ເຮືອບິນຮົບຖະຫລົ່ມຕະຫລາດ ຢູ່ພາກເໜືອຊີຣີ ດັບກວ່າເຄິ່ງຮ້ອຍ
ມີຜູ້ເສຍຊີວິດຢ່າງໜ້ອຍ 53 ຄົນ ຈາກເຫດເຮືອບິນຮົບຍັງບໍ່ຮູ້ຝ່າຍຖິ້ມລະເບີດໂຈມຕີຕະຫລາດແຫ່ງໜຶ່ງ ໃກ້ກັບເມືອງອາເລັບໂປ ໃນພາກເໜືອຂອງຊີຣີ.
ສຳນັກຂ່າວຕ່າງປະເທດລາຍງານຈາກເມືອງອາເລັບໂປ ປະເທດຊີຣີ ໃນວັນທີ 14 ພະຈິກວ່າ: ອົງກອນສັງເກດການດ້ານສິດທິມະນຸດຊີຣີ (SOHR) ລາຍງານການເກີດເຫດເຮືອບິນຮົບໂຈມຕີທາງອາກາດໂດຍການຖິ້ມລະເບີດ “ຢ່າງໜ້ອຍ 3 ຄັ້ງ” ຢູ່ຕະຫລາດໃນເມືອງເອຕາເຣບ ໃກ້ກັບເມືອງອາເລັບໂປ ໃນພາກເໜືອຂອງຊີຣີ ໃນວັນທີ 13 ພະຈິກ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 53 ຄົນ ໃນຈຳນວນນີ້ເປັນເດັກນ້ອຍຢ່າງໜ້ອຍ 5 ຄົນ ແລະ ມີຜູ້ໄດ້ຮັບບາດເຈັບອີກປະມານ 100 ຄົນ.
At least 29 killed after an air strike hits a rebel-held area in Syria’s Aleppo province pic.twitter.com/fKczsXlV2R
— TRT World (@trtworld) November 13, 2017
ເຖິງຍັງບໍ່ແນ່ນອນວ່າເຮືອບິນຮົບລຳດັ່ງກ່າວເປັນຂອງຝ່າຍໃດ, ແຕ່ບໍລິເວນເກີດເຫດຍັງເປັນເຂດຍຶດຄອງຂອງຝ່າຍກະບົດຈຶ່ງມີການຕັ້ງສົມມຸດຖານວ່າອາດເປັນເຮືອບິນຮົບຂອງລັດຖະບານ ຫລື ກອງທັບຊີຣີ. ເຖິງຢ່າງໃດກໍຕາມ, ເມືອງອາຕາເຣບຢູ່ໃນເຂດ “ປອດຄວາມຮຸນແຮງ” ທີ່ລັດຖະບານມົດສະກູ ແລະ ອີຣານຮ່ວມກັນກຳນົດຂຶ້ນໃນກອງປະຊຸມຕົ້ນປີນີ້ ໂດຍໄດ້ຮັບຄວາມເຫັນພ້ອມຈາກລັດຖະບານດາມັດກັດ ແລະ ຕວກກີ.
ຂະນະທີ່ກ່ອນເກີດເຫດ, ສຳນັກຂ່າວຊານາຂອງທາງການຊີຣີລາຍງານຄາລາວານລົດບັນທຸກເຄື່ອງຂອງເພື່ອຊ່ວຍເຫລືອດ້ານມະນຸດສະທຳຈາກສະຫະປະຊາຊາດ (ສປຊ) ແລະ ສະພາຊີກວົງເດືອນອາຣັບຊີຣີ (SARC) ລວມ 24 ຄັນ ເດີນທາງເຂົ້າໄປໃນເຂດດູມາ ນອກນະຄອນຫລວງດາມັດກັດ, ສ່ວນທ່ານ ອາລີ ຮາມູດ ລັດຖະມົນຕີກະຊວງຄົມມະນາຄົມຂອງຊີຣີ ຕີລາຄາວ່າສົງຄາມກາງເມືອງທີ່ຍືດເຍື້ອມາແຕ່ປີ 2011 ສ້າງຄວາມເສຍຫາຍຕໍ່ລະບົບໂຄງສ້າງພື້ນຖານ ແລະ ສາທາລະນູປະໂພກຢ່າງໜ້ອຍ 4.600 ລ້ານໂດລາສະຫະລັດ.
