ອິດສະລາແອນໂຈມຕີໂດຍກົງຕໍ່ອີຣານ ຕອບໂຕ້ເຫດຍິງລູກສອນໄຟ ຄາດວ່າປະຕິບັດການຍືດເຍື້ອຫລາຍຊົ່ວໂມງ
ອິດສະລາແອນໂຈມຕີໂດຍກົງຕໍ່ອີຣານໃນເຊົ້າວັນທີ 26 ຕຸລາ ເພື່ອຕອບໂຕ້ການຍິງລູກສອນໄຟຂອງອີຣານໃນວັນທີ 1 ຕຸລາຜ່ານມາ ເຊິ່ງເຮັດໃຫ້ເກີດຄວາມກັງວົນກ່ຽວກັບຄວາມເປັນໄປໄດ້ທີ່ຈະເກີດສົງຄາມໃນລະດັບພາກພື້ນ.
ໂດຍກອງທັບອິດສະລາແອນລະບຸວ່າ: ການໂຈມຕີຄັ້ງນີ້ຕັ້ງເປົ້າໃສ່ເປົ້າໝາຍທາງທະຫານຢູ່ອີຣານ ໂດຍບໍ່ມີການໂຈມຕີໂຄງລ່າງພື້ນຖານດ້ານພະລັງງານ ຫລື ຈຸດທີ່ບໍ່ໄດ້ກ່ຽວຂ້ອງກັບທາງທະຫານແຕ່ຢ່າງໃດ. ຂະນະດຽວກັນ ສື່ຂອງລັດຖະບານອີຣານລາຍງານວ່າ: ໄດ້ຍິນສຽງລະເບີດຫລາຍຈຸດຢູ່ນະຄອນຫລວງເຕຫະຣານໃນຕອນເຊົ້າມືດ. ນອກຈາກນີ້ແຫລ່ງຂ່າວຂອງອິດສະລາແອນຢືນຢັນວ່າ: ປະຕິບັດການນີ້ຈະຍັງດໍາເນີນຕໍ່ໄປອີກຫລາຍຊົ່ວໂມງ.
ທັງນີ້, ຕອນເຊົ້າວັນທີ 26 ຕຸລາ ຕາມເວລາທ້ອງຖິ່ນຂອງອີຣານ ຊາວນະຄອນຫລວງເຕຫະຣານບັນທຶກພາບແສງໄຟຈາກການໂຈມຕີ ແລະ ສຽງລະເບີດທີ່ເກີດຂຶ້ນຢູ່ທ້ອງຟ້າເໜືອເມືອງຫລວງໄດ້ ເຊິ່ງ CNN ຢືນຢັນວ່າມາຈາກປະຕິບັດການຮອບທີ 2 ຂອງອິດສະລາແອນມຸ້ງໂຈມຕີເປົ້າໝາຍທາງທະຫານພາຍໃນປະເທດອີຣານ.
ລາຍງານຈາກສື່ເຄິ່ງທາງການ Tasnim ແລະ Fars ລະບຸວ່າ: ເຈົ້າໜ້າທີ່ອີຣານເປີດນໍາໃຊ້ລະບົບປ້ອງກັນທາງອາກາດໃນຫລາຍພື້ນທີ່ອ້ອມນະຄອນຫລວງເຕຫະຣານ ແລະ ບໍລິເວນໃກ້ຄຽງ ພາຍຫລັງສຽງລະເບີດດັງຂຶ້ນທົ່ວປະເທດໃນຕອນເຊົ້າມືດ.
ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ປະເມີນສະຖານະການຄວາມໝັ້ນຄົງຢ່າງລະອຽດຢູ່ຖານທັບຄິຣິຢາໃນເທວອາວີບ ທ່າມກາງການໂຈມຕີໂດຍກົງທີ່ເກີດຂຶ້ນຕໍ່ອີຣານ ໂດຍມີທ່ານ ໂຢອາບ ກັລແລນ ລັດຖະມົນຕີວ່າການກະຊວງປ້ອງກັນປະເທດ ລວມທັງຜູ້ນໍາກອງກໍາລັງປ້ອງກັນປະເທດອິດສະລາແອນ ແລະ ໜ່ວຍຂ່າວສໍາຄັນຂອງປະເທດ ຄືມອສຊາດ ແລະ ຊິນເບດເຂົ້າຮ່ວມປະຊຸມ ເຊິ່ງສະທ້ອນເຖິງຄວາມພ້ອມຂອງອິດສະລາແອນໃນການຮັບມືສະຖານະການສຸກເສີນ ແລະ ປັບກົນລະຍຸດ.
ຫລ້າສຸດມີລາຍງານວ່າ: ປະຕິບັດການຕອບໂຕ້ຂອງອິດສະລາແອນຢູ່ອີຣານສິ້ນສຸດລົງແລ້ວພາຍຫລັງການໂຈມຕີ 3 ຮອບ, ແຕ່ເປົ້າໝາຍ ແລະ ຄວາມເສຍຫາຍຈາກການໂຈມຕີຍັງບໍ່ຈະແຈ້ງ.
ອ້າງອີງ:
