ຊາອຸດິອາຣະບີປະນາມອິດສະລາແອນໂຈມຕີອີຣານ ກ່າວວ່າຍິ່ງເພີ່ມຄວາມຮຸນແຮງ

       ລັດຖະບານຣິຢາດປະນາມປະຕິບັດການທາງທະຫານຂອງອິດສະລາແອນ ເຊິ່ງໂຈມຕີເປົ້າໝາຍທາງທະຫານຢູ່ອີຣານ ໂດຍເຕືອນວ່າ: ຈະຍິ່ງເປັນການກະຕຸ້ນຄວາມຮຸນແຮງໃນພາກພື້ນ.

       ກະຊວງການຕ່າງປະເທດຊາອຸດິອາຣະບີອອກຖະແຫລງການປະນາມຢ່າງສູງສຸດຕໍ່ອິດສະລາແອນປະຕິບັດການໂຈມຕີທາງອາກາດຕໍ່ເປົ້າໝາຍທາງທະຫານຢູ່ອີຣານ ເນື່ອງຈາກຈະຍິ່ງເປັນການຍົກລະດັບຄວາມເຄັ່ງຕຶງໃນພາກພື້ນຕາເວັນອອກກາງ.

      ຂະນະທີ່ສະພາຄວາມໝັ້ນຄົງແຫ່ງຊາດອາເມລິກາ (NSC) ອອກຖະແຫລງການຮຽກຮ້ອງອີຣານຢຸດການເຄື່ອນໄຫວທາງທະຫານຕໍ່ອິດສະລາແອນຕໍ່ຈາກນີ້ ເພື່ອຫລີກເວັ້ນວົງຈອນຂອງຄວາມຮຸນແຮງ.

      ທັງນີ້, ກອງທັບອິດສະລາແອນຢືນຢັນວ່າ: ໄດ້ປະຕິບັດການໂຈມຕີທາງອາກາດຢູ່ອີຣານ ໃນຕອນເຊົ້າມືດຂອງວັນທີ 26 ຕຸລາ ຕາມເວລາທ້ອງຖິ່ນ ໂດຍສາມາດສ້າງຄວາມເສຍຫາຍໃຫ້ແກ່ໂຮງງານ ແລະ ສູນການຜະລິດລູກສອນໄຟຂອງອີຣານ, ທໍາລາຍລະບົບລູກສອນໄຟຈາກພື້ນສູ່ອາກາດຂອງອີຣານ ແລະ ຍັງທໍາລາຍຂີດຄວາມສາມາດໃນການໂຈມຕີທາງອາກາດຂອງອີຣານໄດ້ອີກຈໍານວນໜຶ່ງ ໂດຍປະຕິບັດການທັງໝົດເປັນໄປຕາມແຜນ ແລະ ບັນລຸເປົ້າໝາຍ.

      ສື່ທ້ອງຖິ່ນຫລາຍແຫ່ງຂອງອີຣານລາຍງານວ່າ: ສະຖານທີ່ທາງທະຫານຫລາຍແຫ່ງຢູ່ນະຄອນຫລວງເຕຫະຣານ, ແຂວງຄູເຊສະຖານ ທາງຕາເວັນຕົກສຽງເໜືອ ແລະ ແຂວງອີແລມ ທາງຕາເວັນຕົກສຽງໃຕ້ ເປັນເປົ້າໝາຍຂອງການໂຈມຕີຄັ້ງນີ້. ເຖິງຢ່າງໃດກໍຕາມ, ຄວາມເສຍຫາຍຢູ່ໃນວົງຈໍາກັດ.

      ປະຕິບັດການໂຈມຕີຂອງອິດສະລາແອນຄັ້ງນີ້ ເກີດຂຶ້ນເກືອບ 1 ເດືອນ ພາຍຫລັງກອງກໍາລັງພິທັກປະຕິວັດອີຣານ (IRGC) ຍິງລູກສອນໄຟປະມານ 200 ລູກ ໃສ່ອິດສະລາແອນ ໃນວັນທີ 1 ຕຸລາຜ່ານມາ ເພື່ອຕອບໂຕ້ອິດສະລາແອນສັງຫານພັນທະມິດຫລາຍຄົນໃນແນວຮ່ວມອັກສະແຫ່ງການຕໍ່ຕ້ານ ລວມທັງທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ແລະ ທ່ານ ອິສມາອິລ ຮານິເຢ ຜູ້ນໍາສູງສຸດຝ່າຍການເມືອງຂອງກຸ່ມຮາມັດ.