ຊູດັງວິກິດ ນໍ້າຖ້ວມໜັກ-ເຂື່ອນແຕກ ຜູ້ເສຍຊີວິດສູງເຖິງ 130 ຄົນແລ້ວໃນປີນີ້
ນັບແຕ່ຕົ້ນປີນີ້ ມີຜູ້ເສຍຊີວິດຈາກນໍ້າຖ້ວມ ແລະ ຝົນຕົກໜັກຢູ່ຊູດັງຢ່າງໜ້ອຍ 132 ຄົນ ແລະ ບ້ານເຮືອນເປ່ເພເສຍຫາຍບໍ່ຕໍ່າກວ່າ 12,420 ຫລັງ.
ວັນທີ 27 ສິງຫາ, ສໍານັກຂ່າວຕ່າງປະເທດລາຍງານວ່າ: ຖະແຫລງການຂອງລັດຖະບານຊູດັງລະບຸວ່າ: ມີລັດໄດ້ຮັບຜົນກະທົບທັງໝົດ 10 ລັດ ຈາກນໍ້າຖ້ວມໜັກເປັນໄລຍະໆຢູ່ທາງພາກເໜືອ ແລະ ພາກຕາເວັນອອກຂອງປະເທດ ນັບແຕ່ເດືອນກໍລະກົດຜ່ານມາ. ຂະນະທີ່ຈໍານວນຄອບຄົວທີ່ໄດ້ຮັບຜົນກະທົບຈາກໄພທໍາມະຊາດຄັ້ງນີ້ເພີ່ມເປັນຢ່າງໜ້ອຍ 31,666 ຄອບຄົວ ແລະ ມີຜູ້ເດືອດຮ້ອນເພີ່ມຂຶ້ນເປັນຢ່າງໜ້ອຍ 129,650 ຄົນ. ເຖິງວ່າຊູດັງຈະຜະເຊີນນໍ້າຖ້ວມທຸກປີ, ແຕ່ສະຖານະການປີນີ້ຮ້າຍແຮງຂຶ້ນ ເນື່ອງຈາກຄວາມບໍ່ສະຫງົບໄດ້ຊຸກດັນໃຫ້ປະຊາຊົນຕ້ອງຍ້າຍຖິ່ນຖານໄປອາໄສຢູ່ໃນພື້ນທີ່ສ່ຽງຖືກນໍ້າຖ້ວມ.
ຂະນະດຽວກັນ, ບ້ານເຮືອນທີ່ເປ່ເພເສຍຫາຍ 12,420 ຫລັງ ແລະ ອີກ 11,472 ຫລັງ ຖະຫລົ່ມລົງບາງສ່ວນ ເນື່ອງຈາກຝົນຕົກ ສ່ວນຫລາຍເກີດຂຶ້ນຢູ່ລັດທາງພາກເໜືອ ແລະ ລັດທີ່ຕັ້ງຢູ່ລຸ່ມແມ່ນໍ້າໄນ.
ນອກຈາກນີ້, ຝົນທີ່ຕົກໜັກໃນວັນທີ 24 ສິງຫາຜ່ານມາ ສົ່ງຜົນເຮັດໃຫ້ນໍ້າຖ້ວມຢູ່ເຂດອາບາດ ທາງເໜືອຂອງເມືອງພອດຊູດັງ ແລະ ເຮັດໃຫ້ເຂື່ອນອາບາດແຕກ ແລະ ກວາດເອົາທັງໝູ່ບ້ານໄປກັບນໍ້າ. ອ່າງເກັບນໍ້າດັ່ງກ່າວຖືເປັນແຫລ່ງນໍ້າສໍາຄັນຂອງພອດຊູດັງ ເຊິ່ງລັດຖະບານໄດ້ຍ້າຍເຂົ້າມາເຮັດວຽກຢູ່ເມືອງແຫ່ງນີ້ ຫລັງສົງຄາມເລີ່ມຂຶ້ນ ຢູ່ນະຄອນຫລວງຄາທູມ ໃນເດືອນເມສາປີຜ່ານມາ.
ອາສາສະໝັກໃນພື້ນທີ່ເປີດເຜີຍວ່າ: ພວກເຂົາພົບຜູ້ເສຍຊີວິດແລ້ວ 13 ຄົນ ລວມທັງຜູ້ຍິງ ແລະ ເດັກນ້ອຍ. ຂະນະທີ່ການຄົ້ນຫາຜູ້ສູນຫາຍອີກຢ່າງໜ້ອຍ 210 ຄົນ ຍັງດໍາເນີນຕໍ່ໄປ.
ນອກຈາກນໍ້າຖ້ວມແລ້ວ ຊູດັງຍັງຜະເຊີນການລະບາດຂອງພະຍາດອະຫິວາ ເຊິ່ງອົງການອະນາໄມໂລກ (WHO) ລາຍງານວ່າ: ມີຜູ້ຕິດເຊື້ອສະສົມຢ່າງໜ້ອຍ 11,327 ຄົນ ແລະ ມີຜູ້ເສຍຊີວິດຢ່າງໜ້ອຍ 316 ຄົນ ນັບແຕ່ເດືອນມິຖຸນາ 2023. ທ່ານ ໄຮທໍາ ອິບຣາຮິມ ລັດຖະມົນຕີກະຊວງສາທາລະນະສຸກ ອະທິບາຍວ່າ: ການລະບາດຂອງພະຍາດມີສາເຫດມາຈາກສະພາບອາກາດ ແລະ ການປົນເປື້ອນຂອງນໍ້າ.
