ້ວ.
ຂະນະທີ່ເຈົ້າໜ້າທີ່ໃນລະດັບທ້ອງຖິ່ນ ແລະ ສູນກາງກໍາລັງເລັ່ງຄວບຄຸມສະຖານະການ ເຊິ່ງເຈົ້າຄອງລັດເຊົາເປົາໂລເປີດເຜີຍວ່າ: ທາງການໄດ້ສົ່ງເຈົ້າໜ້າທີ່ ແລະ ອາສາສະໝັກ 7,300 ກວ່າຄົນລົງພື້ນທີ່ເພື່ອຊ່ວຍກັນມອດໄຟໄໝ້ປ່າ ແລະ ຢຸດການລຸກລາມ.
ທັງນີ້, ໄຟໄໝ້ປ່າກວມເນື້ອທີ່ອ້ອມນອກຂອງເມືອງເຊົາເປົາໂລ ເຊິ່ງເປັນໜຶ່ງໃນເມືອງທີ່ມີປະຊາກອນຫລາຍທີ່ສຸດໃນເຂດອາເມລິກາລາຕິນ ໂດຍມີປະຊາກອນອາໄສຢູ່ 11 ລ້ານກວ່າຄົນ ເຖິງວ່າໃນເຂດເມືອງຈະຍັງບໍ່ໄດ້ຮັບຜົນກະທົບຫລາຍ, ແຕ່ໃນພື້ນທີ່ຊົນນະບົດມີການເຜີຍແຜ່ວິດີໂອທາງໂຊຊຽວມີເດຍສະແດງໃຫ້ເຫັນທ້ອງຟ້າທີ່ເຕັມໄປດ້ວຍຄວັນໄຟ ແລະ ຕົ້ນໄມ້ທີ່ກໍາລັງຖືກໄຟໄໝ້ຕາມທາງຫລວງ ໂດຍເຈົ້າຄອງລັດເຊົາເປົາໂລເຕືອນວ່າ: ໄຟໄໝ້ປ່າອາດລຸກລາມຫລາຍຂຶ້ນ ເນື່ອງຈາກຄື້ນຄວາມຮ້ອນ, ໄພແຫ້ງແລ້ງ ແລະ ລົມແຮງທີ່ພັດຜ່ານເຂົ້າມາ.
ຕາມລາຍງານຂອງສໍານັກຂ່າວທ້ອງຖິ່ນລະບຸວ່າ: ພື້ນທີ່ດັ່ງກ່າວກໍາລັງຜະເຊີນໄຟໄໝ້ປ່າຮຸນແຮງທີ່ສຸດໃນຮອບຫລາຍທົດສະວັດ ໂດຍໃນປີນີ້ມີໄຟໄໝ້ປ່າເກີດຂຶ້ນໃນພາກພື້ນນີ້ເຖິງ 4,973 ຄັ້ງແລ້ວ.
ອ້າງອີງ:
