ໄລຍະ 10 ເດືອນ ປີ 2024 ມີປາກົດການຫຍໍ້ທໍ້ເກີດຂຶ້ນຢູ່ເສັ້ນທາງລົດໄຟລາວ-ຈີນ 18 ເລື່ອງ ກັກຕົວຜູ້ກໍ່ເຫດໄດ້ 5 ຄົນ

ທ່ານ ພັນເອກ ກົງສີ ສຸວັນນະຕຸ້ມ ຫົວໜ້າກົມຕໍາຫຼວດລົດໄຟ ກົມໃຫຍ່ຕໍາຫຼວດ ກະຊວງ ປກສ ລາວ ໄດ້ລາຍງານກ່ຽວກັບວຽກງານຮັກສາຄວາມປອດໄພທາງລົດໄຟ ລາວ-ຈີນ ໃນວັນທີ 1 ພະຈິກ 2024 ນີ້ວ່າ: ແຕ່ວັນທີ 1 ມັງກອນ ຫາ ວັນທີ 1 ພະຈິກ 2024 ມີປະກົດການຫຍໍ້ທໍ້ເກີດ ຂຶ້ນຢູ່ເສັ້ນທາງລົດໄຟ ລາວ-ຈີນ 18 ເລື່ອງ, ກັກຕົວຜູ້ກະທຳຜິດໄດ້ 5 ຄົນ, ເປັນຄົນຕ່າງປະເທດ 3 ຄົນ, ແກ້ໄຂສຶກສາອົບຮົມ 10 ຄົນ, ສົ່ງໃຫ້ເຈົ້າໜ້າທີ່ກ່ຽວຂ້ອງດໍາເນີນຄະດີ 2 ເລື່ອງ ມີ 2 ຄົນ; ມີອາວຸດເສິກໄວ້ໃນຄອບຄອງ 2 ເລື່ອງ; ຢາສູບໄຟຟ້າ 1 ເລື່ອງ; ຜູ້ໂດຍສານຈະນໍາເຄື່ອງເກືອດຫ້າມ ຂຶ້ນຂະບວນລົດໄຟ 1 ເລື່ອງ; ສູບຢາໃນຂະບວນລົດໄຟ 3 ເລື່ອງ; ນໍາໃຊ້ພັດສະປອດຄົນອື່ນຊື້ປີ້ຂຶ້ນລົດໄຟ 1 ເລື່ອງ; ຢຶດເຄື່ອງຂອງກາງອາວຸດເສິກ (ປືນສັ້ນ) 3 ກະບອກ, ພ້ອມແມັກປືນ 1 ແມັກ ລູກປືນ 4 ລູກ ແລະ ປືນສັ້ນ (ປືນປະດິດ) 1 ກະບອກ, ເຄື່ອງຂອງກາງທີ່ຢຶດທັງໝົດໄດ້ມອບໃຫ້ ພະແນກຕຳຫຼວດສືບສວນ-ສອບສວນ ປກສ ນະຄອນຫຼວງ, ແຂວງ, ເມືອງ ເພື່ອດໍາເນີນຕາມຂັ້ນຕອນລະບຽບກົດໝາຍ.

ນອກນັ້ນ, ໃນປີ 2024 ຍັງມີສະພາບອື່ນໆເກີດຂຶ້ນ ຄື: ໃນຄັ້ງວັນທີ 2 ມີນາ 2024, ໄດ້ມີຄົນຮ້າຍລັກນ໋ອດຈັບລາງລົດໄຟ ຢູ່ເຂດຫຼັກກິໂລແມັດ 115+300 ບ້ານໂພນຊູ ເມືອງວັງວຽງ ແຂວງວຽງຈັນ, ຜົນເສຍຫາຍມີ ນ໋ອດຈັບລາງລົດໄຟ 137 ຊຸດ, ກັກຕົວຜູ້ຖືກຫາໄດ້ 1 ຄົນ, (ປັດຈຸບັນ ປກສ ແຂວງວຽງຈັນ ກຳລັງດໍາເນີນຄະດີ) ແລະ ໃນຄັ້ງວັນທີ 24 ຂອງເດືອນດຽວກັນ ມີຄົນຮ້າຍລັກສາຍໄຟຟ້າ ຢູ່ເຂດຫຼັກກິໂລແມັດ 80+813 ບ້ານຫີນເຫີບໃຕ້ ເມືອງຫີນເຫີບ ແຂວງວຽງຈັນ, ຜົນເສຍຫາຍມີ ສາຍໄຟຟ້າ 8 ເສັ້ນ ຍາວປະມານ 1,10 cm (ປັດຈຸບັນ ຍັງບໍ່ສາມາດຈັບຄົນຮ້າຍໄດ້).

ທີ່ມາ: ຄວາມສະຫງົບ