ນິວເດລີປະກາດພາວະສຸກເສີນ ຂະນະທີ່ໝອກຄວັນຍັງປົກຄຸມ
ນະຄອນຫລວງນິວເດລີຂອງອິນເດຍປະກາດພາວະສຸກເສີນດ້ານມົນລະພິດ ຫ້າມລົດບັນທຸກເຂົ້າ ແລະ ຫ້າມດຳເນີນການກໍ່ສ້າງ. ຂະນະທີ່ໝອກຄວັນພິດຍັງປົກຄຸມເປັນວັນທີ 3 ໃນວັນທີ 9 ພະຈິກນີ້ ແລະ ຄຸນນະພາບອາກາດຮ້າຍແຮງກວ່າເກົ່າ.
ລາຍງານລະບຸວ່າ: ການຈູດຜົນຜະລິດທາງກະສິກຳຢູ່ລັດກະສິກຳຫລາຍແຫ່ງອ້ອມນະຄອນຫລວງນິວເດລີ, ຄວັນເສຍທີ່ປ່ອຍອອກມາຈາກລົດຍົນ ແລະ ຝຸ່ນລະອອງຈາກການກໍ່ສ້າງ ສົ່ງຜົນໃຫ້ເກີດສະພາບວິກິດທຸກປີ. ສະຖານທູດອາເມລິກາເຜີຍແຜ່ລາຍງານການວັດແທກຄ່າຝຸ່ນລະອອງຂະໜາດນ້ອຍບໍ່ເກີນ 2,5 ໄມຄຣອນ ເຊິ່ງເປັນອັນຕະລາຍຕໍ່ສຸຂະພາບ ເມື່ອເວລາປະມານ 10:00 ໂມງ ຕາມເວລາທ້ອງຖິ່ນຢູ່ທີ່ 608. ຂະນະທີ່ 1 ຊົ່ວໂມງກ່ອນໜ້ານັ້ນວັດແທກໄດ້ 591. ລາຍງານລະບຸວ່າ: ປະຊາຊົນເກີດອາການເຈັບຫົວ, ໄອ ແລະ ແສບຕາ, ຫລາຍຄົນຕ້ອງຢູ່ແຕ່ໃນເຮືອນ. ຂະນະດຽວກັນ ມີລາຍງານວ່າ: ທາງການລັດປັນຈາບສັ່ງປິດໂຮງຮຽນທັງໝົດ 25.000 ແຫ່ງຮອດທ້າຍອາທິດນີ້, ພາຍຫລັງທາງການນະຄອນຫລວງນິວເດລີປະກາດກ່ອນໜ້ານີ້ ປິດໂຮງຮຽນທັງໝົດ 6.000 ແຫ່ງຈົນຮອດວັນທີ 12 ພະຈິກນີ້.
ລັດຖະມົນຕີສິ່ງແວດລ້ອມອິນເດຍກ່າວໃຫ້ຄວາມໝັ້ນໃຈແກ່ປະຊາຊົນວ່າ: ລັດຖະບານຈະເຮັດທຸກວິທີທາງເພື່ອເຮັດໃຫ້ຄຸນນະພາບອາກາດດີຂຶ້ນ. ທັງນີ້ ທາງການອິນເດຍກຳລັງຖືກຕຳໜິທີ່ຍັງບໍ່ສາມາດແກ້ໄຂບັນຫາທີ່ເກີດຂຶ້ນເປັນປະຈຳທຸກປີ.
