ເຈົ້າໜ້າທີ່​ເຜີຍ​ໄຟ​ໄໝ້​ເຮືອນ​ປະຊາຊົນ​ຢູ່​ບ້ານ ໜອງ​ໄຮຍ້ອນ​ໄຕ້​ທູບ​ທຽນບູຊາ

ທ່ານພັນ​ໂທ ຈັນທະ​ບູນ ມະນີວົງ ຫົວໜ້າພະ​ແນ​ກຕຳຫລວດສະກັດ​ກັ້ນ ​ແລະ ມອດ​ໄຟ​ນະຄອນຫລວງ​ວຽງຈັນ ​ໄດ້ໃຫ້ຮູ້​ວ່າ: ການ​ສືບສວນ-ສອບ​ສວນສາ​ເຫດ​ໄຟ​ໄໝ້​ເຮືອນ​ປະຊາຊົນຫລັງໜຶ່ງຢູ່​ບ້ານໜອງ​ໄຮ​ເມືອງຫາດ​ຊາຍ​ຟອງ​ໃນ​ວັນ​ທີ 10 ພະຈິກ​ນີ້, ​​ແມ່ນ​ຍ້ອນ​ການ​​ໃຕ້​ທູບ​ທຽນບູຊາຈຶ່ງ​ເກີດ​ໄຟ​ໄໝ້ຂຶ້ນຈົນ​ໄດ້​ຮັບ​ຄວາມ​ເສຍ​ຫາຍໝົດຫລັງ, ​ແຕ່​ໂຊກ​ດີບໍ່ມີ​ຜູ້​ໄດ້​ຮັບ​ບາດ​ເຈັບ ຫລື ເສຍຊີວິດ.

​ເຈົ້າໜ້າທີ່​ ໃຫ້​ຮູ້​ວ່າ: ​ເຮືອນ​​ຫລັງເສຍ​ຫາຍ​ແມ່ນ​ເປັນ​ເຮືອນ​ກໍ່ສອງ​ຊັ້ນ, ​ເຈົ້າ​ຂອງ​ຊື່ທ້າວ ​ໂຊກ​ຂຸນ ອາຍຸ 81 ປີ, ເຊິ່ງ​ກ່ອນ​ເກີດ​ເຫດ​ໄດ້​ໃຫ້​ລູກ​ຫລານ​ຂຶ້ນ​ໄປ​ໃຕ້​ທູບ​ທຽນບູຊາ​ຮ້ານ​ພະ​ຢູ່​ເທິງ​ເຮືອນ, ຈາກ​ນັ້ນກໍ​ໄດ້​ເກີດ​ໄຟ​ໄໝ້ຂຶ້ນ, ​ພາຍຫລັງ​ໄດ້​ຮັບ​ແຈ້ງ​ທາງ​ເຈົ້າໜ້າທີ່ກໍ​ໄດ້​ລະດົມ​ລົດ​ມອດ​ໄຟຮີບ​ຮ້ອນ​ລົງ​ສະຖານ​ທີ່​ເກີດ​ເຫດ, ​ແຕ່​ເນື່ອງ​ຈາກ​ວ່າ​ເຮືອນ​ມີ​ສະພາບ​ເກົ່າ​ແກ່ ​ເຮັດ​ໃຫ້​ໄຟ​ລຸກ​ໄໝ້ຢ່າງ​ໄວວາເສຍຫາຍໝົດຫລັງ, ໂດຍ​ເຈົ້າໜ້າທີ່​ໄດ້​ໃຊ້​ລົດ​ມອດ​ໄຟ 2 ຄັນ ​ເພື່ອ​ຄວບ​ຄຸມເພິ​ງບໍ່​ໃຫ້​ຂະຫຍາຍ​ວົງ​ກວ້າງ.

​ເຈົ້າໜ້າທີ່​ຍັງ​ໃຫ້​ຮູ້​ວ່າ: ປັດຈຸບັນ, ສະພາບ​ອາກາດ​ໄດ້​ເລີ່​ມ​ເຂົ້າ​ສູ່​ລະດູ​ແລ້ງອາດ​ເຮັດ​ໃຫ້​ເກີດ​ໄຟ​ໄໝ້​ໄດ້​ງ່າຍ, ເຊິ່ງປີນີ້ຢູ່​ນະຄອນຫລວງ​ວຽງຈັນມີ​ອັກຄີ​ໄພ​ເກີດ​ຂື້ນແລ້ວ 51 ຄັ້ງ, ສາ​ເຫດ​ສ່ວນ​ໃຫຍ່​ແມ່ນ​ຍ້ອນ​ໄຟຟ້າ​ລັດ​ວົງ​ຈອນ, ການ​ຂາດ​ສະຕິ​ໃນ​ການ​ນຳ​ໃຊ້​ຟືນ​ໄຟ ​ແລະ ການ​ໄຕ້​ທູບ​ທຽນບູຊາ.

+ໄຟໄໝ້ຈາກໄຟຟ້າລັດວົງຈອນໃຜເປັນຜູ້ຮັບຜິດຊອບ

error: Alert: Content is protected !!