ປາກິດສະຖານຜະເຊີນຝຸ່ນພິດຮຸນແຮງ ສັ່ງປິດໂຮງຮຽນຢູ່ເມືອງລາຮໍ 1 ອາທິດ
ປາກິດສະຖານສັ່ງປິດໂຮງຮຽນປະຖົມສຶກສາຢູ່ເມືອງລາຮໍ ຂອງແຄວ້ນປັນຈາບ ເຊິ່ງເປັນເມືອງໃຫຍ່ອັນດັບສອງຂອງປະເທດ ເປັນເວລາ 1 ອາທິດ ເນື່ອງຈາກຄ່າມົນລະພິດເພີ່ມສູງເປັນປະຫວັດສາດ.
ວັນທີ 2 ພະຈິກຜ່ານມາ, ດັດຊະນີຄຸນນະພາບອາກາດຢູ່ເມືອງລາຮໍ ເຜີຍແຜ່ໃນເວັບໄຊໄອຄິວແອຣ ມີຄ່າເກີນ 1,000 ສູງກວ່າລະດັບອັນຕະລາຍ ເຊິ່ງກໍານົດໄວ້ 300.
ການປະກາດຈາກໜ່ວຍງານທ້ອງຖິ່ນລະບຸວ່າ: ຊັ້ນຮຽນທັງໝົດສໍາລັບເດັກອາຍຸຕໍ່າກວ່າ 10 ປີ ທັງສະຖາບັນຂອງລັດ, ເອກະຊົນ ແລະ ການສຶກສາພິເສດ ຈະປິດນັບແຕ່ວັນທີ 4 ພະຈິກ ເຖິງວັນທີ 9 ພະຈິກນີ້ ແລະ ຈະມີການປະເມີນສະຖານະການອີກເທື່ອໜຶ່ງເມື່ອເຖິງເວລານັ້ນ.
ນາງ ມາຣິຍຸມ ອໍຣັງເຊບ ລັດຖະມົນຕີອາວຸໂສຂອງແຄວ້ນປັນຈາບ ເຕືອນວ່າ: ໝອກຄວັນນີ້ເປັນອັນຕະລາຍຕໍ່ເດັກ, ພ້ອມແນະນໍາໃຫ້ມີການບັງຄັບໃສ່ຜ້າປິດປາກກັນຝຸ່ນພິດຢູ່ໂຮງຮຽນ ແລະ ໄດ້ມີການຈັດຕັ້ງເຄົາເຕີ້ກວດວັດແທກໝອກຄວັນຢູ່ໂຮງໝໍແລ້ວ.
ວັນທີ 2 ພະຈິກຜ່ານມາ, ຄ່າຄວາມເຂັ້ມຂຸ້ນຂອງຝຸ່ນ PM2.5 ສູງກວ່າລະດັບທີ່ອົງການອະນາໄມໂລກ (WHO) ຍອມຮັບໄດ້ຫລາຍກວ່າ 40 ເທົ່າ. ເຖິງຢ່າງໃດກໍດີ, ຄ່າຝຸ່ນຫລຸດລົງເລັກໜ້ອຍໃນວັນທີ 3 ພະຈິກຜ່ານມາ.
ໃນອາທິດຜ່ານມາ, ສໍານັກງານຄຸ້ມຄອງສິ່ງແວດລ້ອມຂອງເມືອງລາຮໍ ປະກາດຂໍ້ຈໍາກັດໃໝ່ໃນຈຸດສ່ຽງ 4 ແຫ່ງ ລວມທັງການຫ້າມໃຊ້ລົດຕຸກໆ ແລະ ສັ່ງໃຫ້ຮ້ານອາຫານປະເພດປີ້ງໃຊ້ເຄື່ອງກອງອາກາດ.
ຂະນະທີ່ໜ່ວຍງານລັດ ແລະ ບໍລິສັດເອກະຊົນ ໃຊ້ມາດຕະການໃຫ້ພະນັກງານເຄິ່ງໜຶ່ງເຮັດວຽກຢູ່ເຮືອນ ນັບແຕ່ວັນທີ 4 ພະຈິກເປັນຕົ້ນໄປ ຈົນກວ່າຈະມີການປ່ຽນແປງ.
